အသင်းနှင့်အံမ၀င်ပါက ထွက်ရမည်ဟု ဒီမာရီယာအား ဗန်ဂါးလ်သတိပေး

မေ ၁၇၊ ၂၀၁၅
M-Media

– ကွင်းလယ်လူ ဒီမာရီယာအနေဖြင့် အသင်း၏ ဒဿနနှင့် အံဝင်ခွင်ကျဖြစ်ရေး ကြိုးစားရမည်ဖြစ်ပြီး ထိုသို့မဟုတ်ပါက အသင်းမှ ထွက်ခွာရလိမ့်မည်ဟု မန်ယူနည်းပြ ဗန်ဂါးလ်က ပြောကြားလိုက်သည်။

ဒီမာရီယာမှာ ပြီးခဲ့သည့် နွေရာသီက မန်ယူသို့ ဗြိတိန် စံချိန်တင်ပြောင်းရွှေ့ကြေး ပေါင် သန်း ၆၀ ဖြင့် ရီးယဲလ်မှ ပြောင်းရွှေ့လာခဲ့ခြင်းဖြစ်ပြီး ခြေစွမ်းကောင်းများကို ပြသနိုင်ခြင်း မရှိသောကြောင့် နည်းပြဗန်ဂါးလ်လက်အောက်တွင် အဓိက ကစားသမားအဖြစ် ပါဝင်ခွင့် မရရှိပေ။

ဗန်ဂါးလ်ကမူ ဒီမာရီယာအနေဖြင့် ပွဲအတွင်း အံဝင်ခွင်ကျဖြစ်ရန် ကြိုးစားရမည်ဟု ပြောကြားလိုက်ကာ ဒီမာရီအပေါ် ၎င်း၏ စိတ်ကုန်မှုကို ပြသလိုက်သည်။

“ကစားသမားတွေဟာ အသင်းရဲ့ ဒဿနနဲ့ အံဝင်ရပါမယ်။ ဒီမာရီယာကလည်း ဒီလိုလုပ်ရပါမယ်။ ဒီမာရီယာ သင်ယူနိုင်မလား? ဒါကိုတော့ ကျွန်တော်တို့ စောင့်ကြည့်ရမှာပါ။ ဒါဟာ သူ့မှာ အရည်အသွေး မရှိတာကြောင့် မဟုတ်ပါဘူး။ ကျွန်တော်တို့ လိုချင်တဲ့နည်းလမ်းနဲ့ သူက ကစားရပါမယ်။ ကျွန်တော်လိုချင်တဲ့ ပုံစံမဟုတ်ပါဘူး။ အသင်းတစ်သင်းအဖြစ် ကျွန်တော်တို့ လိုချင်တဲ့ပုံစံပါ” ဟု ဗန်ဂါးလ်က ပြောကြားခဲ့သည်။

ဒီမာရီယာကလည်း မိမိအနေဖြင့် ကောင်းဆုံး အရည်အသွေးသို့ မရောက်သေးဟု ၀န်ခံခဲ့သည်။

“အင်္ဂလန်မှာ ကျွန်တော့်ရဲ့ပထမနှစ်အတွက် ကျွန်တော် မပျော်ရွှင်ပါဘူး။ ဒီကို ရီးယဲလ်ကပြောင်းလာတာဟာ ဖလားတွေရဖို့ပါ။ ဒီရာသီကတော့ ကျွန်တော့်အတွက် တော်တော်ဆိုးပါတယ်။ ကျွန်တော် ဒီထက်ပိုကောင်းချင်တာကြောင့် စိတ်ပျက်ရပါတယ်” ဟု
ဒီမာရီယာက ဆိုသည်။

ထို့ပြင် ပရိသတ်များအနေဖြင့် ဒီမာရီယာအစစ်ကို မမြင်သေးကြောင်း၊ အင်္ဂလိပ်ဘောလုံးဟန်နှင့် အံဝင်အောင်လုပ်ရသည်မှာ မလွယ်ကြောင်း ဒီမာရီယာက ထပ်လောင်းပြောကြားခဲ့သည်။

မန်ယူမှာ လာမည့်ရာသီတွင် ပြောင်းရွှေ့ကြေး အမြောက်အများ သုံးစွဲသွားရန် စီစဉ်နေပြီး လက်ရှိတွင် ရီးယဲလ်တိုက်စစ်မှူး ဂါရက်ဘေးလ်၊ စပါးတိုက်စစ်မှူး ဟယ်ရီကိန်းတို့အား ခေါ်ယူရန် ကြိုးစားနေသည်။

Ref: Dailymail