ဖိလစ်ပိုင်၏ ပထမဆုံး ဟာလာလ် အသားထုတ်စက်ရုံ မကြာမီ လည်ပတ်တော့မည်

ဧပြီ ၁၆၊ ၂၀၁၅
M-Media

– နိုင်ငံအတွင်းရှိ မွတ်စလင်များ ဟာလာလ်အသားများကို လွယ်ကူစွာ ၀ယ်ယူစားသုံးနိုင်ရန်နှင့် အိမ်နီးချင်းနိုင်ငံများအား ဟာလာလ်အသားများ တင်ပို့နိုင်ရန်အတွက် နိုင်ငံ၏ ပထမဆုံး ဟာလာလ်နည်းကျ အသားများ ထုတ်လုပ်ပေးသော စက်ရုံကို ဖိလစ်ပိုင်အစိုးရက တည်ဆောက်ပေးခဲ့ပြီး မကြာမီ လည်ပတ်တော့မည်ဟု သိရသည်။

“BIMP-EAGA (ဘရူးနိုင်း၊ အင်ဒိုနီးရှား၊ မလေးရှား၊ ဖိလစ်ပိုင်- အာဆီယံအရှေ့ပိုင်း ဖွံ့ဖြိုးရေး ဧရိယာ) ကို အသားတွေ တင်ပို့နိုင်တဲ့ အလားအလာကောင်းတွေ ရှိနေပါတယ်။ ဒါ့ကြောင့် ဒီစက်ရုံတည်ထောင်မှုမှာ ပါဝင်သူတွေအနေနဲ့ ဟာလာလ်အသား ထုတ်လုပ်ရေးနဲ့ပတ်သက်တဲ့ လမ်းညွှန်ချက်တွေကို ဆွေးနွေးပြဌာန်းကြဖို့ ကျွန်တော်တို့ တိုက်တွန်းပါတယ်” ဟု ဖိလစ်ပိုင် လယ်ယာစိုက်ပျိုးရေးဌာန DA မှ အတွင်းရေးမှူး ပရိုဆက်ဆို အလ်ကာလာက Philippines Information Agency သို့ ဧပြီ ၁၄ ရက်နေ့တွင် ပြောကြားခဲ့သည်။

အဆိုပါ စက်ရုံမှာ နိုင်ငံတောင်ပိုင်း မင်ဒါနာအိုပြည်နယ်ရှိ ကိုတာဘာတိုမြို့တွင် တည်ရှိပြီး တစ်နာရီတွင် ကျွဲနွား ၁၅ ကောင်၊ ရေကျွဲ ၁၀ ကောင်၊ ဆိတ် အကောင် ၄၀ တို့ကို လှီးဖြတ်ကာ အသားများ ထုတ်ပေးနိုင်မည် ဖြစ်သည်။ အဆိုပါ စက်ရုံကို DA ၏ ဖွံ့ဖြိုးတိုးတက်ရေး အစီအစဉ်မှ ရန်ပုံငွေမတည်ကာ တည်ဆောက်ပေးခဲ့ခြင်းဖြစ်ပြီး ကိုတာဘာအို၊ မင်ဒါနာအို အလယ်ပိုင်းနှင့် အခြားသော ဒေသများရှိ မွတ်စလင်နှင့် မွတ်စလင်မဟုတ်သူများအတွက်ပါ အသားများ ထောက်ပံ့ပေးနိုင်မည်ဖြစ်သည်။

အလ်ကာလာ က DA ၏ ၂၀၁၆ ခုနှစ် ဘက်ဂျက်အတွင်း စီမံကိန်းသစ်အဖြစ် ပါဝင်သော အသားထုတ်လုပ်ရေးဆိုင်ရာ လမ်းပြမြေပုံနှင့်အညီ အကောင်အထည်ဖော်ခြင်းအား စစ်ဆေးရန်အတွက်လည်း အထူးအဖွဲ့တစ်ခု ထားရှိသွားမည်ဟု တည်ပြုခဲ့သည်။ မွတ်စလင်လူ့အဖွဲ့အစည်း၏ လိုအပ်ချက်များကို ဖြည့်ဆည်းပေးခြင်းအားဖြင့် အလ်ကာလာမှာ ကိုတာဘာတိုမြို့ရှိ တိရိစ္ဆာန်ကုဆရာဝန်များ တောင်းဆိုသော ဟာလာလ် ကြက်၊ ဘဲ မွေးမြူရေးစီမံကိန်း ဖော်ဆောင်ပေးရေးကိုလည်း ထောက်ခံသည်ဟု ပြောဆိုခဲ့သည်။

“ဒီလိုဆောင်ရွက်မှုတွေကတစ်ဆင့် အစိုးရဟာ မင်ဒါနာအိုပြည်နယ်မှာ ကြာရှည်ခံမယ့် ငြိမ်းချမ်းရေး မြှင့်တင်ပေးမှုအတွက် စိတ်စေတနာရှိတယ်ဆိုတာကို ကျွန်တော်တို့ ပြသချင်ပါတယ်။ ဒီက ကျွန်တော်တို့ရဲ့ ညီနောင်တွေကို သေနတ်တွေအစား၊ စိုက်ပျိုးမွေးမြူရေးပစ္စည်းတွေ ကိုင်တာကိုပဲ မြင်ချင်ပါတယ်” ဟု အလ်ကာလာက ထည့်သွင်းပြောကြားခဲ့သည်။

“ဟာလာလ်” ဆိုသည်မှာ အာရဘီစကားလုံးဖြစ်ပြီး “ခွင့်ပြုထားသောအရာ”ဟု အဓိပ္ပါယ်ရကာ များသောအားဖြင့် အစားအသောက်များတွင် သတ်မှတ်သည်။ မွတ်စလင်များမှာ အစ္စလာမ်က စားသုံးရန် ခွင့်ပြုထားသော တရိစ္ဆာန်များအား ဟာလာလ်နည်းကျ လှီးဖြတ်ကာ ထုတ်ယူထားသော အသားများကိုသာ စားသုံးရသည်။ အခြားသော အစားသောက်များတွင်လည်း သန့်ပြန်ပြီး၊ ရောဂါပိုးကင်းရှင်းစေရန် ဆောင်ရွက်ရပြီး ထိုသို့ ဆောင်ရွက်ခြင်းကိုလည်း ဟာလာလ်နည်းကျ စီမံထားသည်ဟု ခေါ်ဆိုသည်။

ထို့ပြင် စီးပွားရေး၊ လူမှုရေးနှင့် အခြားသောလုပ်ငန်းဆောင်တာများတွင်လည်း ရုပ်ပိုင်းဆိုင်ရာနှင့် နာမ်ပိုင်းဆိုင်ရာ ညစ်ညမ်းစွန်းထင်းမှုမှ ကင်းစင်သော နည်းလမ်းများဖြင့် လုပ်ကိုင်ဆောင်ရွက်ကာ မိမိတို့၏ အသက်တာကို မွေးမြူကြရန် အစ္စလာမ်က တိုက်တွန်းထားသည်။ ထို နည်းလမ်းများကိုလည်း ဟာလာလ်နည်းလမ်းများဟု ခေါ်ပြီး အစ္စလာမ့်ရေးရာ ကျမ်းစာများတွင် အသေးစိတ် သတ်မှတ်ပြဌာန်းထားသည်။

Ref: Onislam