ရီးယဲလ်အား ဂိုးသွင်းနိုင်သည့်အတွက် ဂုဏ်ယူသည်ဟု တိုက်စစ်မှူး ဆွာရက်ဇ် ပြော

မတ် ၂၃၊ ၂၀၁၅
M-Media

– ယမန်နေ့က ကစားခဲ့သည့် ရီးယဲနှင့်ပွဲတွင် ဂိုးသွင်းနိုင်ခဲ့သည့်အတွက် ဂုဏ်ယူမိပြီး၊ ဘာစီလိုနာ ကစားသမားသက်တမ်းတွင် အရေးပါဆုံး ဂိုးဖြစ်သည်ဟု ဘာကာတိုက်စစ်မှူး လူးဝစ် ဆွာရက်ဇ်က ပြောကြားလိုက်သည်။

ဘာစီလိုနာမှ ဂျရမီ မက်သယူး၏ အဖွင့်ဂိုးကို ရော်နယ်ဒိုက ပြန်လည်ချေပခဲ့သောကြောင့် ၁ ဂိုးစီ သရေကျနေသည့်အချိန် ဒုတိယပိုင်း ၅၅ မိနစ်တွင် ဆွာရက်ဇ်မှာ ဒုတိယဦးဆောင်ဂိုးကို သွင်းယူပေးခဲ့ပြီး ထိုဂိုးဖြင့်ပင် ဘာကာက ရီးယဲလ်ကို အနိုင်ရခဲ့ကာ လာလီဂါအမှတ်ပေးဇယားကို ၄ မှတ်အသာဖြင့် ဦးဆောင်နိုင်ခဲ့သည်။

ထိုဂိုးမှာ ဘာစီလိုနာအတွက် ပြိုင်ပွဲအားလုံးတွင် သွင်းယူပေးနိုင်ခဲ့သည့် ဆွာရက်ဇ်၏ ၁၄ ဂိုးမြောက်လည်း ဖြစ်သည်။

“ဒါဟာ ဘာကာအတွက် ကျွန်တော်သွင်းပေးမျှ ဂိုးတွေထဲမှာ အရေးပါဆုံး ဂိုးပါပဲ။ ပြီးတော့ ကျွန်တော်တို့ ယှဉ်ပြိုင်ရတဲ့ ပြိုင်ဘက်ကြောင့် ဒီဂိုးဟာ ပိုထင်ရှားလာပါတယ်” ဟု ဆွာရက်ဇ်က ပွဲအပြီးတွင် ဘာစီလိုနာရုပ်သံသို့ ပြောကြားခဲ့သည်။

ထို့ပြင် မိမိတို့တစ်သင်းလုံးမှာ ပျော်ရွှင်နေကြောင်း ဇယား၏ ထိပ်ဆုံး၌ ဆက်ရှိချင်ပြီး အမှတ်ကွာဟာမှုကို တိုးမြှင့်ချင်လျှင် ထိုပွဲမှာ အရေးပါသည့်ပွဲ ဖြစ်သည်ကို မိမိတို့အားလုံး သိရှိခဲ့ကြောင်း ဆွာရက်ဇ်က ထပ်လောင်းပြောကြားခဲ့သည်။

ထိုပွဲအနိုင်ရမှုအတွက် နည်းပြ အန်းရစ်ကလည်း အသင်းသားများအား ချီးကျူးခဲ့ပြီး ဆွာရက်ဇ်မှာ အသင်းအတွက် အဆုံးအဖြတ်ပေးမည့် ကစားသမားဖြစ်ကြောင်း ၎င်း၏ ကစားပုံ၊ အသင်းအတွက် ဆောင်ကျဉ်းပေးသည်တို့အတွက် ပျော်ရွှင်မိကြောင်း ပွဲအပြီးတွင် ပြောကြားခဲ့သည်။

ရီးယဲလ်းနည်းပြ အန်ဆယ်လော့တီကမူ ၎င်းတို့အသင်းမှာ ဒုတိယဂိုး မပေးရခင်အချိန်အထိ ကစားပုံကောင်းခဲ့ပြီး ပွဲအခြေအနေအား ပြောင်းလဲရန် ခေါင်းအေးအေး မထားနိုင်ခဲ့ဟု ဆိုသည်။

Ref: Dilymail