လူမည်းတစ်ဦးအား ပစ်သတ်မှုဖြင့် ရဲတပ်ဖွဲ့ဝင်တစ်ဦးကို အမေရိကန် တရားစွဲ

ဧပြီ ၈၊ ၂၀၁၅
M-Media

– အသက် ၅၀ အရွယ် လူမည်းတစ်ဦးကို သေနတ်ဖြင့် ၈ ချက်ပစ်ကာ သစ်ပစ်ခဲ့သည့် ဗီဒီယို ပေါ်ထွက်လာပြီးနောက် အမေရိကန်ပြည်ထောင်စု တောင်ကယ်လီဖိုးနီးယားရှိ လူဖြူရဲတပ်ဖွဲ့ဝင်တစ်ဦးကို တရားစွဲဆိုလိုက်သည်ဟု သိရသည်။

မြောက်ချာလီစတန်မြို့ အုပ်ချုပ်ရေးမှူး ကိသ် ဆမ်မေးက ပြည်နယ် စုံစမ်းစစ်ဆေးရေးမှူးများမှာ ဗီဒီယိုကို ကြည့်ရှုပြီးနောက် ဝေါလ်တာ စကော့အား သတ်ဖြတ်မှုဖြင့် အသက် ၃၃ နှစ်ရွယ် ရဲတပ်ဖွဲ့ဝင် မိုက်ကယ် ဆလာဂါကို တရားစွဲဆိုရန် ဆုံးဖြတ်ခဲ့သည်ဟု ယမန်နေ့တွင် ပြောကြားခဲ့သည်။

ထိုအဖြစ်အပျက်အတွက် FBI နှင့် အမေရိကန်တရားရေးဌာနတို့ကလည်း သီးခြား စုံစမ်းစစ်ဆေးမှုများ ပြုလုပ်နေသည်။

“ခင်ဗျားအမှားလုပ်ရင်၊ ခင်ဗျားမှာတာပဲ။ မကောင်းတဲ့ ဆုံးဖြတ်ချက်တစ်ခု ချပြီဆိုရင်လည်း ခင်ဗျားဟာ ဥပဒေအတွင်းကလူ ဖြစ်ဖြစ် လမ်းပေါ်က သာမန်နိုင်ငံသားတစ်ယောက် ဖြစ်ဖြစ် ကျွန်တော်ဂရုမစိုက်ပါဘူး။ အဲဒီဆုံးဖြတ်ချက်အတိုင်း ခင်ဗျား ခံစားရမှာပါ” ဟု ဆမ်မေးက သတင်းထောက်များအား ပြောကြားခဲ့သည်။

အဆိုပါအဖြစ်အပျက်မှာ ဘရိတ်မီးမလင်းသောကြောင့် စေကာ့၏ကားကို လမ်းဘေးတွင် ရပ်ခိုင်းပြီးနောက် ဖြစ်ပွားခဲ့ခြင်းဖြစ်ပြီး စကော့နှင့် ဆလာဂါတို့အကြား ထိုးကြိတ်မှုများလည်းရှိခဲ့ကာ နောက်ပိုင်းတွင် စကော့က ထွက်ပြေးခဲ့ကြောင်း နယူးယောက်တိုင်းမ်စ် သတင်းစာမှ ဖော်ပြခဲ့သည့် ဗီဒီယိုတွင် တွေ့ရှိရသည်။

အဆိုပါ ဗီဒီယိုမှာ အနီးရှိ လူတစ်ဦးက ရိုက်ကူးထားခြင်းဖြစ်ပြီး စကော့ ထွက်ပြေးသွားသည့်အခါ ရဲတပ်ဖွဲ့ဝင် ဆလာဂါမှာ သေနတ်ဖြတ်ဖြင့် ၈ ချက်ပစ်ခဲ့သည်ကိုလည်း တွေ့ရှိခဲ့ရသည်။ ထို့နောက် စကော့မှာ မျက်ခင်းပြင်ပေါ်သို့ ပစ်ကျသွားခဲ့သည်။

၂၀၀၉ ခုနှစ်တွင် ရဲတပ်ဖွဲ့သို့ဝင်ရောက်ခဲ့သည့် ဆလာဂါက စကော့မှာ ၎င်း၏ မေ့ဆေးသေနတ်ကို လုပြေးသွားခြင်းကြောင့် ပစ်ခတ်ခဲ့ရခြင်းဖြစ်သည်ဟု အခြားသော ရဲတပ်ဖွဲ့ဝင်များသို့ ပြောကြားခဲ့ကြောင်း ရဲတပ်ဖွဲ့၏ အစီရင်ခံစားတွင် ဖော်ပြထားသည်။ သို့သော်လည်း ဗီဒီယိုအရ ဆလာဂါထံမှ စကော့ ပြေးသွားသည့်အချိန်တွင် လက်နက် ကိုင်ဆောင်ထားသည့်ပုံ မရှိချေ။

စကော့လဲကျသွားပြီးနောက် ဆလာဂါမှာ ၎င်း၏အနားသို့သွားကာ လက်ထိပ်ခတ်ခဲ့သည်ကို ဗီဒီယိုတွင် တွေ့မြင်ခဲ့ရသည်။ ထို့နောက် ဆလာဂါမှာ ၎င်းသေနတ်ဖြင့် ပစ်ခဲ့သည့်နေရာသို့ လမ်းလျှောက်လာခဲ့ပြီးနောက် စကော့လဲကျရာနေရာသို့ ပြန်သွားကာ ၎င်း၏အနီး မြေပေါ်သို့ အရာဝတ္ထုတစ်ခုကို ပစ်ချလိုက်သည်ကိုလည်း အဆိုပါ ဗီဒီယိုတွင် မှတ်တမ်းတင်ထားသည်။

စကော့မိသားစု၏ ရှေ့နေဖြစ်သူ ခရစ် စတီးဝပ်ကမူ ယခုသတင်းအတွက် မည်သည့် မှတ်ချက်မှ မပေးခဲ့ပေ။

Ref: Aljazeera