ကနေဒါ သတင်းဌာန The Globe and Mail နှင့် ဒေါ်အောင်ဆန်းစုကြည် အင်တာဗျူး

ဧပြီ ၇ ၊ ၂၀၁၅
M-Media

– ကြောက်စရာကောင်းသည့် စစ်အာဏာရှင်ကို အန်တုကာ ဘ၀တစ်ခုလုံးအား အန္တရာယ်ကြားထဲ မြှုပ်နှံခဲ့သည့် ကိုယ်ကျင့်တရားပိုင်းဆိုင်ရာ စံထားလောက်သူ၊ သူမတည်ရှိနေခြင်းကိုက မိမိတို့အား ယုံကြည်မှုကို ပေးစွမ်းနိုင်သူ အဖြစ် နိုဘယ်ငြိမ်းချမ်းရေးကော်မတီ၏ ဥက္ကဌက ချီးကျူးဂုဏ်ပြုခြင်းခံရသူ၊ ဒေါ်အောင်ဆန်းစုကြည်အား “သံမဏိ သစ်ခွပန်း” ဟု ခေါ်သည်။

သို့သော်လည်း ဒေါ်အောင်ဆန်းစုကြည်အနေဖြင့် နှစ်ပေါင်းများစွာကတည်းက ပြောင်းလဲရန်ကြိုးစားနေသည့် တိုင်းပြည်ကြီးအား ဦးဆောင်သူ ဖြစ်လာနိုင်သော ရွေးကောက်ပွဲ ကျင်းပပြုလုပ်မည့်နှစ်ကို ရင်ဆိုင်နေရသည်။ နိုင်ငံ၏ သိမြင်ပိုင်းခြားနိုင်စွမ်းရှိသော သူမ၏ ခန်းကဏ္ဍတို့ မှေးမှိန်စေခြင်းအားဖြင့် မွတ်စလင်များအပေါ် လူ့အခွင့်အရေးချိုးဖောက်မှုများအား ရှုတ်ချရန် ဆန္ဒမရှိမှုကိုလည်း သူမက ဆက်လက်ထိန်းသိမ်းထားသည်။ ထိုသို့ ရှုတ်ချမှု မပြုခြင်းက ပြည်တွင်း၌ နိုင်ငံရေးအရ အန္တရာယ်ကင်းသည့် ရပ်တည်ချက် ဖြစ်သည်။

“ကျွန်မဟာ အမြဲတမ်း နိုင်ငံရေးသမားတစ်ယောက် ဖြစ်ခဲ့တာပါ။ ဘယ်တုန်းကမှလည်း ကျွန်မဟာ ကျင့်ဝတ်ပိုင်းဆိုင်ရာ စံနမူနာဖြစ်တယ် ဒါမှမဟုတ် အဲဒီလိုမျိုး မပြောခဲ့ပါဘူး” ဟု နေပြည်တော်တွင် ပြီးခဲ့သည့် သောကြာနေ့က ပြုလုပ်ခဲ့သော အင်တာဗျူး၌ The Globe and Mail သို့ သူမက ပြောကြားခဲ့သည်။

မြန်မာနိုင်ငံတွင် နိုင်ငံသားအဖြစ် သတ်မှတ်ခြင်းမခံရဘဲ ကုလသမဂ္ဂက ကမ္ဘာပေါ်တွင် ညှင်းပန်းနှိပ်စက်ခြင်း အခံရဆုံးသော လူ့အဖွဲ့အစည်းအဖြစ် သတ်မှတ်ထားသည့် ရိုဟင်ဂျာမွတ်စလင်များအပေါ် မြန်မာနိုင်ငံ၏ ဆက်ဆံမှုကို ထင်ထင်ရှားရှား ငြင်းဆန်မှုပြုရန် သူမက ဆန္ဒမရှိခြင်းအပေါ် မနှစ်မြို့မှုများနှင့်လည်း ရင်ဆိုင်နေရသည်။

