ချန်ပီယံလိဂ်ဝင်ခွင့်အတွက် မသေချာသေးဟု ဗန်ဂါးလ်ပြော

ဧပြီ ၅၊ ၂၀၁၅
M-Media

– လာမည့်နှစ် ချန်ပီယံလိဂ်တွင် ၀င်ရောက်ကစားခွင့်ရရန်အတွက် မိမိတို့အသင်းမှာ မသေချာသေးဟု မန်ချက်စတာယူနိုက်တက် အသင်းနည်းပြ လူးဝစ် ဗန်ဂါးလ်က ပြောကြားလိုက်သည်။

ဥရောပ၀င်ခွင့် ရှာဖွေနေသည့် မန်ယူအသင်းမှာ ယမန်နေ့က အက်စတွန်ဗီလာအသင်းအား ၃ ဂိုး ၁ ဂိုးဖြင့် အနိုင်ရခဲ့ပြီးနောက် အဆင့်လေးနေရာတွင်ရှိနေပြီး အဆင့် ၅ မှ လီဗာပူးလ်ကို ၈ မှတ်ဖြတ်ထားနိုင်သည်။ သို့သော်လည်း ဗန်ဂါးလ်ကမူ မိမိတို့အသင်းမှာ ချယ်ဆီး၊ အာဆင်နယ်၊ မန်စီးတီးတို့နှင့် တွေ့ဆုံရန် ရှိနေသောကြောင့် ထိပ်ဆုံး ၄ သင်းစာရင်းဝင်ရန် မသေချာနိုင်သေးဟု ဆိုသည်။

“ထိပ်ဆုံး ၃ သင်းနဲ့ ကျွန်တော်တို့ ကစားရအုံးမှာပါ။ မပြီးဆုံးသေးပါဘူး။ ဒါပေမယ့် တကယ်တော့ ကျွန်တော်တို့ဟာ အမှတ်ကွာဟမှုရှိအောင် လုပ်ထားတာကြောင့် ကျွန်တော်တို့ ရှုံးလည်း ရှုံးသွားနိုင်ပါတယ်။ ကျွန်တော်က ပိုမြင့်မြင့်ကိုပဲ ကြည့်ပါတယ်။ ကျွန်တော်တို့ ပွဲတိုင်းနိုင်ဖို့ လိုပါတယ်။ အရာရာတိုင်းဟာ ဖြစ်နိုင်ပါတယ်” ဟု ဗန်ဂါလ်းက သတင်းထောက်များအား ပြောကြားခဲ့သည်။

ထို့ပြင် လီဗာပူးလ်မှာ မိမိတို့ထက် ၈ မှတ်ကွာနေကြောင်း၊ မိမိတို့မှာလည်း ထိပ်ဆုံးမှ ချယ်ဆီးထက် ၈ မှတ်ကျော် ပြန်ကွာနေကြောင်း သာမန်အားဖြင့် မိမိတို့မှာ ချန်ပီယံမဖြစ်နိုင်သော်လည်း ချယ်ဆီးအား ဖိအားပေးသွားမည်ဖြစ်ကြောင်း ဗန်ဂါးလ်က ထပ်လောင်းပြောကြားခဲ့သည်။

ယမန်နေ့က အက်စတွန်ဗီလာနှင့်ပွဲတွင် ကစားပုံမကောင်းခဲ့သော်လည်း ဟာရဲရား၊ ရူနီတို့၏ ဂိုးများဖြင့် မန်ယူက အနိုင်ရခဲ့ပြီး
ဗန်ဂါးလ်ကမူ လိဂ်ပွဲ ၅ ပွဲဆက် အနိုင်ဖြစ်ခဲ့သည့်အတွက် ကျေနပ်နေသည်။

“ရလဒ်အတွက် ကျွန်တော် ကျေနပ်ပါတယ်။ ကစားပုံက ပိုကောင်းရမယ်ဆိုတာ ကျွန်တော်သိပါတယ်။ ဒါပေမယ့် ကျွန်တော်တို့နိုင်ခဲ့ပြီး ဒါက အရေးပါဆုံး အရာပါပဲ”

Ref: Goal.com