နိုင်ငံတကာသတင်းတို (မေ ၁၄၊ ၂၀၁၅)

မေ ၁၄၊ ၂၀၁၅
M-Media

လူဇင်ဘတ်ဝန်ကြီးချုပ် လိင်တူလက်ထပ်မည်
——————————————————–
ဥရောပနိုင်ငံတစ်ခုဖြစ်သည့် လူဇင်ဘတ်၏ အသက် ၄၂ နှစ်အရွယ် ၀န်ကြီးချုပ် ဇာဗီယာ ဘက်တဲလ်မှာ ၎င်း၏ ချစ်သူ အမျိုးသား ဂူသီယာ ဒက်စ်တီနေးနှင့် သောကြောနေ့တွင် လက်ထပ်တော့မည်ဟု ကြေညာလိုက်သည်။ ထို့ကြောင့် ဘက်တဲလ်မှာ ဥရောပတွင် လိင်တူချစ်သူကို လက်ထပ်သည့် ပထမဆုံးနှင့် ကမ္ဘာတစ်ဝှမ်းတွင် ဒုတိယမြောက် ခေါင်းဆောင် ဖြစ်လာမည်ဖြစ်သည်။
လွန်ခဲ့သည့် ၅ နှစ်က အိုက်စလန် ၀န်ကြီးချုပ် ဂျိုဟာနာ ဆီဂါဒါ ဒေါ့တီရ်မှာ ၎င်း၏ လိင်တူချစ်သူကို လက်ထပ်ခဲ့ပြီး ကမ္ဘာပေါ်တွင် လိင်တူလက်ထပ်သည့် ပထမဆုံး ခေါင်းဆောင် ဖြစ်ခဲ့သည်။
.
မြောက်ကိုရီးယား စစ်တပ်အကြီးအကဲ ကွပ်မျက်ခံရမှု မသေချာသေး
————————————————————————————
မြောက်ကိုရီးယား ကာကွယ်ရေးဝန်ကြီး ဟွန် ယွန် ချိုလ် ကွပ်မျက်ခံရသည်ဆိုသော သတင်းအား အတည်မပြုနိုင်သေးဟု တောင်ကိုရီးယား ထောက်လှမ်းရေးအေဂျင်စီ NIS က ပြောကြားလိုက်သည်။ ဗုဒ္ဓဟူးနေ့တွင် တောင်ကိုရီးယား ပါလီမန်ရှိ အမတ်များက ဟွန် ယွန် ချိုလ်မှာ လေယာဉ်ပစ် စက်သေနတ်ဖြင့် ကွပ်မျက်ခံခဲ့ရသည်ဟု NIS က ယုံကြည်ကြောင်း ပြောကြားပြီးနောက် သတင်းများက ထိုပြောကြားမှု ကို ကျယ်ကျယ်ပြန့်ပြန့် ဖော်ပြခဲ့ကြသည်။ သို့သော်လည်း NIS ပြောရေးဆိုခွင့်ရှိသူကမူ ဟွန်မှာ ရာထူးမှ ဖယ်ရှားခံရသော်လည်း ကွပ်မျက်ခံရခြင်း ရှိ/မရှိကို အတည်မပြုနိုင်ဟု ယနေ့တွင် ပြောကြားခဲ့သည်။
.
နီပေါပြန်လည်ထူထောင်ရေး ငွေကြေးမလုံလောက်
————————————————————
ငလျင်ကြောင့် ပျက်စီးဆုံးရှုံးမှုများအတွက် ပြန်လည် ထူထောင်ရေးလုပ်ငန်းများ လုပ်ဆောင်ရန် မိမိ တို့တွင် ငွေကြေး မလုံလောက်ဟု နီပေါအစိုးရက ပြောကြားလိုက်သည်။ ပြီးခဲ့သည့် ၂ ပတ်အရင်က ပြင်းအား ၇.၈ မဂ္ဂနီကျုရှိ ငလျင်ဒဏ်ကို ခံခဲ့ရပြီး လူပေါင်း ၈ ထောင်ကျော် သေဆုံးခဲ့သည့် နီပေါမှာ ပြီးခဲ့သည့် အင်္ဂါနေ့ကလည်း ပြင်းအား ၇.၄ မဂ္ဂနီကျုရှိ ငလျင်ဒဏ်ကို ထပ်မံခံစားခဲ့ရပြီး ထိုငလျင်ကြောင့် အဆောက်အဦးများ ထပ်မံ ပြိုကျ ပျက်ဆီးခဲ့ကာ သေဆုံးသူမှာ ၉၁ ဦး ရှိလာခဲ့ပြီဖြစ်သည်။
.
ယီမင်တွင် အကူအညီများစတင်
—————————————
တိုက်ခိုက်မှုများ ဖြစ်ပွားနေသော ယီမင်နိုင်ငံတွင် ၅ ရက်ကြာ လူသားချင်း စာနာထောက်ထားမှုဆိုင်ရာ အပစ်ရပ်ရေးကို ယနေ့တွင်စတင်ခဲ့ပြီး အာရပ်နိုင်ငံများ၊ အီရန်နှင့် အနောက်နိုင်ငံများက ပေးပို့သော အစားအသောက်၊ ဆေးဝါးနှင့် လောင်စာဆီ များကို ပြည်သူများအား ဝေငှလျက်ရှိနေသည်။
.
Ref: News Agencies

http://wp.me/p2QCYJ-aDu