တပ်ပေါင်းစုတစ်ခု ဖွဲ့စည်းရန် အာရပ်ခေါင်းဆောင်များ သဘောတူ

မတ် ၃၀၊ ၂၀၁၅
M-Media

– ယမန်နေ့က အီဂျစ်နိုင်ငံ ရှာမ် အလ်-ရှိခ်တွင် ပြုလုပ်ခဲ့သည့် အာရပ်လိဂ် ထိပ်သီးအစည်းအဝေးတွင် အာရပ်နိုင်ငံများ တပ်ပေါင်းစု ဖွဲ့စည်းရန် သဘောတူညီခဲ့သည်ဟု အီဂျစ် သမ္မတ အဘ်ဒဲလ် စီစီက ကြေညာလိုက်သည်။

အဆိုပါ ထိပ်သီးအစည်းအဝေးတွင် ဆော်ဒီဦးဆောင်ကာ ဟူသီသူပုန်များကို လေကြောင်းမှ တိုက်ခိုက်နေသော ယီမင်အရေးမှာ လွှမ်းမိုးခဲ့ပြီး နောက်ဆုံးကြေညာချက်တွင် အာရပ်နိုင်ငံများပေါ် လုံခြုံရေးအရ စိန်ခေါ်မှုများ ရှိလာပါက ၀င်ရောက်စွက်ဖက်နိုင်ရန်အတွက် အာရပ်တပ်ပေါင်းစုတစ်ခု တည်ဆောက်ရေး ပူးပေါင်းဆောင်ရွက်မှု၊ အားထုတ်မှုများနှင့် ခြေလှမ်းများအတွက် တိုက်တွန်း
ဆော်သြခဲ့သည်။

စီစီကမူ အဆိုပါတပ်ပေါင်းစု ဖွဲ့စည်းရေး တည်ဆောက်ပုံနှင့် နည်းလမ်းများအတွက် အာရပ်နိုင်ငံများမှ ကိုယ်စားလှယ်များပါဝင်သော အဆင့်မြင့်အဖွဲ့တစ်ဖွဲ့က ဆောင်ရွက်သွားမည်ဟု ထည့်သွင်းပြောကြားခဲ့သည်။ အဆိုပါ တပ်ပါင်းစု ဖွဲ့စည်းမှုမှာ လေးလခန့် ကြာမြင့်မည်ဖြစ်သည်။

ထိုတပ်ပေါင်းစုကို အာရပ်နိုင်ငံများမှ အကြမ်းဖျင်းအားဖြင့် တပ်သားစုစုပေါင်း ၄၀၀၀၀ ဖြင့် ဖွဲ့စည်းသွားမည်ဖြစ်ပြီး စစ်လေယာဉ်များ၊ စစ်သင်္ဘောများနှင့် အပေါ့စား စစ်သုံးယာဉ်များဖြင့် ပံ့ပိုးသွားမည်ဖြစ်သည်။

သို့သော်လည်း ၂၂ နိုင်ငံပါသော အာရပ်လိဂ် အဖွဲ့ဝင်နိုင်ငံအားလုံးမှ ပါဝင်မည်လားဆိုသည်နှင့်ပတ်သက်၍ မသေမချာ ဖြစ်နေသည်။

Ref: RT