အထူးသဖြင့် နိုင်ငံတကာအသိုင်းအ၀ိုင်းတွင် သူမအား စိတ်ပျက်မှုများ မြင့်တက်လာနေပြီး နိုဘယ်ဆုကိုပင် ပြန်ရုပ်သိမ်းရန် ဆော်သြလာကြသည်။ ရိုဟင်ဂျာများမှာ တိုင်းပြည်အတွင်း နှစ်မြို့မှုမရရှိပဲ ၎င်းတို့အား ဘင်္ဂါလီကျူးကျော်သူများဟု အထင်သေးအမြင်သေးဖြင့် သတ်မှတ်မှုများကြောင့် အချို့က သူမမှာ တွက်ချက်၍ရသော နိုင်ငံရေးအတွက် သူမ၏ ဖြောင့်မတ်မှုကို ရောင်းစားနေသည်ဟု စွပ်စွဲကြလေသည်။

ရိုဟင်ဂျာ ၁၄၀၀၀၀ ကျော်မှာ အိုးအိမ်စွန့်ခွာ ထွက်ပြေးခဲ့ရပြီး ဆိုးရွားသော ဒုက္ခသည်စခန်းများ၌ နေထိုင်နေကြရသည်။ မြန်မာနိုင်ငံရှိ အဓိကလူများစုဖြစ်သော ဗုဒ္ဓဘာသာဝင် အနည်းငယ်မှာလည်း အိုးအိမ်များ ဆုံးရှုံးခဲ့သည်။

ဒေါ်စုကြည်ကတော့ အလယ်မှပင်နေဖို့ ကြိုးစားသည်။ “လူအုပ်စု ၂ ခုအကြားမှာ အကြမ်းဖက်မှုတွေ ဖြစ်ပွားခဲ့တဲ့ ရခိုင်ပြည်နယ်မှာ မွတ်စလင်တွေက လူနည်းစုပါ။ ဒါပေမယ့် ဗုဒ္ဓဘာသာဝင်တွေကလည်း ကမ္ဘာမှာ သူတို့ဟာ လူနည်းစုဖြစ်တယ်၊ ကမ္ဘာ့မွတ်စလင်ထုကြီးက ရခိုင်ဗုဒ္ဓဘာသာဝင်တွေကို ဆန့်ကျင်နေကြတယ်လို့ ခံစားနေရပါတယ်။ ဒါကတော့ ယူဆချက်တွေပေါ့လေ။ ဒါပေမယ့် ဒီလိုကိစ္စမျိုးမှာ ယူဆချက်တွေဟာ တကယ့်အချက်အလက်လောက်ကို သက်ရောက်မှုရှိပါတယ်” ဟု နေပြည်တော် လွှတ်တော်ရှိ တရားဥပဒေစိုးမိုးရေးနှင့် တည်ငြိမ်းအေးချမ်းရေး ကော်မတီ၏ အစည်းအဝေးခန်းတွင် သူမက ပြောကြားခဲ့သည်။ သူမမှာ အဆိုပါ ကော်မတီ၏ ဥက္ကဌလည်းဖြစ်သည်။

ထို့ပြင် နှစ်ဘက်လုံးအား ပြစ်တင်ရှုတ်ချခြင်းအားဖြင့် ရလဒ်ကောင်းထွက်လာမည် မဟုတ်ဟု ယုံကြည်သည်ဟုလည်း သူမက ဆိုသည်။

