တောင်အာဖရိကန်တွင် နိုင်ငံခြားသားဆန့်ကျင်ရေး အရှိန်မြင့်

ဧပြီ ၁၅၊ ၂၀၁၅
M-Media

– တောင်အာဖရိကတွင် နိုင်ငံခြားသားဆန့်ကျင်ရေး လှုပ်ရှားမှုများမှာ အရှိန်မြင့်လာပြီး ယမန်နေ့က ဒါဘန်မြို့တွင် နိုင်ငံခြားသားဆန့်ကျင်ရေး ဆန္ဒပြမှုများ ပြုလုပ်ခဲ့ကာ တိုက်ခိုက်ဖျက်ဆီးမှုများလည်း ဖြစ်ပွားခဲ့ပြီး ရဲတပ်ဖွဲ့ဝင်များက ရာဘာကျည်ဆံများဖြင့် ပစ်ခတ်ကာ လူစုခွဲခဲ့ရသည်ဟု ဒေသတွင်း မီဒီယာများက ဖော်ပြခဲ့သည်။

ဒါဘန်မြို့ ပတ်ဝန်းကျင်တွင် ပြီးခဲ့သည့် သီတင်းပတ်များက နိုင်ငံခြားသားဆန့်ကျင်ရေး တိုက်ခိုက်မှုများ ဖြစ်ပွားခဲ့ပြီး လူ ၄ ဦးသေဆုံးခဲ့ပြီးနောက် ယခုအခါ မြို့ထဲအထိ ကူးစက်လာခဲ့ခြင်း ဖြစ်သည်။

ဆန္ဒပြမှုများကို ပြောင်းရွှေ့အခြေချသူများနှင့် ဒေသခံများ နှစ်ဘက်စလုံးက ပြုလုပ်ခဲ့ကြပြီး အချို့မှာ ပုဆိန်များ၊ တောခုတ်ဓားများပင် ကိုင်ဆောင်ဝှေ့ယမ်းခဲ့ကြသည်။ တောင်အာဖရိက၏ အိန္ဒိယသမုဒ္ဒရာကမ်းရိုးတမ်း အဓိကကျသည့် ဆိပ်ကမ်းမြို့ဖြစ်သော ဒါဘန်မြို့ရှိ နိုင်ငံခြားသားပိုင် ဆိုင်တစ်ဆိုင်မှာလည်း ဆန္ဒပြမှုအတွင်း လုယက်ဖျက်ဆီး ခံခဲ့ရသည်။

“လူသားထုတစ်ခုလုံးအတွက် ဒီသတင်းစကားကို ကျွန်တော်တို့ပေးချင်ပါတယ်။ တောင်အာဖရိက က လူမည်းတွေဟာ အရှင်လတ်လတ် မီးရှို့ခံနေရတယ် ဆိုတာပါပဲ” ဟု ဘူရန်ဒီနိုင်ငံမှ ပြောင်းရွှေ့ကာ ဒါဘန်တွင်နေထိုင်သည့် ဟာကီဇီမာနာက ပြောကြားခဲ့သည်။

ဒါဘန်မြို့တစ်ဝှမ်းတွင် ဆန္ဒပြသည့် အုပ်စုများမှာ ပြန့်ကြဲနေခဲ့ပြီး၊ ဒါဘန်မြို့တည်ရှိရှာ ကွာဇူလူနာတယ် ပြည်နယ် အုပ်ချုပ်ရေးမှူး ဆန်ဇို မက်ဟူနူက ပြည်နယ်အတွင်း ရဲတပ်ဖွဲ့ဝင်များကို ထပ်တိုးချထားခဲ့သည်ဟု ပြောကြားခဲ့သည်။

နိုင်ငံအတွင်း အလုပ်လက်မဲ့ဖြစ်မှု အပါအ၀င် ပြဿနာများစွာကြောင့် တောင်အာဖရိက ပြည်သူများအကြား နိုင်ငံခြားသား ဆန့်ကျင်ရေးလှုပ်ရှားမှုများ မြင့်တက်လာခြင်းဖြစ်ပြီး ၂၀၀၈ ခုနှစ်က ထိုကဲ့သို့ နိုင်ငံခြားသားဆန့်ကျင်ရေး တိုက်ခိုက်မှုများအတွင်း နိုင်ငံခြားသား ၆၀ ကျော် သေဆုံးခဲ့သည်။

တောင်အာဖရိက၏ အလုပ်လက်မဲ့နှုန်းမှာ တရားဝင် စာရင်းများအရ ၂၅ ရာခိုင်နှုန်းရှိသည်ဟု ထုတ်ပြန်ထားသော်လည်း ထိုထက်ပိုများမည်ဟု ယုံကြည်နေကြသည်။

Ref: Reuters