မေ ၂၀ ၊ ၂၀၁၅
M-Media
မိုးစက် တွေ့ဆုံမေးမြန်းသည်။
![U Ohme Maung](http://www.m-mediagroup.com/wp-content/uploads/2015/05/U-Ohme-Maung.jpg)
ဓါတ်ပုံ အညွှန်း- ညီလာခံအထောက်အကူပြု (ကချင်ပြည်နယ်၊မြစ်ကြီးနားမြို့) ခရီးစဉ်၌ ပြည်လုံးကျွတ်ညီလာခံကျင်းပရေးကော်မတီမှ အထွေထွေအတွင်းရေးမှူး ဦးအုန်းမောင် ရှင်းလင်းပြောကြားစဉ် Photo UMNC FB
ပြည်ထောင်စုသား မွတ်စလင်များ ပြည်လုံးကျွတ်ညီလာခံကို ၂၀၁၅ ခုနှစ် မေလ ၂၃၊ ၂၄၊ ၂၅ ရက်များတွင် ကျင်းပရန် လျာထားသောလည်း အစိုးရက ကျင်းပခွင့် မပြုခဲ့သောကြောင့် ညီလာခံကျင်းပရန် ရွှေ့ဆိုင်း ထားပါသည်။ ထိုအကြောင်း အရာများကို ပြည်ထောင်စုသား မွတ်စလင်များ ပြည်လုံးကျွတ် ညီလာခံ ကျင်းပရေးကော်မတီမှ အထွေထွေ အတွင်းရေးမှူး ဦးအုန်းမောင်ကို M-Media မှ မေးမြန်းခဲ့ပါသည်။
မေး။ ။ မေလ (၁၆) ရက်နေ့ ပြည်ထောင်စုသား မွတ်စလင်များ ပြည်လုံးကျွတ် ညီလာခံ ကျင်းပရေး ကော်မတီကနေ ညီလာခံကျင်းပခွင့်မရဘူးလို့ ထုတ်ပြန်ခဲ့တာနဲ့ ပတ်သက်ပြီး ပြောပြပေးပါ။
ဖြေ။ ။ အန်ကယ်တို့ ကော်မတီအနေနဲ့ ကြေငြာချက်ထုတ်ရတဲ့အကြောင်းက ၂၀၁၄-ခုနှစ် စက်တင်ဘာလမှာ ပြည်ထောင်စုသား မွတ်စလင်များ ပြည်လုံးကျွတ်ညီလာခံကို ကျင်းပနိုင်ဖို့ ရည်ရွယ်ခဲ့ပါတယ်။ သို့သော် နိုင်ငံရေး အခင်းအကျင်းပေါ် မူတည်ပြီး ပြည်ထောင်စု သားတွေရဲ့အကျိုး မွတ်စလင်တွေရဲ့ အကျိုးကိုကြည့်ပြီးတော့ ညီလာခံကို ရွေှ့ဆိုင်းခဲ့ပါတယ်။ အခု ဒီမေလမှာတော့ ရာသီဥတု အနေအထား၊ နိုင်ငံရေး အခြေအနေအရ ကောင်းမွန်နေတာကြောင့် လုပ်သင့်တယ်လို့ ဆုံးဖြတ်ပြီးတော့ ညီလာခံကို မေလ ၂၃၊ ၂၄၊ ၂၅ ရက်တွေမှာ ကျင်းပမယ်လို့ ထုတ်ပြန်ခဲ့တယ်။ ဒီကော်မတီက ဥပဒေဘောင်ထဲက ရပ်တည်တယ်၊ ဥပဒေဘောင် အတွင်းကပဲ လုပ်နေတဲ့အတွက် နည်းလမ်းတကျ ဥပဒေနှင့်အညီ သက်ဆိုင်ရာ အောက်ခြေကနေ ခွင့်ပြုမိန့် လျှောက်ထားခဲ့တယ်။ ရန်ကုန်တိုင်းဒေသကြီး အစိုးရ အဖွဲ့ကိုရောက်တော့ သူတို့က ဒါဟာ ပြည်ထောင်စု အဆင့်ဖြစ်လို့ နေပြည်တော်ကို တင်ပြထားတယ်လို့ သိရတယ်။ အန်ကယ်တို့ဘက်ကလည်း ညီလာခံကျင်းပဖို့ အဆင်သင့်ဖြစ်နေပါပြီ။ မေလ ၁၆ ရက်နေ့မှာ ရန်ကုန်တောင်ပိုင်း ခရိုင် အုပ်ချုပ်ရေးမှူးရုံးကနေပြီး အန်ကယ်တို့ ကော်မတီကိုခေါ်တယ်။ သွားတော့ ညီလာခံလျှောက်ထားတဲ့ မေလ ၂၃၊ ၂၄၊ ၂၅ ရက်ကို ကျင်းပခွင့်မပြုကြောင်း