နည်းပြ အန်ဆယ်လော့တီအား ရီးယဲလ် ထုတ်ပယ်

မေ ၂၆၊ ၂၀၁၅
M-Media

– ရီးယဲလ်ပရိတ်သတ်များ မျှော်လင့်နေခဲ့သည့် ၁၀ ကြိမ်မြောက် ချန်ပီယံလိဂ်ဖလားကို ပြီးခဲ့သည့်နှစ်က ရယူပေးနိုင်ခဲ့သည့် နည်းပြ အန်ဆယ်လော့တီအား ထုတ်ပယ်လိုက်သည်ဟု ရီးယဲလ်မက်ဒရစ်က ကြေညာခဲ့သည်။

ရီးယဲလ်မှာ ပထမရာသီဝက်အထိ ပုံစံကောင်းများ ပြသနိုင်ခဲ့ပြီး လာလီဂါဇယားအား ဦးဆောင်နိုင်ခဲ့သော်လည်း ၂၀၁၅ ခုနှစ် နှစ်ဆန်းပိုင်းမှ စ၍ ရလဒ်များ ဆိုးရွားခဲ့ကာ လာလီဂါတွင် ဘာစီလိုနာ၏ ကျော်တက်ခြင်းကို ခံခဲ့ရပြီး ချန်ပီယံလိဂ် ဆီမီးဖိုင်နယ်တွင်လည်း ဂျူဗင်တပ်စ်ကို ရှုံး၍ ထွက်ခဲ့ရသည်။

ထိုအခြေအနေများကြောင့် အန်ဆယ်လော့တီမှာ ရာသီကုန်တွင် အသင်းမှ ထွက်ရတော့မည်ဟု အများစုက မျှော်လင့်နေခဲ့ကြသည်။

“ကားလို့စ် အန်ဆယ်လော့တီကို ရီးယဲလ်မက်ဒရစ်နည်းပြအဖြစ် သူ့ရဲ့တာဝန်တွေကနေ အနားပေးဖို့ ကျွန်တော်တို့ ဆုံးဖြတ်ခဲ့တယ်ဆိုတာ ကျွန်တော် ပြောချင်ပါတယ်။ ဒါဟာ ဘုတ်အဖွဲ့အတွက် တော်တော်လေးခက်ခဲတဲ့ ဆုံးဖြတ်ချက်ပါ။ ဒါပေမယ့် ကျွန်တော် အမြဲတမ်းပြောခဲ့သလိုပါပဲ။ ကျွန်တော်တို့ဟာ ဆုံးဖြတ်ချက် လွယ်လွယ်ချဖို့ ဒီမှာရှိနေတာ မဟုတ်ပါဘူး။ အဖွဲ့အစည်းအတွက်
အကောင်းဆုံး ဆုံဖြတ်ချက်ချဖို့ ရှိနေတာပါ” ဟု ရီးယဲလ်မက်ဒရစ် ဥက္ကဌ ဖလော်ရန်တီနို ပီရက်ဇ်က ပြောကြားခဲ့သည်။

ထို့ပြင် အန်ဆယ်လော့တီမှာ ဘုတ်အဖွဲ့၊ မိမိကိုယ်တိုင်နှင့် ပရိတ်သတ်များ၏ မေတ္တာကို ရရှိခဲ့ပြီး မိမိတို့အသင်းသမိုင်း၏ အစိတ်အပိုင်းဖြစ်သော်လည်း အသင်း၏ တောင်းဆိုမှုများမှာ ကြီးမားကြောင်း ၎င်းက ထည့်သွင်းပြောကြားခဲ့သည်။

အန်ဆယ်လော့တီကမူ မိမိအနေဖြင့် ရီးယဲလ်တွင် ကုန်ဆုံးသည့်အချိန်များကို အမှတ်ရနေမည်ဟု ပြောကြားခဲ့သည်။

“ရီးယဲလ်မက်ဒရစ်က ကောင်းမွန်တဲ့ ဒီ ၂ နှစ်တာကို ကျွန်တော် အမှတ်ရနေမှာပါ။ အသင်း၊ ပရိတ်သတ်တွေနဲ့ ကစားသမားတွေကို ကျွန်တေ်ာ ကျေးဇူးတင်ပါတယ်” ဟု အန်ဆယ်လော့တီက ဆိုရှယ်စာမျက်နှာမှတစ်ဆင့် ပြောကြားခဲ့သည်။

လက်ရှိအချိန်တွင် နာပိုလီအသင်းနည်းပြ ဘင်နီတက်ဇ်မှာ ရီးယဲလ်နည်းပြသစ်ဖြစ်လာရန် ရေပန်းစားနေသည်။

Ref: Goal