အသက် ၆၉ နှစ်အရွယ် ရှိပြီဖြစ်သည့် ဒေါ်အောင်ဆန်းစုကြည်တစ်ယောက် အရေးပါသည့်ခုနှစ်ကို ကြုံတွေ့နေရပြီး တိုင်းပြည်ဒီမိုကရေစီ ရရှိရေး ကြိုးပမ်းမှုအတွက် ကုန်ဆုံးခဲ့သော သူမဘ၀၏ အရေးကြီးဆုံး ကာလလည်း ဖြစ်သည်။ထို့ပြင် အမျိုးသားဒီမိုကရေစီအဖွဲ့ချုပ်အား ဒုတိယအကြိမ် အနိုင်ရရှိရေးအတွက် သူမက ဦးဆောင်နေသည်။ ၁၉၉၀ ခုနှစ်ရွေးကောက်ပွဲ အပြတ်အသတ်အနိုင်ရမှုကို စစ်တပ်က ပယ်ဖျက်ခဲ့သည်။ အပြစ်အနာအဆာများစွာ ရှိခဲ့သည့် ၂၀၁၀ ခုနှစ် ရွေးကောက်ပွဲတွင်မူ ပါဝင်ခဲ့ခြင်းမရှိ။ သို့သော်လည်း ၂၀၁၂ ခုနှစ် ကြားဖြတ်ရွေးကောက်ပွဲ၌ ၀င်ရောက်ယှဉ်ပြိုင်ရာတွင်တော့ အမတ် ၄၅ နေရာတွင် ၄၃ နေရာ အနိုင်ရရှိခဲ့သည်။ စစ်တပ်က နောက်ထပ် ကြားဝင်လာမှု မရှိပါက လာမည့်အောက်တိုဘာလကုန်ပိုင်း သို့မဟုတ် နိုဝင်ဘာလ အစောပိုင်းတွင် ပြုလုပ်ရန် မျှော်လင့် ထားသည့် ရွေးကောက်ပွဲများက သူမအနေဖြင့် တိုင်းပြည်အား ဦးဆောင်ရန် ပထမဆုံး အခွင့်အရေးပင် ဖြစ်နေသည်။

နိုင်ငံ၏ အခြေခံဥပဒေအရ ဥပဒေပြု လွှတ်တော်အမတ်များက သမ္မကို ရွေးချယ်တင်မြှောက်ကြရသည်။ ခင်ပွန်းဖြစ်သူက ဗြိတိန်နိုင်ငံသားဖြစ်ပြီး သားဖြစ်သူများက ဗြိတိန် နိုင်ငံကူးလက်မှတ် ကိုင်ဆောင်ထားသော ဒေါ်စုကြည်တစ်ယောက် သမ္မတနေရာကို ရရှိရန် အလားအလာမရှိ။ စစ်တပ်မှရေးသော အခြေခံဥပဒေတွင် နိုင်ငံရပ်ခြားသြဇာခံ အိမ်ထောင်ဘက်၊ သို့မဟုတ် သားသမီးများရှိသော မည်သူမဆို သမ္မတဖြစ်ခွင့်မရှိဟု တားမြစ်ထားသောကြောင့်ဖြစ်သည်။ ဖွဲ့စည်းပုံအခြေခံဥပဒေက တပ်မတော်သား ၂၅ ရာခိုင်နှုန်းကိုလည်း လွှတ်တော်၌ ပါဝင်ခွင့်ပေးထားပြီး ပြုပြင်ပြောင်းလဲရေး ကြိုးပမ်းမှုများကို ပိတ်ဆို့ရန် ၎င်းတို့ကို အသုံးချသည်။

ဒေါ်စုကြည်ကတော့ သူမ၏ပါတီ မဲများများရခြင်းက စစ်တပ်ကို ရွေးချယ်စရာ နည်းသွားစေလိမ့်မည်ဟု ပြောကြားခဲ့သည်။

“ပြောင်းလဲမှုတွေ ဆောင်ကျဉ်းလာဖို့ ပြည်သူလူထု အများစုက လုံလောက်တဲ့ စိတ်အားထက်သန်မှုရှိပြီဆိုရင် အပြောင်းအလဲဟာ ဖြစ်လာတော့မှာပါ။ စစ်တပ်အနေနဲ့ တိုင်းပြည်တစ်ခုလုံးရဲ့ အကျိုးကို ခြုံပြီး ကြည့်စေချင်ပါတယ်။ သူတို့လိုချင်တာ၊ ဘယ်အခြေအနေ ဖြစ်သင့်တယ်လို့ သူတို့ထင်တာကိုပဲ မကြည့်စေချင်ပါဘူး” ဟုဆိုပြီး စစ်တပ်မှာ ပြည်သူများ၏ သဘောထားအယူအဆအပေါ် သြဇာမသက်ရောက်နိုင်ဟုလည်း ထည့်သွင်း ပြောကြားခဲ့သည်။

