မိတ္ထီလာ အကြမ်းဖက်မှုတွင် ဖျက်ဆီးမှုမှ လွတ်ကင်းခဲ့သည့် သာယာကုန်း ဗလီ ဝတ်ပြုမှု ပိတ်ပင်ခံရ

မတ် ၂၁၊ ၂၀၁၅
M-Media
မိုးစက်

မိတ္ထီလာမြို့တွင် အကြမ်းဖက်မှုများဖြစ်ပွားစဉ်က ထိခိုက်မှုမရှိခဲ့သော ဗလီ (ဝတ်ကျောင်းတော်) တစ်ခုဖြစ်သော သာယာကုန်းရပ်ရှိ သာယာကုန်းဗလီကို သက်ဆိုင်ရာ အာဏာပိုင်များမှ ယင်းဗလီအား ယနေ့ မတ်လ ၂၀ ရက်နေ့တွင် ပိတ်သိမ်းရန် ပြောဆိုခဲ့ကြောင်း သိရပါတယ်။

ယင်းဗလီမှာ မိတ္ထီလာအကြမ်းဖက်မှုများ ဖြစ်ပွားစဉ်က မည်သည့်ပြသာနာတစ်စုံတစ်ရာ ထိခိုက်မှုမရှိဘဲ အစ္စလာမ်ဘာသာဝင်များမှာ တစ်နေ့ငါးကြိမ် ဝတ်ပြုနေလျှက်ရှိရာ မိတ္ထီလာ မယက မှ ယင်းဗလီရှေ့ဆောင်ဆရာနှင့် ဂေါပကအဖွဲ့ဝင်များကို ခေါ်ဆိုပြီး မတ်လ ၂၀ ရက်နေ့မှ စတင်ကာ သာယာကုန်းဗလီတွင် ဝတ်ပြုခွင့်မပေးတော့ကြောင်း ပြောဆိုခဲ့ကြောင်းသိရပါတယ်။

“မိတ္ထီလာက ဗလီတွေအကုန်လုံးကို ပိတ်တုန်းကလဲ စာနဲ့ပေနဲ့ မဟုတ်ဘူး။ ဒီသာယာကုန်းဗလီကလည်း အရေးအခင်းဖြစ်တဲ့ထဲမှာ မပါဘူး။ အရေးအခင်းကာလပြီးတော့ ဒီဗလီကို ဆက်လက်ဝတ်ပြုနေကြတယ်။ အခုလာပြီးတော့ ဒီဗလီက ဖွင့်ခွင့်ပေးမထားဘူး။ တရားဝင် စာတင်ဆိုပြီးပြောတယ်။ ဗလီကိုတော့ ဒီနေ့ လုံးဝပိတ်ရမယ်ပြောတယ်။ ဒီနေ့ ဗလီထဲကို ဝင်လာတဲ့လူတွေကိုတော့ တရားဥပေဒအရ အရေးယူမယ်လို့ပြောတယ်။ ဗလီပိတ်ဖို့ကိုလည်း စာနဲ့လာတာမဟုတ်ဘူး။ နှုတ်နဲ့ပဲလာပြောတာပါ” ဟု သာယာကုန်းရပ်ကွက်ရှိ အစ္စလာမ် ဘာသဝင်တစ်ဦးက ဖြစ်စဉ်ကို ရှင်းလင်းပြောဆိုခဲ့သည်။

မိတ္ထီလာမြို့တွင် ဗလီဝတ်ကျောင်းတော် (၁၂) လုံးတည်ရှိပြီး အကြမ်းဖက်ကာလများပြီးသည့်နောက်ပိုင်းတွင် ဗလီဝတ်ကျောင်းတော် (၅) လုံးကိုသာ တရားဝင် ဝတ်ပြုခွင့်ပေးထားကြောင်း သိရသည်။

သာယာကုန်း ဗလီကို ဝတ်ပြုမှု ပိတ်ပင်တဲ့ မတ်လ ၂၀ ရက်နေ့ဟာ မိတ္ထီလာအကြမ်းဖက်မှု ၂ နှစ်မြောက် နေ့လဲဖြစ်ပါတယ်။

မိတ္ထီလာမြို့ အကြမ်းဖက်ခံရမှုတွင် သာယာကုန်းဗလီမှာ ဖျက်ဆီးခြင်းမခံရပဲ၊ ပြည်သာယာဗလီမှာ လုံးဝ ပုံကျသွားသည်အထိ ဖျက်ဆီးခံလိုက်ရပြီး ကျန်သည့် ပြည်သာယာမြောက်ဗလီ၊ သီရိမင်္ဂလာဗလီ၊ ပါကစ္စတန်အရှေ့ဗလီ၊ ဈေးဗလီ၊ မြို့မဗလီ၊ ဘင်္ဂါလီဗလီ၊ မြို့ဦးဗလီ၊ တူရကီဗလီ၊ နန်းတော်ကုန်းဗလီ၊ ချမ်းအေးဗလီ တို့မှာ မီးရှို့ခြင်း၊ ဖျက်ဆီးခြင်းများ ခံခဲ့ရပါတယ်။