ဝန်ထမ်း ၆ ထောင်ကျော်ကို ပြင်သစ်အလည်ခေါ်တဲ့ တရုတ်သူဌေး

မေ ၁၀၊ ၂၀၁၅
M-Media

– တရုတ်နိုင်ငံက ဘီလျံနာတစ်ယောက်ဟာ သူ့ရဲ့ ၀န်ထမ်း ၆၄၀၀ ကို ပြင်သစ်နိုင်ငံ လေးရက်ကြာ အပန်းဖြေခရီး ခေါ်သွားခဲ့ပြီး ဂင်းနစ်မှတ်တမ်းမှာလည်း မှတ်တမ်းဝင်ခဲ့ပါတယ်။

အဲဒီဘီလျံနာကတော့ Tiens အုပ်စု ကုမ္ပဏီဥက္ကဌ လီ ဂျင်ယွမ်ဖြစ်ပြီး သူတို့လူအုပ်စုတည်းဖို့ ပဲရစ်က ဟိုတယ် ၁၄၀ ကျော်ကို ဘိုကင် လုပ်ခဲ့ရပါတယ်။ နောက်ပြီး ကမ္ဘာပေါ်မှာ အကျော်ကြားဆုံးနဲ့ အလေးအမြတ် အထားခံရဆုံး ပဲရစ်မြို့က Louvre နဲ့ အခြားသော ယဉ်ကျေးမှု ဆိုင်ရာ နေရာတွေကိုလည်း သွားရောက် လည်ပတ်ခဲ့ပါတယ်။

အဲဒီနောက်မှာတော့ စွဲမက်စရာကောင်းတဲ့ Cote D’Azur မြို့ကိုလည်း သွားခဲ့ပြီး ကန်နက်စ်နဲ့ မိုနာကိုတို့က ကြယ်လေးပွင့်နဲ့ ကြယ်ငါးပွင့် ဟိုတယ်တွေက အခန်းပေါင်း ၄၇၆၀ ကို ငှားရမ်းခဲ့ကြပါတယ်။

သူတို့တည်းတဲ့ ဟိုတယ်ကနေ နိုက်စ်မြို့က Promenade des Anglais သွားတဲ့အခါ ဘတ်စ်ကားပေါင်း ၁၄၇ စီးကို အသုံးပြုခဲ့ပြီး ဂင်းနစ်ကမ္ဘာ့မှတ်တမ်း တာဝန်ရှိသူတွေက ကမ္ဘာ့အကြီးဆုံး လူတန်းရှည်ကြီးအဖြစ် သတ်မှတ်ပေးခဲ့ပါတယ်။

လီဂျင်ယွမ်ဟာ သူ့ကုမ္ပဏီနဲ့ ပြင်သစ်တို့ ချိတ်ဆက်ဆောင်ရွက်မှုနဲ့ ကုမ္ပဏီတည်ထောင်တဲ့ နှစ် ၂၀ ပြည့် အထိမ်းအမှတ်အဖြစ် သူ့ရဲ့ဝန်ထမ်းတွေကို ဒီလို အလည်အပတ်ခေါ်သွားတာ ဖြစ်ပါတယ်။ ဒီခရီးစဉ်ကနေ ပြင်သစ်က ယူရို ၃၃ သန်းလောက် အမြတ်ထွက်မယ်လို့ ခန့်မှန်းထားပါတယ်။

သူတို့အုပ်စုဟာ ပဲရစ်မှာ ၁၃ သန်းလောက်သုံးမယ်လို့ မှန်းထားပြီး နိုက်စ်မြို့မှာတော့ သန်း ၂၀ လောက် သုံးကြမှာပါ။

အသက် ၅၇ နှစ်အရွယ် ရှိပြီဖြစ်တဲ့ လီဂျန်ယွမ်ဟာ Forbes မဂ္ဂဇင်းရဲ့ ကမ္ဘာ့အချမ်းသားဆုံး ဘီလျံနာစာရင်းမှာ ပါဝင်သူတစ်ယောက်ဖြစ်ကာ သူရဲ့ လုပ်ငန်းတစ်ခုလုံးမှာ ၀န်ထမ်းပေါင်း ၁၂၀၀၀ လောက် ရှိပါတယ်။

ပြင်သစ်ဟာ ကမ္ဘာ့ပေါ်မှာ လည်ပတ်မှုအများဆုံး နိုင်ငံဖြစ်ပြီး ကုလရဲ့ မှတ်တမ်းများအရ တစ်နှစ်ကို နိုင်ငံခြားသား ၈၅ သန်းလောက် လာရောက်လည်ပတ်ကြကာ ခရီးသွားလုပ်ငန်းကနေ ယူရို ၁၅၀ ဘီလီယံလောက် ၀င်နေပါတယ်။

Ref: Dailymail