စပိန်ရှုံးထွက်ဖလား ဗိုလ်လုပွဲကို ဘာစီလိုနာ၏ နူးကမ့်ကွင်းတွင် ပြုလုပ်မည်

မတ် ၂၆၊ ၂၀၁၅
M-Media

– မေလ ၃၀ ရက်နေ့တွင် ကစားမည့် စပိန်ရှုံးထွက်ဖလား ဗိုလ်လုပွဲကို ဘာစီလိုနာအသင်း၏ အိမ်ကွင်း နျူးကမ့်တွင် ကျင်းပပြုလုပ်သွားမည်ဟု စပိန်ဘောလုံးအဖွဲ့ချုပ် RFEF က ကြေညာလိုက်သည်။

ဘာစီလိုနာနှင့် ဘီလ်ဘာအိုအသင်းတို့ ယှဉ်ပြိုင်ကစားရမည့် အဆိုပါ ဗိုလ်လုပွဲအတွက် ၂ သင်းစလုံးက ရီးယဲလ်မက်ဒရစ်အသင်း၏ ဆန်တီယာဂို ဘာနေဗျူးကွင်းတွင် ကျင်းပပြုလုပ်ရန် အကြံပြုထားပြီး အခြားရွေးချယ်မှုအဖြစ် ဆီးဗီးလာအသင်း၏ ရာမွန်ဆန်းချက်ဇ် ပီဂျူအန်ကွင်းကို အဆိုပြုထားသည်။

သို့သော်လည်း ရီးယဲလ်က ၎င်းတို့ကွင်းအား အသုံးပြုရန် ငြင်းဆိုခဲ့သောကြောင့် ဘာစီလိုနာနှင့် ဘီလ်ဘာအိုအသင်းများမှ ကိုယ်စားလှယ်များက ၂ နာရီကြာ ဆွေးနွေးမှုများ ပြုလုပ်ခဲ့သော်လည်း အဖြေမရခဲ့ပေ။ ထို့ကြောင့် စပိန်ဘောလုံးအဖွဲ့ချုပ်က ကြားဝင်ကာ ၎င်းတို့နှစ်သင်း၏ ကွင်းများတွင် ကျင်းပရန် အကြံပေးခဲ့သည်။

ထို့နောက် မဲခွဲမှုများ ပြုလုပ်ခဲ့ရာ ဘာစီလိုနာအသင်း၏ အိမ်ကွင်း နူးကမ့်တွင် ကျင်းပပြုလုပ်သွားရန် အတည်ပြုနိုင်ခဲ့သည်။ ၂၀၁၃ ခုနှစ် စပိန်ရှုံးထွက်ဖလားဗိုလ်လုပွဲကို ဘာနေဗျူးတွင် ကျင်းပပြုလုပ်ခဲ့ပြီး အက်သလက်တီကိုက ရီးယဲလ်အား အနိုင်ရရှိကာ ဗိုလ်စွဲခဲ့သည်။

Ref: Goal.com