အီတလီသို့ ပြန်လိုစိတ်မရှိဟု အန်ဆယ်လော့တီပြော

ဧပြီ ၂၁၊ ၂၀၁၅
M-Media

– အီတလီရှိ ဦးနှောက်မရှိသော ပရိတ်သတ်များနှင့် လူမရှိသော ဘောလုံးကွင်းများကြောင့် မိမိအနေဖြင့် စီးရီးအေသို့ ပြန်သွားရန် စိတ်ဝင်စားမှုမရှိဟု ရီးယဲလ်နည်းပြ အန်ဆယ်လော့တီက ပြောကြားလိုက်သည်။

အသက် ၅၅ နှစ်အရွယ် ရှိပြီဖြစ်သည့် အန်ဆယ်လော့တီမှာ အေစီမီလန်တွင် ၈ နှစ်ကြာ တာဝန်ယူခဲ့ပြီး ချန်ပီယံလိဂ် ၂ ကြိမ်နှင့် စီးရီးအေဖလားတစ်ကြိမ် ရယူပေးနိုင်ခဲ့ပြီးနောက် ၂၀၀၉ ခုနှစ်က ၎င်း၏ မွေးရပ်မြေ အီတလီကို စွန့်ခွာ၍ ချယ်ဆီးအသင်းသို့ ပြောင်းရွှေ့ကိုင်တွယ်ခဲ့သည်။

ထို့နောက် ချယ်ဆီးမှတစ်ဆင့် ပီအက်စ်ဂျီ၊ ထိုမှတစ်ဆင့် ရီးယဲလ်မက်ဒရစ်သို့ ပြောင်းလဲကိုင်တွယ်ခဲ့သည်။

အန်ဆယ်လော့တီမှာ အမြဲတမ်းလိုလိုပင် အီတလီ ထိပ်တန်းကလပ်များ၏ ကမ်းလှမ်းမှု၊ အီတလီ လက်ရွေးစင်အသင်းတို့၏ ကမ်းလှမ်းမှုများကို ခံခဲ့ရသည်။ သို့သော်လည်း ၎င်းက အိမ်ပြန်ချင်စိတ် မရှိဟု ဆိုသည်။

“ကျွန်တော်အီတလီက ထွက်မလာခင်တုန်းက အကြောင်းအရာတွေအများကြီး တွေးခဲ့ပါတယ်။ အဲဒါ မလွယ်ပါဘူး။ ဒါပေမယ့် နိုင်ငံခြားမှာက သက်တောင့်သက်သာဖြစ်တယ်လို့ ကျွန်တော် ခံစားရပါတယ်။ ကျွန်တော် ပြန်သွားမှာမဟုတ်ပါဘူး။ အီတလီဘောလုံးလောက က တော်တော်လေး အပြိုင်အဆိုင်ရှိပါတယ်။ ဒါပေမယ့် ပြဿနာက ပတ်ဝန်းကျင်ပါ။ အခြားနိုင်ငံတွေနဲ့ယှဉ်ရင် ဘောလုံးကွင်းတွေမှာ လူမရှိဘဲ တိုက်ခိုက်မှုတွေကလည်း အခြားနေရာတွေထက် အီတလီမှာ ပိုဖြစ်ပါတယ်” ဟု အန်ဆယ်လော့တီက Radio Rai သို့ ပြောကြားခဲ့သည်။

ထို့ပြင် ကာဂလီယာရီ၊ ရိုးမားနှင့် ဗာရီဆီအသင်းတို့၏ ပွဲများတွင် ဖြစ်ပွားခဲ့သည့် ရုန်းရင်းဆန်ခတ်မှုများကို ထောက်ပြခဲ့ပြီး ကစားသမားများမှာ ဦးနှောက်မရှိသော ပရိတ်သတ်များ၏ ဓားစားခံများ ထပ်ဖြစ်၍ မရတော့ကြောင်း ထည့်သွင်းပြောကြားခဲ့သည်။

အီတလီနည်းပြ ကွန်တီ၏ အခြေအနေမှာ မတည်မငြိမ်ဖြစ်နေပြီး မကြာမီ အန်ဆယ်လော့တီမှာ အီတလီနည်းပြ ဖြစ်တော့မည်ဆိုသည့် သတင်းကိုလည်း ၎င်းက ငြင်းဆိုခဲ့သည်။

Ref: Goal.com