နျူလက်နက်ဖြင့် အချိန်မရွေးတိုက်ခိုက်နိုင်စွမ်းရှိသည်ဟု မြောက်ကိုရီးယားပြော

မတ် ၂၁၊ ၂၀၁၅
M-Media

– မိမိတို့နိုင်ငံအနေဖြင့် နျူကလီးယားလက်နက် ပစ်လွှတ်နိုင်သည့် စွမ်းရည်ရှိနေပြီး မိမိတို့တိုက်ခိုက်ခံရပါက နျူလက်နက်ကို အသုံးပြုသွားမည်ဟု ဗြိတိန်ဆိုင်ရာ မြောက်ကိုရီးယား သံအမတ်ကြီးက ယမန်နေ့တွင် ပြောကြားလိုက်သည်။

“နျူကလီးယားလက်နက် အသုံးပြု တိုက်ခိုက်မှုနဲ့ပတ်သက်လို့ အမေရိကန် တစ်နိုင်ငံတည်းက လက်ဝါးကြီး အုပ်ထားတာ မဟုတ်ပါဘူး” ဟု သံအမတ်ကြီး ဟွန် ဟက်ဘွန်က ဆိုပြီး နျူလက်နက်ပြန့်ပွားမှုထိန်းချုပ်ရေး သဘောတူစာချုပ်မှ ၁၉၉၃ ခုနှစ်တွင် နှုတ်ထွက်သွားခဲ့သည့် မြောက်ကိုရီးယားနိုင်ငံအနေဖြင့် နျူလက်နက် ပစ်လွှတ်နိုင်သည့် စွမ်းရည် ရှိနေပြီလားဟု မေးမြန်းရာ ၎င်းက “ရှိပါတယ်။ ဘယ်အချိန်မဆိုပါပဲ” ဟု ပြန်လည်ဖြေကြားခဲ့သည်။

ထို့ပြင် အမေရိကန်အနေဖြင့် မိမိတို့အား တိုက်ခိုက်ပါက မိမိတို့ကလည်း ပြန်လည်တိုက်ခိုက်သွားမည်ဖြစ်ကြောင်း သမရိုးကျစစ်ပွဲအတွက် သမရိုးကျစစ်ဖြင့်လည်းကောင်း၊ နျူကလီးယားစစ်ပွဲအတွက် နျူးကလီးယားစစ်ဖြင့်လည်းကောင်း တုန့်ပြန်ရန် အဆင်သင့်ရှိနေသည်ဟု ၎င်းက ထပ်လောင်းပြောကြားခဲ့သည်။

မတ်လ ၃ ရက်နေ့က ပြောကြားခဲ့သည့် မိန့်ခွန်းတွင် မြောက်ကိုရီးယား နိုင်ငံခြားရေးဝန်ကြီး ရီဆုယုံက အမေရိကန်၏ နျူးကလီးယားဖြင့် ခြိမ်းခြောက်မှု တိုးလာခြင်းကို တားဆီးရန်အတွက် လိုအပ်ပါက တင်ကြိုတိုက်ခိုက်မှုလုပ်ဆောင်ရန် အင်အားရှိနေသည်ဟု ပြောကြားခဲ့ဖူးသည်။ ထို့ပြင် အမေရိကန်နှင့် တောင်ကိုရီးယားတို့၏ ပူးတွဲစစ်ရေးလေ့ကျင်မှုကို ရှုတ်ချခဲ့ပြီး ရန်စသောလုပ်ရပ်ဟု ၎င်းက ဆိုသည်။

အမေရိကန်ပြည်ထောင်စုကမူ မြောက်ကိုရီးယား၏ နျူကလီးယား ဆောင်ရွက်ချက်ကို အလွန်အမင်း စိုးရိမ်မိသည်ဟု ဆိုပြီး နိုင်ငံတကာ သဘောတူညီချက်များကို ဖောက်ဖျက်ခြင်းဖြစ်သည်ဟု ပြောကြားထားသည်။

Ref: Channelnewsasia