ဇွန်လ ၁ရက်မှစပြီး မိုဘိုင်းဖုန်းများ ငွေဖြည့်တိုင်း ၅% အခွန်ဖြတ်တော့မည်။

မေ ၂၀ ၊ ၂၀၁၅
M-Media
သတင်း-သူရိန်

လာမည့် ဇွန်လ ၁ရက်နေ့မှစ၍ မိုဘိုင်းဖုန်း သုံးစွဲသူများထံမှ အခွန်များ စတင်ကောက်ခံမည်ဖြစ်ကြောင်း သိရသည်။

ကောက်ခံမည့် အခွန်ရာခိုင်နှုန်းမှာ ကုန်သွယ်လုပ်ငန်းခွန် ၅ ရာခိုင်နှုန်း ဖြတ်တောက်မည်ဖြစ်ပြီး ဖုန်းငွေဖြည့်ပါက သက်ဆိုင်ရာနှုန်းထား အလျောက် ကောက်ယူသွားမည် ဖြစ်သည်။

အဆိုပါ ကောက်ခံမှုနှင့် ပတ်သက်၍ မိုဘိုင်းဖုန်း သုံးစွဲသူများအကြား ဝေဖန်မှုအချို့ရှိနေပြီး ၂၀၁၅-၂၀၁၆ ဘဏ္ဍာရေးနှစ်အတွက် ပြည်ထောင်စုလွှတ်တော်က ပြဌာန်းခဲ့သော ပြည်ထောင်စု အခွန် ဥပဒေအရ သတ်မှတ်ကောက်ခံခြင်းလည်း ဖြစ်သည်။

၁၀၀၀ဖိုး ဖုန်းငွေဖြည့်ပါ ၄၈ကျပ်၊ ၃၀၀၀ ဆိုလျှင် ၁၄၃ကျပ်၊ ၅၀၀၀ ကျပ်ဆိုလျှင် ၂၃၈ ကျပ်၊ ၁၀၀၀၀ကျပ် အတွက် ၄၇၆ကျပ်၊ ၂၀၀၀၀ဖိုးငွေဖြည့်ပါက ၉၅၂ ကျပ် အသီးသီး ဖုန်းငွေဖြည့်သူထံမှ ဖြတ်တောက် ကောက်ခံသွားမည်ဖြစ်သည်။

အခွန်ငွေကောက်ခံမှုတွင် လက်ရှိ အော်ပရေတာများဖြစ်သည့် MPT၊ MECTEL၊ Ooredoo၊ Telenor သုံးစွဲသူများထံမှ ကောက်ခံမှုပြုမည်ဖြစ်ရာ သက်ဆိုင်ရာ အော်ပရေတာများမှ သုံးစွဲသူများထံ မက်ဆေစ့်များ ပေးပို့လျက်ရှိသည်။

လက်ရှိအချိန်တွင် မြန်မာပြည်တွင်း မိုဘိုင်းဖုန်းနှင့် အင်တာနက်သုံးစွဲမှု တစစ မြင့်မားလျက်ရှိရာ မိုဘိုင်းဖုန်း သုံးစွဲသူများ၏ ၅၅.၈ရာခိုင်နှုန်းသည် မိုဘိုင်း အင်တာနက်ကို နေ့စဉ် ပျမ်းမျှ တစ်နာရီမှ နှစ်နာရီအတွင်း သုံးစွဲလျက်ရှိကြောင်း မိုဘိုင်းဖုန်းသုံးစွဲသူတို့၏ အလေ့အထ စစ်တမ်းကောက်ယူမှုအရ သိရသည်။

ဖုန်းပြောဆိုခများ အနေဖြင့် အော်ရီဒူးမှ တစ်မိနစ်လျှင် ၂၀ကျပ်ဖြင့် အနည်းဆုံးကောက်ခံနေပြီး တယ်လီနော်မှ ၂၅ကျပ်၊ MPT ဆွေသဟာသည် ၃၅ကျပ် နှင့် သာမန် MPT ဖုန်းများသည် တစ်မိနစ်လျှင် ၅၀ကျပ်နှုန်းဖြင့် ကောက်ခံလျက်ရှိသည်။

ပြီးခဲ့သည့် ၂၀၁၄ခုနှစ်မှစ၍ နိုင်ငံတကာ အော်ပရေတာ နှစ်ခုဖြစ်သည့် အော်ရီဒူးနှင့် တယ်လီနော် ပြည်တွင်း အော်ပရေတာဖြစ်သည့် အမ်ပီတီနှင့် ၎င်း၏လက်ခွဲ MECTEL တို့မှ ဆက်သွယ်ရေးနှင့် မိုဘိုင်းဝန်ဆောင်မှုများ ပေးလျက်ရှိပြီး လာမည့် ၂၀၁၅ခုနှစ် ဒီဇင်ဘာလတွင် ပြည်တွင်းအော်ပရေတာ အသစ်တစ်ခုဖြစ်သည့် ရတနာပုံ တယ်လီပိုတ်မှလည်း ဆက်သွယ်ရေးနှင့်မိုဘိုင်းဝန်ဆောင်မှုများ ပေးရန် လျာထားကြောင်းသိရသည်။

၂၀၀၈ အခြေခံဥပဒေ အခန်း(၈) ပုဒ်မ ၃၈၉တွင် နိုင်ငံသားတိုင်းသည် ဥပဒေအရ ပေးဆောင်ရမည့် အခွန်အကောက်များကို ပေးဆောင်ရန် တာဝန်ရှိသည် ဟုဖော်ပြထားပြီး ကုန်သွယ်လုပ်ငန်းခွန်သည် ပုဒ်မ ၉၆ကိုရည်ညွှန်းသော အခြေခံဥပဒေ ဇယား၁ ဘဏ္ဍာရေးနှင့် စီမံကိန်း ကဏ္ဍတွင် ပါဝင်သည်။