ဘာသာရေးပွဲတော်ကို အစ္စရေး၏ ကန့်သတ်မှုအတွက် သည်းခံမည်ဟုတ်ဟု ပါလက်စတိုင်း ခရစ်ယာန်များပြော

ဧပြီ ၃၊ ၂၀၁၅
M-Media

– မိမိတို့၏ အီစတာပွဲတော် ကျင်းပမှုကို အစ္စရေးစစ်တပ်က ထပ်မံကန့်သတ်ခြင်းနှင့် ယခင်နှစ်များတွင် ဖြစ်ပွားသကဲ့သို့ အကြမ်းဖက်မှုများ ထပ်မံဖြစ်ပွားခြင်းတို့အတွက် မိမိတို့မှ လုံးဝ သည်းခံမည်မဟုတ်ဟု ပါလက်စတိုင်း ခရစ်ယာန်များက ပြောကြားလိုက်သည်။

Good Friday ဖြစ်သော ယနေ့မှ စတင်ကာ ခရစ်ယာန်တို့၏ အီစတာပွဲတော် သီတင်းပတ်ဖြစ်ပြီး အစ္စရေး၏ ကန့်သတ်ချက်များက ပွဲတော်ဆင်နွှဲမှုအား အတားအဆီးဖြစ်လိ့မ်မည်ကို စိုးရိမ်ကြောင်း ပါလက်စတိုင်းရှိ ခရစ်ယာန်လူ့အဖွဲ့အစည်း ခေါင်းဆောင်များက အင်္ဂါနေ့တွင် ပြောကြားခဲ့သည်။

“ဒီနှစ်က အဓိကပြောင်းလဲမှုတစ်ခု ရှိပါတယ်။ ဒါကတော့ ပါလက်စတိုင်းဟာ နိုင်ငံတကာရာဇ၀တ်ခုံရုံးမှာ အဖွဲ့ဝင်ဖြစ်လာတဲ့
ဧပြီ ၁ ရက်ပါပဲ။ (မြင့်မြတ်ရာနေရာတွေ ၀င်ခွင့်) ကျွန်တော်တို့ ငြင်းပယ်ခံရမယ်ဆိုရင် အဲဒီလို လွတ်လပ်စွာကိုးကွယ်ခွင့်ကို ငြင်းပယ်ခြင်းဟာ ကျွန်တော်တို့ တရားစွဲဆိုသွားမည့် ကိစ္စပါပဲ” ဟု ယခင်ပါလက်စတိုင်း စီးပွားရေးဝန်ကြီးဟောင်းဖြစ်သူ ဂျေရုစလင်မှ အောသိုဒေါ့စ် ခရစ်ယာန်ဘာသာဝင် ဘက်ဆင်းမ် ခူရီက ပြောကြားခဲ့သည်။

ပါလက်စတိုင်း၌ အီစတာပွဲတောင်ကျင်းပတိုင်း ခရစ်ယာန်များအား ဂျေရုစလင်ရှိ မြင့်မြတ်ရာ နေရာများသို့ ၀င်ရောက်ခွင့်ကို အစ္စရေးက တားမြစ်ပိတ်ပင်မှုကြောင့် ခရစ်ယာန်များနှင့် အစ္စရေးတပ်ဖွဲ့များအကြား ရုန်းရင်းဆန်ခတ်မှုများဖြစ်ပွားလေ့ရှိသည်မှာ ဆယ်စုနှစ်နှင့်ချီခဲ့ပြီဖြစ်သည်။

“၂၀၀၅ ခုနှစ်ကတည်းက ဂျေရုစလင်မြို့ဟောင်းအတွင်း ကျွန်တော်တို့ ၀င်ရောက်ခွင့်ကို အစ္စရေးက ပိတ်ခဲ့တာပါ။ ကျွန်တော်တို့ဟာ Palm Sunday နဲ့ Holy Friday ပွဲတော်ကျင်းပဖို့ လာတိုင်း ၀င်ပေါက်တံခါးတွေ ပိတ်ထားပြီး အစ္စရေးစစ်သားတွေက လမ်းတစ်လျှောက်မှာ စောင့်ကြပ်နေပါတယ်” ဟု ဂျေရုစလင်ရေးရာ ပါလက်စတိုင်းဝန်ကြီးဟောင်း ဟင်ဒ် ခူရီက ပြောကြားခဲ့သည်။

ယခုနှစ် အီစတာပွဲတော်မှာ ဂျူးတို့၏ Passover ပွဲတော်နှင့် တိုက်နေသောကြောင့် အစ္စရေးက ဂျေရုစလင်ရှိ မြင့်မြတ်ရာဒေသများသို့ ပါလက်စတိုင်း ခရစ်ယာန်များနှင့် မွတ်စလင်များ ၀င်ရောက်ခွင့်ကို ပို၍ တင်းတင်းကျပ်ကျပ် ကန့်သတ်ခဲ့သည်။

Ref: Aljazeera