သမ္မတကို သရက်သီးဖြင့်ပေါက်သည့် ဗင်နီဇွဲလားအမျိုးသမီးတစ်ဦး အိမ်တစ်လုံးရ

ဧပြီ ၂၅၊ ၂၀၁၅
M-Media

– နေစရာအခက်အခဲဖြစ်သည်ကို မကျေနပ်၍ ဗင်နီဇွဲလားသမ္မတ နီကိုလက်စ်မာဒူရို၏ ခေါင်းအား သရက်သီးဖြင့် ပစ်ပေါက်ခဲ့သည့် အမျိုးသမီးတစ်ဦးကို အစိုးရက အိမ်တစ်လုံးပေးအပ်ခဲ့သည်ဟု သိရသည်။

အသက် ၅၂ နှစ်အရွယ်ရှိ မာဒူရိုမှာ နိုင်ငံအလယ်ပိုင်း အာရာဂွါပြည်နယ်တွင် ပြီးခဲ့သည့်တစ်ပတ်က ကားဖြင့် ခရီးသွားနေစဉ် ၎င်းအား ကြိဆိုနေသော လူအုပ်မှ မာလီနီ အိုလီဗိုဆိုသည့် အမျိုးသမီးက ၎င်း၏ အမည်နှင့် ဖုန်းနံပါတ်ကို စာရွက်ပေါ်တွင်ရေး၍ သရက်သီးတွင်ပတ်ကာ မာဒူရိုအား ပစ်ပေါက်ခဲ့ခြင်းဖြစ်သည်။

“တစ်ကယ်လို့ဖြစ်နိုင်ရင် ကျွန်မကို ဖုန်းခေါ်ပါ” လို့ ရေးထားပါတယ်” ဟု ထိုအဖြစ်အပျက်ကို သိရှိသည့် ဘက်စ်ကားမောင်းသမား တစ်ဦးက သရက်သီးကိုပြကာ ရုပ်သံဌာနသို့ ပြောကြားခဲ့သည်။

“မာလီနီ အိုလီဗိုဟာ သူ့ရဲ့ အိမ်နဲ့ပတ်သက်ပြီး ပြဿနာရှိနေပါတယ်။ (တာဝန်ရှိသူတွေက) သူ့ကို ဖုန်းခေါ်ပါတယ်။ သူမဟာ ကြောက်နေပြီး ဒါဟာ တကယ်ဆိုတာ ယုံတောင်မယုံနိုင်ခဲ့ပါဘူး။ “မာလီနီရေ ဗင်နီဇွဲလား အိမ်ရာစီမံကိန်းကြီးရဲ့ အစိတ်အပိုင်းအဖြစ် ခင်ဗျားအတွက် အိမ်တစ်ခန်း ပေးလိုက်ပါတယ်” (လို့ သမ္မတက ပြောပါတယ်)” ဟု အဆိုပါ ဘတ်စ်ကားဆရာက ထပ်လောင်းပြောကြားခဲ့ကာ သမ္မတက ထိုသရက်သီးကို စားမည်ဟုလည်း ကတိပေးခဲ့သည်ဟု ဆိုသည်။

အဆိုပါ သတင်းက ဗင်နီဇွဲလား ဆိုရှယ်မီဒီယာတစ်ဝှမ်းတွင် ပြန့်နှံ့သွားခဲ့ပြီး အရွှန်းဖောက်ပြောဆိုမှုများလည်း ရှိခဲ့သည်။

“သရက်သီးတစ်လုံးအတွက် တိုက်ခန်းတစ်ခန်းရတယ်ဆိုရင် ခင်ဗျားတို့ဘာလုပ်ရမလဲဆိုတာ သိတယ်မှတ်လား။ သူ့ကို နာနတ်သီးနဲ့သာ ပစ်ပေါက်ဗျာ” ဟု ဒေါ်လာမှောင်ခိုအရောင်းအ၀ယ်လုပ်ပြီး မာဒူရိုအား ဆန့်ကျင်သည့် Dolar Today ၀ဘ်ဆိုက်တွင် ရေးသားထားသည်။

၂၀၁၃ ခုနှစ်က ကွယ်လွန်သွားခဲ့သည့် ခေါင်းဆောင်ဟောင်း ဟူဂိုချားဗက်ဇ်ကဲ့သို့ပင် မာဒူရိုမှာ ၎င်း၏ ခရီးစဉ်များတွင် ပြည်သူများထံမှ အသနားခံများကို လက်ခံယူဆောင်လေ့ရှိသည်။ ထိုအလေ့အကျင့်ကြောင့် ဆင်းရဲသားပြည်သူများက ကြိုက်နှစ်သက်ကြသော်လည်း ဝေဖန်သူများက ကြိုက်နှစ်သက်ခြင်းမရှိပေ။

ချားဗက်ဇ်ကဲ့သို့ပင် မာဒူရိုမှာလည်း ၀င်ငွေနိမ့်ပါးသည့် ပြည်သူများအား အိမ်များ၊ အိမ်သုံးပစ္စည်းများ သို့မဟုတ် ပင်စင်ငွေများကို ပုဂ္ဂိုလ်ရေးအရ မကြာခဏ ပေးအပ်မှုများရှိသည်။ သို့သော်လည်း မာဒူရိုမှာ အာဏာရပြီးနောက်ပိုင်း တစ်ဖြည်းဖြည်းဖြင့် လူကြိုက်နည်းလာကြသည်။

Ref: Reuters