မိမိတို့ကွင်းတွင် ဘာကာအား ချန်ပီယံဖြစ်ခွင့်မပေးဟု တောရက်စ်ပြော

မေ ၁၆၊ ၂၀၁၅
M-Media

– မိမိတို့အိမ်ကွင်းတွင် တိုက်ပွဲဆင်နွှဲရေး မျှော်လင့်ထားရန် အက်သလက်တီကိုတိုက်စစ်မှူး ဖာနန်ဒိုတောရက်စ်က ဘာစီလိုနာအသင်းအား သတိပေးခဲ့ပြီး မိမိတို့အသင်းမှာ ဘာကာဖလားမရရေး တားဆီးသွားမည်ဟု ပြောကြားလိုက်သည်။

ကစားရန် ၂ ပွဲသာကျန်ရှိသည့်အချိန်တွင် ဒုတိယနေရာမှ ရီးယဲလ်အား ၄ မှတ်ဖြတ်ထားသည့် ဘာကာမှာ မနက်ဖြန်တွင် အက်သလက်တီကို၏ အိမ်ကွင်း၌ သွားရောက်ကစားရမည်ဖြစ်ပြီး အနိုင်ရပါက လာလီဂါချန်ပီယံ ဖြစ်မည်ဖြစ်သည်။

အက်သလက်တီကိုမှာလည်း ထိုပွဲအနိုင်ရပါက တတိယနေရာအတွက် သေချာမည်ဖြစ်ပြီး ချန်ပီယံလိဂ်ကို တိုက်ရိုက်ဝင်ခွင့်ရမည်ဖြစ်သည်။ တောရက်စ်ကမူ မိမိတို့မှာ အနိုင်ရရှိရေးအတွက် တိုက်ပွဲဝင်သွားမည်ဟု ဆိုသည်။

“ဘာကာဟာ ဒီမှာ ဖလား ရမှာမဟုတ်ဘူးလို့ ကျွန်တော် မျှော်လင့်ပါတယ်။ ပြီးခဲ့တဲ့နှစ်တုန်းက အက်သလက်တီကိုဟာ နျူးကမ့်မှာ ဖလားရခဲ့တယ်။ ဘာစီလိုနာကလည်း ကျွန်တော်တို့ ကွင်းမှာ ချန်ပီယံဖြစ်ဖို့ ဖြစ်နိုင်ခြေရှိပါတယ်။ ဘောလုံးလောကဟာ ဒီလိုပါပဲ။ ဒါပေမယ့် ဒီပွဲနိုင်ဖို့နဲ့ တတိယနေရာသေချာစေဖို့ ကျွန်တော်တို့ မျှော်လင့်ပါတယ်” ဟု တောရက်စ်က SPORT သို့ ပြောကြားခဲ့သည်။

ဘာစီလိုနာမှာ ထိုပွဲမနိုင်လျှင်လည်း နောက်ဆုံးပွဲတွင် ဒီပို့တီဗီိုအား အိမ်ကွင်း၌ အနိုင်ကစား၍ ဖလားရနိုင်ရန် အခွင့်အရေးရှိနေသည်။

Ref: Goal