ဂျူဗီပွဲ ဂိုးမသွင်းနိုင်ခြင်းမှာ ကံမကောင်း၍ဟု ဂါရက်ဘေးလ်ပြော

မေ ၁၄၊ ၂၀၁၅
M-Media

– ဂျူဗင်တပ်စ်နှင့် ချန်ပီယံလိဂ် ဆီမီးဖိုင်နယ် ဒုတိယအကျော့ပွဲတွင် မိမိအနေဖြင့် ဂိုးမသွင်းနိုင်ခြင်းက ကံမကောင်းသောကြောင့် ဖြစ်သည်ဟု ရီးယဲလ်မက်ဒရစ်အသင်း၏ ဝေးလ်တိုက်စစ်မှူး ဂါရက်ဘေးလ်က ပြောကြားလိုက်သည်။

ယနေ့မနက်က ကစားခဲ့သည့် အဆိုပါပွဲတွင် ၁ ဂိုးစီ သရေကျခဲ့ပြီး နှစ်ကျော့ပေါင်း ၃ ဂိုး ၂ ဂိုးဖြင့် ရီးယဲလ်က ပြိုင်ပွဲမှ ထွက်ခဲ့ရသည်။ ပထမအကျော့ ရှုံးနိမ့်ခဲ့စဉ်က ခြေစွမ်းမပြနိုင်ခဲ့သည့်အတွက် ဝေဖန်ခံခဲ့ရသည့် ဂါရက်ဘေးလ်မှာ ယခုပွဲတွင် အပိုင်အခွင့်အရေး ၃ ကြိမ်ခန့် ရရှိခဲ့ပြီး ကောင်းမွန်စွာ အဆုံးသတ်နိုင်ခဲ့ခြင်း မရှိချေ။

ဘေးလ်ကမူ မိမိအနေဖြင့် ကံမကောင်းခဲ့ဟု ဆိုသည်။

“ကျွန်တော် တစ်လုံးလောက်သွင်းဖို့တောင် ကံမကောင်းခဲ့ပါဘူး။ (အနောက်မှာ) ကျွန်တော် ထိချက်လွဲခဲ့ပါတယ်။ ဘောလုံးကို ကျွန်တော်မမီလိုက်ပါဘူး။ ကျွန်တော် ဆက်ကြိုးစားတိုင်း များသောအားဖြင့် တစ်လုံးလောက်တော့ ရပါတယ်။ ဒါပေမယ့် ဒီညတော့ အဲဒီလို မဖြစ်ခဲ့ပါဘူး” ဟု ဘေးလ်က ထိုပွဲ၌ အကောင်းဆုံးအခွင့်အရေးဖြစ်သည့် ခေါင်းတိုက်ဂိုးမ၀င်မှုကို ရည်ညွှန်း၍
ပြောကြားခဲ့သည်။

ယခုနှစ်တွင် အတက်၊ အကျများ ရှိခဲ့သော်လည်း ခြုံ၍ဆိုရလျှင် မိမိအနေဖြင့် ကောင်းကောင်းကစားနိုင်ကြောင်း၊ မိမိကြိုက်နှစ်သက်သည့် အရေးပါသော အခွင့်ရေးများ ရခဲ့သလောက် ဂိုးမသွင်းနိုင်ခဲ့ကြောင်း ၎င်းက ထပ်လောင်းပြောကြားခဲ့သည်။

“ဒါပေမယ့် ယေဘူယျကစားပုံကတော့ ကောင်းခဲ့ပါတယ်။ အဆုံးသတ်ကတော့ အဲဒီလောက်မကောင်းခဲ့ဘူး။ ပြီးတော့ နောက်နှစ်အတွက် လုပ်စရာတစ်ခုခု ရှိပါတယ်။ ဒါက ကျွန်တော့်ကို ကျဆုံးစေမှာမဟုတ်ဘဲ ပိုပြီး တောင့်တင်းစေမှာပါ။ ပြီးတော့ ဒီရာသီကနေ ကျွန်တော်သင်ယူပြီး၊ ဒါကိုလည်း ရဲရဲဝင့်ဝင့် ရင်ဆိုင်သွားမှာပါ”

Ref: Dailymail