နှုတ်နဲ့လည်းပြောတယ်။ စာနဲ့လည်း ထုတ်ပေးတယ်။ အဲ့လိုသိရတော့ ဒီကျင်းပမဲ့ညီလာခံသည် တစ်နိုင်ငံလုံးက မွတ်စလင်တွေကို ကိုယ်စားပြုပြီး ပြုလုပ် ကျင်းပတာဖြစ်သောကြောင့် တစ်နိုင်ငံလုံး သိသာအောင် ညီလာခံကို သက်ဆိုင်ရာက ကျင်းပ ခွင့်မပြုကြောင်းဆိုတဲ့ အသိပေးကြေငြာချက်ကို မခြွင်းမချန် ထုတ်ပြန်ခဲ့တာပါ။
မေး။ ။ သက်ဆိုင်ရာတာဝန်ရှိသူများကရော ဘာကြောင့် ခွင့်ပြုချက်မပေးရတာလည်းလို့ ပြောပါသလဲ။
ဖြေ။ ။ အဲဒါကတော့ အန်ကယ်တို့ကို ခေါ်ယူပြောတဲ့စကားရပ်ရယ် သူတို့ပေးလိုက်တဲ့ စာအပေါ်မှာကြည့်ပြီးပြောရရင် ဘာအကြောင်းအရာမှ မပါပါဘူး။ ဘာကြောင့် ကျင်းပခွင့်မပြုလည်း ဆိုတာတော့ မပါပါဘူး။
မေး။ ။ အခုလို ကျင်းပခွင့်မရတဲ့ အပေါ်မှာ အန်ကယ် ဘာများပြောချင်ပါသလဲ။
ဖြေ။ ။ အခုလို ကျင်းပခွင့်မရဘူးဆိုတာ သက်ဆိုင်ရာတာဝန်ရှိသူတွေက သူတို့ရဲ့ လုပ်ပိုင်ခွင့်အရ ခွင့်မပြုတာပါ။ ဒီအပေါ်မှာ အမြင်အမျိုးမျိုးနဲ့ တစ်ယောာက်နဲ့တစ်ယောက် အမြင်တွေလွဲမှားတာမျိုး မဖြစ်ကြပါနဲ့။ တစ်ယောက်နဲ့တစ်ယောက် တုံ့ပြန်ပြီး မတိုက်ခိုက်ကြပါနဲ့။ လိုလားရင် ဝိုင်းဝန်ကူညီကြပါ။ မလိုလားရင်လည်း အနှောင့်အယှက်မပေးကြပါနဲ့။
မေး။ ။ လူမှုကွန်ရက်စာမျက်နှာတွေမှာလည်း ညီလာခံနဲ့ ပတ်သက်ပြီး တိုက်ခိုက်ထားတာကိုရော အန်ကယ့်အနေနဲ့ ဘာများပြောချင်ပါသလဲ။
ဖြေ။ ။ အန်ကယ်တို့ တရားဝင်သိသလောက်ပေါ့။ တရားဝင် ဒီညီလာခံကို ဘယ်သူကမှ ဆန့်ကျင် တိုက်ခိုက်ခြင်းမရှိပါဘူး။ အန်ကယ်တို့နဲ့ တစ်ခါမှ ထိပ်တိုက်လည်း မတွေ့ဘူးပါဘူး။ အဲဒီလိုအပြင်ကနေ လူမှုကွန်ရက် စာမျက်နှာတွေ ကနေ ရေးကြ ကြေညာကြတယ် ဆိုတာကလည်း ဒါက တရားဝင်ခြင်း မဝင်ခြင်းနဲ့ဆိုင်ပါတယ်။ ဒါကတော့ နိုင်ငံတော်အစိုးရကပဲ သုံးသပ်ပေးနိုင်မယ်။ အန်ကယ်တို့တော့ ပြောလို့မရပါဘူး။ ဒီနေ့အထိ ခံယူထားတာက ဘာသာမတူရင် ဘာသာခြားတာပဲ၊ လူမျိုးမတူရင် လူမျိုးခြားတာပဲ ဒါကြောင့် အားလုံးဟာ ပြည်ထောင်စုသားတွေပဲလို့ ခံယူတယ်။ ခြားနားခြင်းဆိုတာ မရှိပါဘူး။ တစ်ယောက်ကိုတစ်ယောက် နားမလည်ရင် မျက်နှာချင်းဆိုင် တွေ့ဆုံဖြေရှင်းလိုက်ရင် အဖြေပေါ်မှာပါ။ အခု ဒီညီလာခံကျင်းပခြင်းကလည်း အဲဒီစိတ်ပါပဲ။ စိတ်ထဲမှာ ဖြစ်နေတဲ့ သံသယတွေကို ရှင်းရှင်းလင်းလင်း သိဖို့ပါပဲ။ သူတို့အမြင်နဲ့ သူတို့ကြားတာ ပြောနေကြတာပါ။ အန်ကယ်တို့ဘာသာက ဘယ်တုန်းကမှ တိုင်းပြည်ကို ထိခိုက်အောင်၊ နစ်နာအောင် ထိပါးစရာလည်း မရှိပါဘူး။ အန်ကယ်တို့ အရေးကိစ္စလေးတွေကိုပဲ ဥပဒေဘောင်ထဲကပဲ အဖြေရှာမှာပါ။
