အရန်ကစားသမားဘ၀ကို ရှောင်ရှားလို၍ အသင်းပြောင်းခြင်းဟု ဂျရတ်ပြော

မေ ၁၃၊ ၂၀၁၅
M-Media

– မိမိအနေဖြင့် အလ်အေ ဂလက်ဆီအသင်းသို့ ပြောင်းရွှေ့ရန် ဆုံးဖြတ်ရခြင်းမှာ လီဗာပူးလ်၌ ပုံမှန်ကစားရမှု ဆုံးရှုံးခြင်းကို ရှောင်ရှားရန်ဖြစ်သည်ဟု လီဗာပူလ်းကွင်းလယ်လူ ဂျရတ်က ပြောကြားလိုက်သည်။

အသက် ၃၄ နှစ်အရွယ်ရှိပြီဖြစ်သည် ဂျရတ်မှာ ၁၇ နှစ်ကြာကစားခဲ့သည့် လီဗာပူးလ်ကစားသမားဘ၀အား အဆုံးသတ်တော့မည်ဟု ယခုနှစ် ဇန်န၀ါရီလက ကြေညာခဲ့သည်။ ထို့နောက် သိပ်မကြာခင်မှာပင် အမေရိကန် မေဂျာလိဂ်ကလပ်ဖြစ်သော အလ်အေ ဂလက်ဆီအသင်းသို့ ပြောင်းရွှေ့ရန် သဘောတူခဲ့သည်။

ဂျရတ်ကမူ ထိုကဲ့သို့ ပြောင်းရွှေ့ရန် ဆုံးဖြတ်ရခြင်းမှာ လီဗာပူးလ်၌ အဖြည့်ခံကစားသမား ဖြစ်လာမည့်အရေးကို မလိုလားသောကြောင့်ဖြစ်သည်ဟု ဖွင့်ဟခဲ့သည်။

“ကျွန်တော်ဟာ လူစားဝင်ကစားသမားတစ်ယောက်နဲ့ ၀န်းကျင်အပြောင်းအလဲ ဖြစ်လာတော့မှာပါ။ ကျွန်တာ့်အတွက်ကတော့ တနင်္လာနေ့မနက်မှာ အလုပ်သွားမယ်။ ထူးခြားတဲ့လူအချို့၊ မိတ်ဆွေကောင်းအချို့နဲ့အတူ တိုက်ဝင်ဖို့အတွက် ပြင်ဆင်ဖို့ စနေနေ့အထိ ကျွန်တော် အလုပ်လုပ်နေမယ်။ ဒါဟာ ကျွန်တော့်ရဲ့ ၀န်းကျင်ပါပဲ။ နည်းပြက ရုံးခန်းကိုခေါ်ပြီး ဒီလိုအခြေအနေမျိုးဟာ ပြောင်းလဲတော့မယ်။ ပိုပြီးအကန့်အသတ်တွေ ရှိလာတော့မယ်လို့ ပြောလာရင် အဲဒီအချိန်မှာ ဆုံးဖြတ်ချက် ချမှတ်ရတတ်ပါတယ်။ ဒါဟာ တစ်ကိုယ်ကောင်းဆန်တဲ့ ကိစ္စတော့ မဟုတ်ပါဘူး။ လူစားဝင်ကစားသမားတစ်ယောက် ဖြစ်လာတာဟာ အရင်လို ၀န်းကျင်မျိုး မဟုတ်တော့ပါဘူး။ ဒါ့ကြောင့် ဒီနှစ်မှာ အကြောင်းအရာတွေက ပြောင်းလဲသွားတာပါ” ဟု ဂျရတ်က သတင်းထောက်များအား ပြောကြားခဲ့သည်။

ဂျရတ်မှာ လာမည့် စနေနေ့ ခရစ္စတယ်ပဲလေ့စ်နှင့်ပွဲတွင် လီဗာပူးအသင်းနှင့် နောက်ဆုံးအိမ်ကွင်းပွဲစဉ်ကို ကစားရမည်ဖြစ်ပြီး ၎င်းကမူ မိမိ၏ စိတ်ခံစားမှုကို ထိန်းချုပ်ထားရန် ခက်ခဲကြောင်း၊ မိမိ၏ နောက်ဆုံး အန်ဖီးလ်ပွဲစဉ်ကို အနိုင်ဖြင့် မှတ်တမ်းတင်နိုင်မည်ဟု မျှော်လင့်ကြောင်း ထပ်လောင်းပြောကြားခဲ့သည်။

Ref: Goal