“ပြည်သူတွေက ပြောင်းလဲချင်ရင် ပုံစံတွေလည်း ပြောင်းသွားမှာပါ”

သို့သော်လည်း သူမ၏ သမ္မတဖြစ်ခွင့် တားဆီးခံရသောကြောင့် ပါတီအနေဖြင့် အခြားသူတစ်ဦးကို သမ္မတအဖြစ် တင်မြှောက်ရန် ရွေးချယ်ထားမှု ရှိ၊ မရှိ မေးမြန်းရာ သူမက “ဘယ်အချိန်မှာ ဘာဖြစ်ရင် ကျွန်မတို့ ဘာလုပ်မလဲဆိုတာနဲ့ပတ်သက်ပြီး ထုတ်ပြောမှာ မဟုတ်ပါဘူး။ အဲဒီအချိန်ရောက်လာမှပဲ ပြောမှာပါ” ဟု ဖြေကြားခဲ့သည်။

ဆက်လက်၍ ပြီးခဲ့သည့် ငါးနှစ်အတွင်း ခွင့်ပြုပေးထားသည့် လွတ်လပ်ခွင့်များအပေါ် ပိတ်ပင်ခြင်းဖြင့် အနောက်ပြန်သွားမည့် စိုးရိမ်ဖွယ်ရာလက္ခဏာများကို စစ်တပ်လွှမ်းမိုးသော ခေါင်းဆောင်ပိုင်းက ပြသနေသည့် မြန်မာနိုင်ငံ၏ ပြုပြင်ပြောင်းလဲရေး အခြေအနေကို သူမက အားမရစွာ သုံးသပ်ပြခဲ့သည်။ ပြီးခဲ့သည့် လများအတွင်း အာဏာပိုင်များမှာ နိုင်ငံတော်လျှို့ဝှက်ချက်ဆိုင်ရာ ဥပဒေကို အသုံးချ၍ ဂျာနယ်လစ်များကို အကျဉ်းချခဲ့သည်။ ဘာသာသာသနာ ညှိုးနွှမ်းစေသည့် ဥပဒေများဖြင့် အရက်ဘားပိုင်ရှင်ကို ထောင်ချခဲ့သည်။ ထို့ပြင် ဆန္ဒပြကျောင်းသားများအပေါ် ကြမ်းကြမ်းတမ်းတမ်းကိုင်တွယ်ခဲ့သည်။

“ပြုပြင်ပြောင်းလဲမှုဟာ အစကတည်းက ခိုင်ခိုင်မာဖြစ်မယ်လို့ ကျွန်မ မထင်ပါဘူး။ အခုဆိုရင်တော့ ဒါဟာ ပိုပြီး ထင်ရှားလာတာပေါ့လေ။ ဒါကို နောက်ကြောင်းပြန်လှည့်တာလို့လည်း ခေါ်နိုင်ပါတယ်။ တိုးတက်မှုလို့ ကျွန်မ မထင်ပါဘူး” ဟု ဒေါ်အောင်ဆန်းစုကြည်က ပြောကြားခဲ့သည်။

၂၀၀၇ ခုနှစ်က ကနေဒါမှ ဂုဏ်ပြုခြင်းကို ခံခဲ့ရသည့် ဒေါ်စုကြည်က ဗိုလ်ချုပ်ဟောင်းဖြစ်သော သမ္မတဦးသိန်းစိန်မှာ ယခုနှစ်ရွေးကောက်ပွဲကျင်းပရေး ခွင့်မပြုမည်ကိုလည်း စိုးရိမ်နေသည်။