မေး။ ။ အခု ညီလာခံကျင်းပခွင့်မရတော့ အန်ကယ်တို့ကော်မတီအနေနဲ့ ဘာဆက်လုပ်သွားမလဲ။
ဖြေ။ ။ ပြည်ထောင်စုသား မွတ်စလင်များ ပြည်လုံးကျွတ် ညီလာခံ ကျင်းပရေးကော်မတီဆိုတာ ပြည်ထောင်စုသား မွတ်စလင်များ ပြည်လုံးကျွတ် ညီလာခံကြီး မဖြစ်မချင်း ဥပဒေဘောင် အတွင်းကနေ မူဝါဒတွေအတိုင်း ဆက်လက်ကြိုးပမ်းနေရမှာဖြစ်တယ်။
မေး။ ။ ဒီညီလာခံနဲ့ပတ်သက်ပြီး တခြား ရည်ရွယ်ချက်တွေရှိတာလို့ ပြောနေကြတဲ့ အပေါ်မှာရော အန်ကယ့်အနေနဲ့ ဘယ်လိုမှတ်ချက်ပေးချင်ပါသလဲ။
ဖြေ။ ။ အန်ကယ်တို့ ကိုယ့်ကိုယ်ကို ခံယူထားတာက အန်ကယ် တို့က နိုင်ငံသားတွေ ပြည်ထောင်စုသားတွေပါ။ မြေပေါ်မှာ တရားဝင်ရပ်တည်နေတာပါ။ ပြည်တွင်း မှာလည်း ပြည်ထောင်စုသား မွတ်စလင်တွေရှိတယ်။ မြန်မာနိုင်ငံကနေ နိုင်ငံရပ်ခြားမှာ အလုပ် လုပ်ကိုင်နေကြတဲ့ ပြည်ထောင်စုသား မွတ်စလင်တွေရှိတယ်။ သူတို့တွေရဲ့ အရေးကိစ္စတွေကို လက်ရှိ ရှိနေတဲ့ တည်ဆဲဥပဒေတွေအတိုင်း ပြည်တွင်းမှာ ကြိုးပမ်းဆောင်ရွက်နေတာဖြစ်တယ်။ အဲဒီအခါ လက်ရှိ ရှိနေတဲ့ ဥပေဒတွေကို မဖောက်ဖျက်ဘဲနဲ့ပဲ ပြုလုပ်မှာဖြစ်ပါတယ်။ အများပြည်သူကိုလည်း ပွင့်လင်းမြင်သာမှုရှိစွာ တင်ပြသွားမှာပါ။
မေး။ ။ အန်ကယ်အနေနဲ့ တခြားဘာများ ဖြည့်စွက်ပြောကြားချင်ပါသေးသလဲ။
ဖြေ။ ။ ပြည်ထောင်စုသား မွတ်စလင်များ ပြည်လုံးကျွတ် ညီလာခံကျင်းပရေး ကော်မတီဆိုတာ ညီလာခံ ကျင်းပပေးဖို့ တာဝန်ပဲရှိတာပါ။ ညီလာခံ ကျင်းပနိုင်ခွင့်ကိုပဲ ကြိုးပမ်းပေးဖို့ပဲရှိတယ်။ အန်ကယ်တို့က အဖွဲ့အစည်း တစ်ခုလည်း မဟုတ်ဘူး။ ဘာသာရေး အဖွဲ့ ၆ ဖွဲ့မြောက်လည်း မဟုတ်ဘူး။ နိုင်ငံရေး အဖွဲ့လည်းမဟုတ်ပါဘူး။ CSO အဖွဲ့အစည်း သာဖြစ်တယ်။ ခေါင်းဆောင်တွေ လည်း မဟုတ်ဘူး။ လုပ်ပိုင်ခွင့်တွေလည်း မရှိပါဘူး။ တချို့တွေက အထင်မှားပြီး ခေါင်းဆောင် လုပ်နေကြတယ်။ အဖွဲ့သစ် ထပ်ဖွဲ့တယ်လို့ ပြောနေတာတွေက လုံးဝမဟုတ်ပါဘူး။ ကျန်တဲ့ ကိစ္စ အနာဂတ်အစီအစဉ်တွေက ညီလာခံကို မြန်မာတစ်နိုင်ငံလုံးက တက်ရောက်လာတဲ့ ကိုယ်စားလှယ်တွေက ဆွေးနွေးပြီး ဘာလုပ်ဆိုတာ ဆုံးဖြတ်သွားမှာပါ။ ဒီညီလာခံကြီးရဲ့ ရည်ရွယ်ချက်က ဘာလဲဆိုတာ သိအောင်လုပ်ပြီး လက်တွဲဝိုင်းဝန်း ကူညီပေးကြပါရင် အဆင်ပြေမှာပါ။
Comments