မလေးရှားတွင် ရဟတ်ယာဉ်ပျက်ကျ၍ လူ ၆ ဦး သေဆုံး

ဧပြီ ၅၊ ၂၀၁၅
M-Media

– မလေးရှားနိုင်ငံ ကွာလာလမ်ပူမြို့ ဆင်ခြေဖုံးတွင် ယမန်နေ့က အရပ်ဘက်ရဟတ်ယာဉ်တစ်စင်း ပျက်ကျခဲ့ပြီး ထိပ်တန်းအရာရှိဟောင်းများ အပါအ၀င် လူ ၆ ဦး သေဆုံးခဲ့သည်ဟု မလေးရှား နိုင်ငံပိုင် သတင်းဌာန Bernama က ဖော်ပြခဲ့သည်။

မြို့တောင်ဘက် ကမ်ပုန် ပါစီရ် ဘာရူးတွင် ယမန်နေ့ ညနေ ၄ နာရီ ၅၅ မိနစ်ခန့်က ပျက်ကျခဲ့ခြင်းဖြစ်ပြီး ၀န်ကြီးချုပ် နာဂျစ်ဘ် ရာဇက်ကမူ စုံစမ်းစစ်ဆေးမှုများ ပြုလုပ်ရန် အမိန့်ပေးခဲ့သည်။ သေဆုံးသွားသူများတွင် ၀န်ကြီးချုပ်ရုံး၌ အလုပ်လုပ်ခဲ့ဖူးသူ ဒါတွတ် အဇ်လင် အီလီယက်စ်နှင့် အမေရိကန်ဆိုင်ရာ မလေးရှားသံအမတ်ဟောင်း တန်ဆရီ ဂျမာလွဒ်ဒင် ဂျာရ်ဂျစ်တို့လည်း ပါဝင်ခဲ့သည်။

“အစိုးရ၊ ပါတီနဲ့ နိုင်ငံအတွက် ကြီးမားတဲ့ကူညီမှုပေးခဲ့တဲ့ သူ ၂ ဦးကို ဒီဖြစ်ရပ်ဆိုးမှာ ကျွန်တော်တို့ ဆုံးရှုံးခဲ့ရပါတယ်။ တန်ဆရီ ဂျမာလွဒ်ဒင်ဟာ တော်တော်လေးထူးချွန်တဲ့ ပုဂ္ဂိုလ်ပါ။ အစိုးရ၊ ပါတီနဲ့ နိုင်ငံအတွက်လည်း အများကြီး ပေးဆပ်ခဲ့ပါတယ်။ သူဟာ နိုင်ငံအတွင်းနဲ့ နိုင်ငံပြင်ပမှာလည်း အသိအကျွမ်းတွေ ပေါပါတယ်” ဟု အခင်းဖြစ်ပွားရာနေရာသို့ သွားရောက်ခဲ့သည့် နာဂျစ်ဘ်က သတင်းထောက်များအား ပြောကြားခဲ့သည်။

အခြားသေဆုံးသူများကို မည်သူမည်ဝါဖြစ်ကြောင်း သိရှိရခြင်း မရှိသေးပဲ ဒါတွတ် အဇ်လင် အီလီယက်စ်ကို ၀န်ကြီးချုပ်၏ ကိုယ်ပိုင်အတွင်းရေးမှူးဟု နိုင်ငံပိုင်မီဒီယာက ဖော်ပြခဲ့သော်လည်း နာဂျစ်ဘ်ကမူ အကြီးအကဲတစ်ဦးဟုသာ ပြောကြားခဲ့သည်။

Ref: CNN