အမေရိကန်၏ ပစ်မှတ်ထားခံရမှုကြောင့် နိုင်ငံသားများအား ရုရှားက ခရီးသွားသတိပေးချက် ထုတ်ပြန်

မေ ၂၃၊ ၂၀၁၅
M-Media

– အမေရိကန်က ကမ္ဘာတစ်ဝှမ်းတွင် ရုရှားနိုင်ငံသားများအား အမဲလိုက်နေခြင်းကြောင့် နိုင်ငံသားများအနေဖြင့် နိုင်ငံရပ်ခြားသို့ ခရီးသွားလာသည့်အခါ အန္တရာယ်အားလုံးကို ချင့်ချိန် တွက်ဆထားကြရန် ရုရှားနိုင်ငံခြားရေး ၀န်ကြီးဌာနက ကြေညာချက်ထုတ်ပြန်လိုက်သည်။

နိုင်ငံရပ်ခြားရှိ ရုရှားနိုင်ငံသားများမှာ အမေရိကန် ဥပဒေစိုးမိုးရေးအဖွဲ့များနှင့် ထောက်လှမ်းရေးအဖွဲ့များ၏ ဖမ်းဆီးထိန်းသိမ်းခြင်း ခြိမ်းခြောက်မှုကို ခံနေရပြီး အထူးသဖြင့် အမေရိကန်နှင့် သဘောတူစာချုပ် ချုပ်ထားသည့် နိုင်ငံများတွင်ဖြစ်သည်ဟု အဆိုပါ
ကြေညာချက်တွင် ထည့်သွင်းဖော်ပြထားသည်။

မော်လ်ဒိုက်နိုင်ငံတွင် အမေရိကန် ထောက်လှမ်းရေးအေးဂျင့်များ၏ ပြန်ပေးဆွဲမှုကို ခံခဲ့ရပြီး ၂၀၁၄ ခုနှစ် ဇူလိုင်လတွင် အမေရိကန်သို့ အတင်းအဓမ္မ လွှဲပြောင်းပေးအပ်ခံခဲ့ရသည့် ရုရှားနိုင်ငံသား ရိုမန် ဆီလီဇန်ယွဗ်ကို ထောက်ပြ၍ အမေရိကန် တပ်ဖွဲ့များမှာ အခြားနိုင်ငံမှ ရုရှားနိုင်ငံသားများကို ပြန်ပေးဆွဲသည်ဟုလည်း အဆိုပါ အကြေညာချက်တွင် ထည့်သွင်းဖော်ပြထားသည်။ ဆီလီဇန်ယွဗ်မှာ
ယခုအချိန်အထိ အမေရိကန်၏ ထိန်းသိမ်းခြင်းကို ခံနေရသည်။

အမေရိကန် တပ်ဖွဲ့များ၏ ဖမ်းဆီးခြင်းကို ခံရသူများမှာ သက်သေအထောက်အထား မရှိသော်လည်း ဖြောင့်ချက်ပေးရန် ခြိမ်းခြောက်ခံရခြင်း၊ ထိုသို့ ခြိမ်းခြောက်၍ မရပါက ရိုက်နှက်ခံရခြင်းတို့ ရှိနေသည်ဟုလည်း ရုရှားနိုင်ငံခြားရေးဝန်ကြီးဌာနက ထည့်သွင်းပြောကြားခဲ့ပြီး အမေရိကန်တို့၏ ဖမ်းဆီးခြင်းခံထားရသည့် ဗစ်တာ ဘောက်နှင့် ကွန်စတန်တင် ယာရိုရှန်ကိုတို့ကို ဥပမာပေးခဲ့သည်။

ယာရိုရှန်ကိုမှာ အမေရိကန်သို့ မူးယစ်ဆေးဝါး မှောင်ကိုသွင်းရာတွင် ပူးပေါင်းကြံစည်မှုဖြင့် ၂၀၁၁ ခုနှစ်က ထောင်ဒဏ် နှစ် ၂၀ ကျခံခဲ့ရသူဖြစ်ပြီး ထိုအမှုအတွက် ပြန်လည်စစ်ဆေးပေးရန် တောင်းဆိုမှုကို နယူးယောက်တရားရုံးက ငြင်းပယ်ခဲ့သည်။ ၎င်းအား လိုက်ဘေးရီးယားတွင် ဖမ်းဆီးခဲ့ခြင်းဖြစ်ပြီး ဖမ်းဆီးသည့်အချိန်တွင် ရုရှားက ကန့်ကွက်ခဲ့ကာ သံတမန်စည်းမျဉ်းကို
ချိုးဖောက်ခြင်းဖြစ်သည်ဟု ပြောကြားခဲ့သည်။

ဗစ်တာဘောက်မှာ စီးပွားရေးသမားတစ်ဦးဖြစ်ပြီး အမေရိကန်တွင် ထောင်ဒဏ် ၂၅ နှစ် ကျခံနေရသူဖြစ်ကာ မိမိနိုင်ငံသို့ပြန်ပို့ရန် ရုရှား၏တောင်းဆိုမှုကို အမေရိကန်က ငြင်းဆန်ခဲ့သည်။

Ref: RT