ယူကေတွင် ကလေးများအား လိင်ပိုင်းဆိုင်ရာ စော်ကားမှုများ၌ အောင်မြင်ကျော်ကြားသူ အမြောက်အများပါဝင်

မေ ၂၁၊ ၂၀၁၅
M-Media

– ဗြိတိန်တွင် ကလေးငယ်များအား လိင်ပိုင်းဆိုင်ရာ စော်ကားမှုအတွက် စုံစမ်းစစ်ဆေးမှုမှ ထွက်ပေါ်လာသည့် သံသယရှိသူများ စာရင်းတွင် နာမည်ကြီး အနုပညာရှင်များ၊ တေးသံရှင်များ၊ နိုင်ငံရေးသမားများ ပါဝင်ခဲ့သည်ဟု သိရသည်။

ဗြိတိန်ဖျော်ဖြေရေးလောကတွင် လူကြိုက်များခဲ့သည့် နာမည်ကြီး ရုပ်ရှင်မင်းသားဟောင်း ဂျင်မီ ဆာဗီလ်းမှာ ကလေးငယ်များအား လိင်ပိုင်းဆိုင်ရာ စော်ကားမှုကို ကျယ်ကျယ်ပြန့်ပြန့် ကျူးလွန်ခဲ့သည်ဟု ITV မှတ်တမ်းရုပ်ရှင်တွင် ၂၀၁၂ ခုနှစ်က အောက်တိုဘာလက ဖော်ပြခဲ့ပြီးနောက်ပိုင်း နာမည်ကြီးသူများ အသိုင်းအ၀ိုင်းတွင် ထိုပြဿနာများ အမြောက်အများ ရှိနေသည်ဟူသော စွပ်စွဲချက်များ ပေါ်ထွက်လာခဲ့သည်။

ထို့ကြောင့် ရဲတပ်ဖွဲ့က ပြီးခဲ့သည့်နွေရာသီတွင် Hydrant စစ်ဆင်ရေးတစ်ခုကို စတင်ခဲ့ပြီး နိုင်ငံတစ်ဝှမ်း ရဲတပ်ဖွဲ့သို့ ရောက်ရှိလာသည့် ကလေးငယ်များအား လိင်ပိုင်းဆိုင်ရာ စော်ကားမှုနှင့်ပတ်သက်၍ တိုင်ကြားမှုများအတွက် စုံစမ်းစစ်ဆေးခြင်းကို ကြီးကြပ်ဆောင်ရွက်ခဲ့သည်။

ထိုသို့ စုံစမ်းစစ်ဆေးခြင်းမှ ရရှိလာသည့် မှတ်တမ်းများကို ယမန်နေ့က ထုတ်ပြန်ခဲ့ရာ ကလေးများအား လိင်ပိုင်းဆိုင်ရာ စော်ကားမှုမှာ မကြာမီနှစ်များအတွင်း ၃၁ ရာခိုင်နှုန်း တက်လာသည်ကို တွေ့ရှိခဲ့ရပြီး ယခင်က ကျူးလွန်မှုအတွက် တိုင်ကြားမှုများမှာလည်း ၁၆၅ ရာခိုင်နှုန်း မြင့်တက်လာသည်ဟု အမျိုးသားရဲတပ်ဖွဲ့ အကြီးအကဲများ ကောင်စီက ပြောကြားခဲ့သည်။

အဆိုပါအမှုများအတွက် သံသရှိသူများမှာ ၁၄၃၃ ဦးရှိပြီး ၎င်းတို့အထဲမှ ၂၁၆ ဦးမှာ သေဆုံးခဲ့ပြီဖြစ်သည်။ ၆၆၆ ဦးမှာ အသင်းအဖွဲ့များနှင့် ဆက်စပ်နေပြီး ၂၆၁ ဦးမှာ ပြည်သူများအကြား ထင်ရှားသူများ ဖြစ်နေသည်ဟု အစီရင်ခံစာတွင် ထည့်သွင်းဖော်ပြထားသည်။

ကလေးများအား လိင်ပိုင်းဆိုင်ရာ စော်ကားမှုအတွက် သံသယရှိသော ထင်ရှားကျော်ကြားသူများတွင် တီဗီ၊ ရုပ်ရှင်နှင့် ရေဒီယိုလောကမှ ၁၃၅ ဦး၊ ဒေသတွင်းနိုင်ငံရေးသမားနှင့် နိုင်ငံလုံးအဆင့် နိုင်ငံရေးသမား ၇၆ ဦး၊ ဂီတလောကမှ ၄၃ ဦးနှင့် အားကစားလောကမှ ၇ ဦးတို့ ဖြစ်သည်။

ရဲတပ်ဖွဲ့မှာ အဆိုပါ စစ်ဆင်ရေးနှင့် ဆက်နွယ်၍ စာသင်ကျောင်း ၁၅၄ ကျောင်း၊ ကလေးများဂေဟာ ၇၅ ခုတို့အပါအ၀င် အသင်းအဖွဲ့ပေါင်း ၃၅၇ ခုကို စောင့်ကြည့်စုံစမ်းမှုများ ပြုလုပ်နေသည်။ ယခုကဲ့သို့ အစီရင်ခံစာ ထွက်ပေါ်လာမှုက ယူကေတွင် လူငယ်များအပါအ၀င် ယုံကြည်မှု ချိုးဖောက်ခံရခြင်း၏ အနေအထားကိုလည်း ဖော်ပြနေခြင်းဖြစ်သည်။

ထို့ပြင် ပြစ်မှုကျူးလွန်သူ လူငယ်များအပါအ၀င် ဒါဇင်နှင့်ချီသော ဘာသာရေးအသင်းအဖွဲ့များ၊ ဆေးဘက်ဆိုင်ရာအဖွဲ့များ၊ လူမှုရေးအသင်းအဖွဲ့များကိုလည်း အဆိုပါ စစ်ဆင်ရေးနှင့် ဆက်စပ်၍ ရဲတပ်ဖွဲ့က လေ့လာစောင့်ကြည့်မှုများ ပြုလုပ်နေသည်။

နာမည်ကျော်ကြားသူများ၏ လိင်ပိုင်းဆိုင်ရာ စော်ကားမှုအချို့မှာ တရားရုံးသို့ ရောက်ရှိနေပြီဖြစ်သည်။

ယခင် ပေါ့ပ်အဆိုတော်ဟောင်း ဂါရီ ဂလစ်တာမှာ လွန်ခဲ့သည့် နှစ် ၃၀ အရင်က ကျူးလွန်ခဲ့သည့် ကလေးငယ် လိင်ပိုင်းဆိုင်ရာ စော်ကားမှုအတွက် ယခုနှစ် ဖေဖော်ဝါရီ ၁၆ ရက်နေ့တွင် ထောင်ဒဏ် ၁၆ နှစ် ကျခံခဲ့ရသည်။

နိုင်ငံရေးသတင်းဆောင်ပါးရေးသူ မက်စ် ကလစ်ဖို့ဒ်မှာ မိန်းကလေးငယ်များကို စော်ကားမှုအတွက် ထောင်ဒဏ် ၈ နှစ် ချမှတ်ခံခဲ့ရပြီး သြစတေးလျ ဖျော်ဖြေရေးသမား ရော့လ်ဖ် ဟားရစ်ကလည်း မိန်းကလေးငယ် ၄ ဦးအား မသင့်တော်သည့် စော်ကားမှုအတွက် ထောင်ဒဏ် ၅ နှစ် ချမှတ်ခံခဲ့ရသည်။

Ref: CNN