ချန်ပီယံလိဂ်ထက် စီးရီးအေကိုသာ အာရုံပိုထားသည်ဟု ဂျူဗင်တပ်စ်နည်းပြ ပြော

ဧပြီ ၂၈၊ ၂၀၁၅
M-Media

– မိမိတို့အသင်းအနေဖြင့် ချန်ပီယံလိဂ်ဆီမီး ရီးယဲလ်နှင့်ပွဲအတွက် စဉ်းစားမည်မဟုတ်ဘဲ စီးရီးအေပြီးဆုံးရေးကိုသာ အာရုံစိုက်သွားမည်ဟု ဂျူဗင်တပ်စ်နည်းပြ မက်ဆီမီလီယာနို အယ်လီဂရီက ပြောကြားလိုက်သည်။

စီးရီးအေလက်ရှိချန်ပီယံ ဂျူဗင်တပ်စ်မှာ ပြိုင်ပွဲပြီးဆုံးရန် ၆ ပွဲလိုသေးချိန်တွင် ဒုတိယနေရာမှ လာဇီယိုအသင်းအား ၁၄ မှတ်ဖြတ်ထားပြီး လေးနှစ်ဆက်တိုက် စီးရီးအေချန်ပီယံဖြစ်ရေး နီးစပ်နေသည်။ ပြီးခဲ့သည့်တစ်ပတ်က တိုရီနိုနှင့် ကစားသည့်ပွဲတွင် ဂျူဗင်တပ်စ်မှာ ၂ ဂိုး ၁ ဂိုးဖြင့် ရှုံးနိမ့်ခဲ့သော်လည်း အယ်လီဂရီကမူ အသင်း၏ စွမ်းဆောင်မှုအတွက် ပီတိဖြစ်မိသည်ဟုဆိုပြီး ရီးယဲလ်မက်ဒရစ်ဘက်သို့
အာရုံမလှည့်ခင် စီးရီးအေ ဖလားအတွက် ခြေတစ်လှမ်း ပိုနီးချင်သည်ဟု ဆိုသည်။

“ရီးယဲလ်အကြောင်းကို ကျွန်တော်တို့ မစဉ်းစားသေးပါဘူး။ ဖီအိုရင်တီးနားနဲ့ပွဲအတွက် တတ်နိုင်သလောက် အကောင်းဆုံးဖြစ်အောင် ပြင်ဆင်ရပါမယ်။ အဲဒီပွဲက ခက်ခဲမှာပါ။ ဒါပေမယ့် ကျွန်တော်တို့ ၃ မှတ်လိုချင်ပါတယ်။ ဒါဆိုရင် ချန်ပီယံဖြစ်ဖို့ တစ်ပွဲသာ လိုတော့မှာပါ” ဟု အယ်လီဂရီက သတင်းထောက်များအား ပြောကြားခဲ့သည်။

ဖီအိုရင်တီးနားအသင်းမှာ ၃ ပွဲဆက်တိုက် ရှုံးနိမ့်ထားပြီး အယ်လီဂရီကမူ ဖီအိုရင်တီးနားမှာ စီးရီးအေနှင့် ဥရောပတို့တွင် ကောင်းနေကြောင်း သို့သော်လည်း မိမိတို့မှာ ကိုယ့်အကြောင်းကိုသာ စဉ်းစားဖို့လိုပြီး လိုအပ်နေသည့် ၄ မှတ်ကို မြန်မြန်ယူရမည်ဖြစ်ကြောင်း ထည့်သွင်းပြောကြားခဲ့သည်။

Ref: Goal.com