စပိန်ဘုရင့်ဖလားပွဲ မက်ဆီ၏ဂိုးမှာ တစ်ခြားကမ္ဘာမှဖြစ်သည်ဟု နည်းပြဆို

မေ ၃၁၊ ၂၀၁၅
M-Media

– ဘီလ်ဘာအိုအသင်းအား ၃ ဂိုး ၁ ဂိုးဖြင့် အနိုင်ရရှိခဲ့သည့် စပိန်ဘုရင့်ဖလား ဗိုလ်လုပွဲတွင် မက်ဆီ၏ အံအားသင့်ဖွယ်ခြေစွမ်းကို ဘာစီလိုနာနည်းပြ လူးဝစ်အန်းရစ်က ချီးကျူခဲ့ပြီး ၎င်း၏ ဂိုးမှာလည်း အခြားကမ္ဘာမှ လာသည့်ဂိုး ဖြစ်သည်ဟု ပြောကြားခဲ့သည်။

ယနေ့နံနက်ပိုင်းက ကစားခဲ့သည့် အဆိုပါပွဲတွင် မက်ဆီမှာ အကောင်းဆုံး ခြေစွမ်းပြနိုင်ခဲ့ပြီး မိနစ် ၂၀ တွင် တစ်ကိုယ်တော်ထိုးဖောက်မှုဖြင့် ပထမဂိုးကို လှပစွာ သွင်းယူခဲ့ကာ ၇၄ မိနစ်တွင် တတိယမြောက်ဂိုးကို ထပ်မံသွင်းယူပေးနိုင်ခဲ့သည်။

“ကျွန်တော်တို့ ဒီမက်ဆီနဲ့ အသားကျနေပါပြီ။ သူ့ကို နေ့စဉ် လေ့ကျင့်ခန်းမှာ မြင်နေရတာဟာ ကျွန်တော်တို့ ကံကောင်းပါတယ်။ သူ့ရဲ့ ပထမဂိုးကတော့ တစ်ခြားကမ္ဘာက လာတာပါပဲ။ အဲဒီဂိုးကို တီဗီမှာပြန်ကြည့်ဖို့ ကျွန်တော် မစောင့်နိုင်တော့ပါဘူး။ နည်းပြတစ်ယောက်ဖြစ်ရတာဟာ ဒီဂိုးကို သေသေချာချာကြည့်ဖို့ ခက်ခဲပါတယ်” ဟု အန်းရစ်က ပွဲအပြီးတွင် ပြောကြားခဲ့သည်။

လာလီဂါဖလားကို ဆွတ်ခူးရရှိထားသည့် ဘာစီလိုနာအတွက် စပိန်ဘုရင့်ဖလားမှာ ယခုနှစ်ရာသီ ဒုတိယမြောက်ဖလားဖြစ်ပြီး ဇွန်လ ၆ ရက်နေ့တွင် ဂျူဗင်တပ်စ်အသင်းနှင့် ချန်ပီယံလိဂ်ဗိုလ်လုပွဲတွင် အနိုင်ရပါက ဘာကာ၏ ဖလားသုံးလုံးမျှော်လင့်ချက် အထမြောက်မည်ဖြစ်သည်။

ထိုပွဲတွင် နေးမာက ဒုတိယမြောက်ဂိုး သွင်းယူပေးခဲ့ပြီး မက်ဆီ၊ နေးမာနှင့် ဆွာရက်ဇ်တို့၏ တိုက်စစ်အတွဲမှာ ရော်နယ်ဒို၊ ဘန်ဇီမာနှင့် ဟီဂူအင်တို့ တိုက်စစ်အတွဲ၏ ၂၀၁၁-၁၂ ဘောလုံးရာသီက တင်ထားသော တစ်ရာသီအတွင်း ဂိုးအများဆုံးသွင်းနိုင်ခဲ့သည့် စံချိန်ကို ကျော်ဖြတ်နိုင်ခဲ့ပြီဖြစ်သည်။

Ref: Goal