ပါလက်စတိုင်းသမ္မတ မဟ်မူးဒ်အဘတ်စ်ကို “ငြိမ်းချမ်းရေး ကောင်းကင်တမန်” ဟု ပုပ်ရဟန်းမင်းကြီး သမုတ်

မေ ၁၇၊ ၂၀၁၅
M-Media

– အစ္စရေးတို့၏ ကျူးကျော်သိမ်းပိုက်မှုလက်မှ လွတ်မြောက်ရေး ကြိုးစားနေသည့် ပါလက်စတိုင်းသမ္မတ မဟ်မူးဒ်အဘတ်စ်အား ပုပ်ရဟန်းမင်းကြီး ဖရန်စစ်က “ငြိမ်းချမ်းရေး ကောင်းကင်တမန်” ဟု ခေါ်ဝေါ် သမုတ်လိုက်ပြီး ပါလက်စတိုင်းနှင့် ဗာတီကန်၏ နွေးထွေးသောဆက်ဆံရေးကို ထင်ရှားစေခဲ့သည်။

မဟ်မူးဒ်အဘတ်စ်မှာ ယမန်နေ့က ဗာတီကန်တွင် ပုပ်ရဟန်းမင်းကြီးနှင့် မိနစ် ၂၀ ကြာ တွေ့ဆုံစကားပြောခဲ့ပြီး ယနေ့တွင်ပြုလုပ်မည့် ပါလက်စတိုင်း ခရစ်ယာန် သီလရှင်နှစ်ပါးအား သူတော်စဉ်အဖြစ် ချီးမြှောက်ပွဲအခမ်းအနားတွင်လည်း ထပ်မံတွေ့ဆုံမည်ဖြစ်သည်။

ဗာတီကန်ရှိ အပို့စ်တိုလစ်နန်းတော်၌ အဆိုပါတွေ့ဆုံမှုအတွင်း ပုပ်ရဟန်းမင်းကြီးက အဘတ်စ်အား ချီးကျူးခဲ့ပြီး နှစ်ဖက် လက်ဆောင်များလည်း လဲလှယ်ခဲ့ကြသည်။ ထို့ပြင် ငြိမ်းချမ်းရေး ကောင်းကင်တမန်ပုံ ထွင်းထုထားသော လည်ဆွဲဆုတံဆိပ်တစ်ခုကိုလည်း ပုပ်ရဟန်းမင်းကြီးက အဘတ်စ်အား ချီးမြှင့်ခဲ့သည်။

“ဒါဟာ သင်နဲ့ သင့်လျော်ပါတယ်။ ဘာ့ကြောင့်လည်းဆိုတော့ သင်ဟာ ငြိမ်းချမ်းရေး ကောင်းကင်တမန်တစ်ယောက် ဖြစ်တာကြောင့်ပါပဲ” ဟု ပရိတ်သတ်များရှေ့တွင် ပုပ်ရဟန်းမင်းကြီးက ပြောကြားခဲ့သည်။

ဆွေးနွေးမှုအပြီး ထုတ်ပြန်သောကြေညာချက်တွက် မိမိတို့မှာ အစ္စရေးနှင့် ငြိမ်းချမ်းရေးအတွက် ဆွေးနွေးခဲ့ကြပြီး၊ အစ္စရေးနှင့် ပါလက်စတိုင်းတို့အကြား တိုက်ရိုက်ဆက်သွယ်ရေးကို မကြာမီ ပြန်စနိုင်မည်ဟု မျှော်လင့်ကြောင်း ထည့်သွင်းဖော်ပြခဲ့သည်။

ဗာတီကန်က မိမိတို့မှာ ပါလက်စတိုင်းအား အချုပ်အခြာအာဏာပိုင် နိုင်ငံအဖြစ် အသိအမှတ်ပြုထားသည့် နိုင်ငံအချင်းချင်း သဘောတူစာချုပ်ကို ရေးသားပြီးစီးခဲ့ပြီး မကြာမီ လက်မှတ်ရေးထိုးတော့မည်ဟု ပြီးခဲ့သည့် ဗုဒ္ဓဟူးနေ့က ကြေညာခဲ့သည်။

Ref: Reuters