မိုဒီ၏ လယ်ယာဥပဒေကို အိန္ဒိယလယ်သမားများ ဆန္ဒပြ

ဧပြီ ၁၉၊ ၂၀၁၅
M-Media

– မြေယာဝယ်ယူခွင့် ဥပဒေများအား ပြင်ဆင်ထားသည့် သမ္မတမိုဒီ၏ ဥပေဒမူကြမ်းများကို ဆန့်ကျင်သောအားဖြင့် အတိုက်အခံခေါင်ေးဆာင် ရာဟူးလ် ဂန္ဒီဦးဆောင်သည့် လယ်သမားများမှာ ယနေ့တွင် နယူးဒေလီ၌ ဆန္ဒပြခဲ့ကြသည်ဟု သိရသည်။

အဆိုပါ ဆန္ဒပြမှုကို ကွန်ဂရက်ပါတီမှ ဦးဆောင်ပြုလုပ်ခဲ့ခြင်းဖြစ်ပြီး ပါတီခေါင်းဆောင် ဂန္ဒီက မိုဒီမှာ ရုန်းကန်နေရသည့် လယ်သမားများ၏ ကုန်ကျမှုဖြင့် စီးပွားရေးလုပ်ငန်းရှင်ကြီးများကို ကျေးဇူးပြုနေသည်ဟု စွပ်စွဲခဲ့သည်။

“လယ်သမားတွေဟာ အကူအညီမဲ့ကာ သူတို့ရဲ့ လယ်တွေကို ထိုးရောင်းလာတဲ့ အဲဒီလို ပုံစံမျိုးတွေဖြစ်ပြီး လယ်သမားတွေ အားနည်းသွားတာမျိုး မိုဒီအစိုးရက ဖြစ်စေချင်နေပါတယ်” ဟု ဂန္ဒီက ဆန္ဒပြသူများအား ပြောကြားခဲ့သည်။

အ၀တ်ဖြူများဝင်ဆင်ကာ ကွန်ဂရက်ပါတီ၏ အလံများကိုဝှေ့ယမ်းခဲ့ကြသည့် ထောင်ပေါင်းများစွာသော လယ်သမားများမှာ မိုဒီ၏ မူကြမ်းကို ဆန့်ကျင်ရေး ချီတက်ဆန္ဒပြမှုများ ပြုလုပ်ရန် မြို့တော်ဒေလီသို့ ရောက်ရှိလာခဲ့ကြသည်။ အဆိုပါ မူကြမ်းက စီးပွားရေးသမားများ လယ်ယာမြေများကို ၀ယ်ယူရန် ပိုမိုလွယ်ကူအောင် ပြုလုပ်ပေးထားသည်။

အဆိုပါဆန္ဒပြမှု မလုပ်ခင်လေးတွင် မိုဒီက ၎င်း၏ ထိုမူကြမ်းမှာ ငွေကြေးဖောင်းပွမှု မြင့်မားခြင်းကို နိမ့်ကျစေရေး အပါအ၀င် အိန္ဒိယရှိ သန်းဆယ်နှင့်ချီသော ဆင်းရဲသားများအား ကူညီရန်ဆောင်ရွက်ရန်ဖြစ်သည်ဟု ကာကွယ်ပြောကြားခဲ့သည်။

နိုင်ငံ၏ စီးပွားရေးအား ပြုပြင်ပြောင်းလဲမည်ဟူသော ကတိက၀တ်ဖြင့် ပြီးခဲ့သည့်နှစ် ရွေးကောက်ပွဲတွင် အာဏာရခဲ့သည့် မိုဒီက စက်ရုံများ၊ စက်မှုဇုန်များနှင့် အခြားသော ဖွံ့ဖြိုးရေး စီမံကိန်းများအတွက် မြေယာဝယ်ယူမှုကို အဆင်ချောစေရေး လိုအပ်သည့် ဥပဒေဖြစ်သည်ဟု ထည့်သွင်းပြောကြားခဲ့သည်။

သို့သော်လည်း ထိုဆောင်ရွက်မှုက ကျေးလက်ဒေသရှိ တောင်သူလယ်သမားများကို ဒေါသထွက်စေပြီး ထို ဥပဒေမှာ စီးပွားရေးလုပ်ငန်းရှင်ကြီးများကို မျက်နှာသာပေးကာ မိုဒီ၏ BJP ပါတီအား ရွေးကောက်ပွဲတွင် မဲပေးခဲ့ကြသော အကြွေးဖြင့် နစ်နေသည့် လယ်သမားများအတွက် ပို၍ဆိုးရွားစေသည်ဟု ရှုမြင်ကြသည်။ အိန္ဒိယရှိ လယ်သမားအမျာစုမှာ ရာသီချိန်မဟုတ်သော မိုးရွာသွန်းမှုကြောင့် ဆောင်းရာသီ သီးနှံများ ပျက်ဆီးမှုနှင့်လည်း ကြုံတွေ့ထားရသည်။

Ref: Channelnewsasia