ဒုတိယကမ္ဘာစစ်အတွင်း လုပ်ရပ်များအတွက် ဂျပန်တောင်းပန်

ဧပြီ ၃၀၊ ၂၀၁၅
M-Media

– အမေရိကန် ကွန်ဂရက်တွင် ပြောကြားသည့်မိန့်ခွန်း၌ ဂျပန်ဝန်ကြီးချုပ် ရှင်ဇိုအာဘေးက ဒုတိယကမ္ဘာစစ်အတွင်း ဂျပန်၏ အခန်းကဏ္ဍနှင့်ပတ်သက်၍ တောင်းပန်လိုက်ပြီး အလွန်အမင်း နောင်တရမိသည်ဟု ပြောကြားခဲ့သည်။

အရေးပါသည့် ပစိဖိတ်ကုန်သွယ်ရေး သဘောတူညီချက်အတွက် အိုဘားမားနှင့် ဆောင်ရွက်နေသည့် ရှင်ဇိုအာဘေးမှာ ယမန်နေ့က မိန့်ခွန်းပြောကြားခဲ့ခြင်းဖြစ်ပြီး စစ်အတွင်း ဂျပန်နိုင်ငံ၏ ကျူးလွန်မှုများကိုလည်း ၀န်ခံခဲ့သည်။

“ဂျပန်နိုင်ငံနဲ့ ဂျပန်ပြည်သူတွေရဲ့ ကိုယ်စား ကျွန်တော်ဟာ လေးစားသမှုနဲ့အတူ ဒုတိယကမ္ဘာစစ်အတွင်း ဆုံးရှုံးခဲ့ရတဲ့ အမေရိကန်ပြည်သူတွေရဲ့ အသက်တွေအတွက် အဆုံးအစမရှိ ၀မ်းနည်းမိကြောင်း ကျွန်တော် ပြောလိုပါတယ်။ သမိုင်းကတော့ ဆိုးပါတယ်။ ဒါပေမယ့် ဖြစ်ပြီးခဲ့တာတွေကိုတော့ ပြန်ပြင်လို့ မရတော့ပါဘူး” ဟု အာဘေးက ပြောကြားခဲ့သည်။

ထို့ပြင် ဂျပန်၏ လုပ်ရပ်များကြောင့် အာရှဒေသတွင်းရှိ အခြားသော နိုင်ငံများ၏ ခံစားရမှုများကိုလည်း အာဘေးက အသိအမှတ်ပြုခဲ့သည်။ သို့သော်လည်း စစ်အတွင်း အာရှနိုင်ငံများမှ အမျိုးသမီး ၂ သိန်းခန့်ကို ဂျပန်စစ်သားများအတွက် လိင်ကျွန်အဖြစ် အသုံးပြုနှင့်ပတ်သက်၍ ထင်ထင်ရှားရှားပြောဆိုတောင်းပန်မှုများ ပြုလုပ်ရန် အများက မျှော်လင့်ထားကြသော်လည်း အာဘေးက ထည့်သွင်းပြောကြားခဲ့ခြင်း မရှိချေ။

မိန့်ခွန်းမပြောကြားမီအလျင် ရှင်ဇိုအာဘေးမှာ ၀ါရှင်တန်ရှိ ဒုတိယကမ္ဘာစစ် အောက်မေ့ဖွယ် အဆောက်အဦးသို့ သွားရောက်ကာ လွမ်းသူ့ပန်းခွေချခဲ့ပြီး၊ သေဆုံးသွားသူများအတွက် နောင်တများဖြင့် ဆုတောင်းပေးခဲ့သည်ဟု ၎င်းက မိန့်ခွန်းတွင် ထည့်သွင်းပြောကြားခဲ့သည်။ အချို့သော စစ်ပြန်များကမူ အာဘေးမှာ စစ်အတွင်း ဂျပ၏ လုပ်ရပ်များနှင့်ပတ်သက်၍ လုံလုံလောက်လောက် ၀န်ခံခဲ့ခြင်းမရှိဟု ဆိုသည်။

စစ်အတွင်း ဂျပန်စစ်သားများ၏ လိင်ကျွန်ပြုမှုကို ခံခဲ့ရသည့် အသက် ၈၄ နှစ်အရွယ် ကိုရီးယားအမျိုးသမီး လီ ယွန် ဆူးကလည်း အဆိုပါ မိန့်ခွန်းအား တက်ရောက်နားထောင်ခဲ့သည်။

ကွန်ဂရက်တွင် အာဘေးအား မိန်းခွန်းပြောကြားခိုင်းခြင်းမှာ အမေရိကန်နှင့် အာရှပစိဖိတ်နိုင်ငံ စုစုပေါင်း ၁၂ နိုင်ငံပါဝင်မည့် ကုန်သွယ်ရေးသဘောတူညီချက်အတွက် အိုဘားမား၏ သဘောထားက ဒီမိုကရက်တစ် အမတ်များအပေါ် လွှမ်းမိုးရန် ရည်ရွယ်ခြင်းဖြစ်သည်။ ဒီမိုကရက်တစ်များကမူ အဆိုပါ သဘောတူညီချက်မှာ အမေရိကန်ရှိ အလုပ်ကိုင်အခြေအနေကို ဆိုးရွားနိုင်သည်ဟုဆိုကာ ဆန့်ကျင်နေကြသည်။

အာဘေး၏ အမေရိကန်ခရီးစဉ်အတွင်း အိုဘားမားက တရုတ်နှင့် ပိုင်နက်ဆိုင်ရာ အငြင်းပွားမှုများ ဖြစ်နေသည့် ဂျပန်နိုင်ငံ၏ လုံခြုံရေးကို ကာကွယ်စောင့်ရှောက်ပေးသွားမည်ဟု ကတိပြုခဲ့သည်။

Ref: Aljazeera, Channelnewsasia