ဘာသာရေး လွတ်လပ်ခွင့် သံတမန် တွေ လာရောက်

အမေရိကန်နဲ့ ကနေဒါက နိုင်ငံတကာ ဘာသာရေး လွတ်လပ်ခွင့် အထူး သံတမန်တွေ မြန်မာနိုင်ငံကို မေလ ၂ ရက်က ၅ ရက်ထိ လာပြီး လေ့လာမှုတွေ လုပ်နေကြပါတယ်။
.
ဒီလို လာလေ့လာရာမှာ ရွေးကောက်ပွဲ ကာလအတွင်းမှာ ဘာသာရေးကို အသုံးချပြီး အမုန်းတရားတွေ ဖြန့်ဖြူးမှာကို စိုးရိမ်မိကြောင်း မြန်မာနိုင်ငံမှာ ရောက်နေတဲ့ နိုင်ငံတကာ ဘာသာရေး လွတ်လပ်ခွင့်ဆိုင်ရာ အထူး သံတမန် David Saperstein နဲ့ ကနေဒါ နိုင်ငံ ဘာသာရေး လွတ်လပ်ခွင့်ဌာန သံအမတ်ကြီး Andrew Bennett တို့ က ထုတ်ဖော် ပြောကြားလိုက်ပါတယ်။
.
ဒီခရီးစဉ် အတွင်း သံအမတ်ကြီးတွေက ဘာသာရေး အဖွဲ့အစည်း ခေါင်းဆောင်တွေနဲ့ရော အစိုးရနဲ့ အစိုးရ မဟုတ်တဲ့ အဖွဲ့အစည်းတွေ၊ နိုင်ငံရေး ပါတီတွေနဲ့ပါ တွေ့ဆုံဖို့ ရှိပါတယ်။
.
ရခိုင်ပြည်နယ်မှာ ဝှိုက်ကပ်ကိုင်သူတွေ မဲပေးခွင့် ဆုံးရှုံးမှာ၊ သူတို့ကို နိုင်ငံသား လက်မှတ် ထုတ်မပေးမှာကို စိုးရိမ်လို့ သံတမန်တွေက မေးမြန်း စုံစမ်းကြတယ်လို့ သူတို့နဲ့ တွေ့ဆုံ ခဲ့တဲ့ Women Peace Network Arakan က မဝေဝေနုက ပြောပါတယ်။
.
လက်ရှိ ဘာသာရေး လွတ်လပ်ခွင့် အခြေအနေတွေ ပိုဆိုး မလာအောင် ဒီသံတမန်တွေက မြန်မာ အစိုးရနဲ့ရော သက်ဆိုင်ရာ အစိုးရတွေနဲ့ပါ တိုင်ပင် ဆွေးနွေးကြလိမ့်မယ်လို့ မျှော်လင့်တယ်လို့လည်း သူက ဆိုပါတယ်။
.
မြန်မာအစိုးရ အနေနဲ့ ဘာသာပေါင်းစုံ ချစ်ကြည်ရေးတွေ လုပ်နေတာထက် အောက်ခြေ အစိုးရ အဖွဲ့အစည်းတွေမှာ ဘာသာရေး အရ ခွဲခြား ဖိနှိပ်မှုတွေ ရှိနေတာကို ပြုပြင်ဖို့ သံတမန်တွေနဲ့ တွေ့ခဲ့သူတွေက တိုက်တွန်း အကြံပေးခဲ့ကြပါတယ်။
.
မြန်မာနိုင်ငံကို ဘာသာရေး လွတ်လပ်ခွင့် စိုးရိမ်ရတဲ့ နိုင်ငံအနေနဲ့ အမေရိကန်က စာရင်းသွင်းထားခဲ့ပါတယ်။
.
သတင်း- ဘီဘီစီ(မြန်မာပိုင်း)
ဓါတ်ပုံအညွှန်း- နိုင်ငံတကာ ဘာသာရေး လွတ်လပ်ခွင့်ဆိုင်ရာ အထူး သံတမန် David Saperstein ရန်ကုန်မြို့ တခြမ်းပဲ့ ဗလီဝတ်ကျောင်းတော်သို့ သွားရောက်လည်ပတ်စဉ်
Photo Credit – U.S. Embassy Rangoon

http://www.bbc.com/burmese/burma/2015/05/150503_religious_ambassadors_us