“ငြိမ်းချမ်းရေးလုပ်ငန်းစဉ်ကို ရွေးကောက်ပွဲထက်အရင် ဦးစားပေးသင့်တယ်လို့  ပြီးခဲ့တဲ့နှစ်က သမ္မတ ဦးသိန်းစိန်က ပြောထားတာကြောင့် ကျွန်မတို့ စိုးရိမ်နေပါတယ်။ ဒါက ဒီငြိမ်းချမ်းရေး လုပ်ငန်းစဉ် အစဉ်ပြေတယ်လို့ သူတို့ထင်မှ ရွေးကောက်ပွဲလုပ်ပေးနိုင်မယ်ဆိုတဲ့ သဘောလား?”

ထို့ပြင် NLD အနိုင်ရရှိခဲ့ပါက အစိုးရနှင့်စစ်တပ်မှာ၂၀၁၅ ရွေးကောက်ပွဲ ရလဒ်များကို အသိမှတ်ပြုနိုင်ပါ့မလားဟု ပြည်သူများ၌ စိုးရိမ်မှုများလည်း ရှိနေသည်ဟု သူမက ထပ်လောင်းပြောကြားခဲ့သည်။

နှစ်ပေါင်း ၆၀ ကျော်ကြာ ဖြစ်ပွားခဲ့သော ပြည်တွင်းစစ်ကို အဆုံးသတ်ရေး လမ်းခင်းပေးနိုင်မည့် အပစ်ရပ်ရေး သဘောတူညီချက်မူကြမ်းကို ယခုတစ်ပတ်အတွင်း လက်မှတ်ရေးထိုးနိုင်ခြင်း အပါအ၀င် မြန်မာအစိုးရမှာ သမိုင်းဝင်အောင်မြင်မှုများ ရရှိရေးအတွက် ကြိုးစားဆောင်ရွက်နေသည်။ သမ္မတ ဦးသိန်းစိန်လက်ထက်တွင် မြန်မာနိုင်ငံမှာ ကမ္ဘာ့အမြန်ဆုံး စီးပွားရေးတိုးတက်မှုအချို့ကိုလည်း တွေ့ကြုံခံစားခဲ့ရသည်။

သို့သော်လည်း ဒေါ်အောင်ဆန်းစုကြည်ကမူ နိုင်ငံရေးပြိုင်ဘက်များ၏ အပစ်ရပ်ရေးသဘောတူညီချက် ပြီးပြည့်စုံခြင်းနှင့် ပတ်သက်၍ ငြင်းဆန်ခဲ့ပြီး အချို့သော အပိုဒ်များကို သဘောမကျဟုလည်း ဆိုသည်။

နိဂုံးချုပ်အနေဖြင့် ဒေါ်အောင်ဆန်းစုကြည်မှာ သူမနှင့် သူမ၏ပါတီအား မြန်မာနိုင်ငံမှ လိုအပ်သော ပြုပြင်ပြောင်းလဲရေးကို ဆောင်ရွက်ပေးမည့် သူများအဖြစ် အဆင့်သတ်မှတ်ခဲ့သည်။

“အစကတည်းက ကျွန်မတို့ဟာ ချစားမှုတိုက်ဖျက်ရေးကို အမြဲတမ်း ဆောင်ရွက်ခဲ့ပါတယ်။ ကျွန်မတို့ဟာ အင်မတန်သန့်ရှင်းတဲ့ ပါတီပါ။ ပါတီကဆင်းရဲပါတယ်။ ဒါပေမယ့် သန့်ရှင်းတယ်။ ဒါဟာ အစိုးရကောင်းဖြစ်ဖို့အတွက် ပထမခြေလှမ်းပါပဲ”

ref: The Globe and Mail
လေးမောင် စုစည်းဘာသာပြန်ဆိုသည်။