ခေတ် ဖက်ရှင်ဖြစ်လာတဲ့ ကုလားမုန်းဝါဒ

ဇွန် ၃ ၊ ၂၀၁၅
M-Media
ခင်မောင်ထွန်း(MDY) ရေးသည်။
.
ခေတ်ဖက်ရှင်ဖြစ်လာတဲ့ ကုလားမုန်း ဝါဒထဲ သယ်ချင်းတွေ ဒရောသောပါး ဝင်လာနေသည်။ မသိနားမလည် နားမလည်မှု့မှ မြစ်ဖျား ခံလာသော အတွေးအမြင်တွေကို တင်ပြလာသည်။ ဘာသာရေးတိုက်ခိုက်မှု့များနှင့် ပတ်သက်၍ ပြန်လည်ဖြေရှင်းမှု့များကို မလုပ်ချင်တော့ပါ။ သို့ပေမယ့် သူငယ်ချင်း ပညာတတ် တယောက်ဖြစ်နေ၍ မနေနိုင်လို့ပြန်ရှင်းခြင်းဖြစ် ပါသည်။ သို့ရာတွင် သူငယ်ချင်း wall ပေါ် ပြန်မန့်လို့ မရလို့ ကိုယ့်ဖာသာပဲ post တင်လိုက်တာပါ။ ငြိမ်းချမ်းသော အတွေးအခေါ်မှာ ရှင်သန်ပြီး မသိနားမလည် မလိုလားခြင်းများ ကင်းဝေးကြပါစေ။
.
ရိုးရိုးသားသားတွေးပြီးဖြေပါမည်။
.
၁ ။ မွတ်စလင်အရေးက ငြိမ်ငြိမ်ချမ်းချမ်းဖြေရှင်း မရတော့ဘူးထင်တယ် ဆိုရာမှာ မြန်မာ မွတ်စလင်တွေက အုပ်စုအားကိုးနဲ့ တခြားဘာသာရဲ့ အိမ်၊ ကျောင်း၊သာသနိက အဆောက်အဦ၊ လူတွေကို တိုက်ခိုက် ရန်မူတာမျိုးရှိခဲ့ပါသလား? မြန်မာပြည်က မွတ်စလင်တို့ရဲ့ အသက်အိုးအိမ် စည်းစိမ်တွေသာ ဖျက်ဆီးခြင်း ခံရတာသေချာပါသည်၊ အမုန်းတရားလှုံ့ဆော်နေသော နိုင်ငံရေး အသာစီးရလိုသော လူတစု၏ စနစ်တကျ လုပ်ကွက်များဖြစ်နေတာကို ရိုးသားသူတွေ ဒေါသမာန် တက်စေခြင်းဖြစ်နေတာကို သိပါသလား? အရင်းအမြစ်က အစိုးရ ကိုယ်တိုင်ဖြစ်နေ၍ ထို root cause ကို ဖြေရှင်းနိုင်လျှင် ငြိမ်းချမ်းပါမည်။  ယခုထိ အိုးအိမ်ပျက်ဆီး ထိခိုက်သူများမှ ဘာမှ မတတ်နိုင် လက်မှိုင်ချ စိတ်အားငယ်ကြောက်ရွံ့နေရတာကို သင်သာ ခံစားရသူဖက်က ရှိခဲ့မည်ဆိုလျှင် သေချာ နားလည်ပါလိမ့်မည်။ တစုံတရာ အသံကြားရပြီဆိုလျှင် တထိတ်ထိတ် တလန့်လန့်နဲ့ နေထိုင်ရတဲ့ ဘဝတွေကို သိပါသလား?
.
၂ ။ ကျုးကျော်သူတွေကို ဘာသာတူလို့ ဘက်လိုက်ငြင်းတာ ဆိုသောအချက် မဟုတ်ပါ၊ တိုင်းရင်းသား အဖြစ်ရှိနေသော ကမန် လူမျိုးအပါအဝင် အမည်နာမ အငြင်းခံနေရသော လူမျိုးစုတစုတို့သည် ရှေးယခင် ကတည်းက မြန်မာပြည်ကြီးမှာ အသေအချာ ရှိနေတာကို သိပါသလား? နှစ်ပေါင်း ရာချီသက်တမ်းရှိ ဗလီကြီးများ ရှိနေပါသေးသည်။၊ ခိုးဝင်ရှိကောင်းရှိမည် ဆိုသော်လည်း အထက်ပါ ခိုးဝင်ဆိုတဲ့ စကားရပ်ကို ရခိုင်တွင် မူလ ဘူတ ကတည်းက ရှိခဲ့သော မွတ်စလင်တို့ကိုပါ ရည်ညွှန်း တိုက်ခိုက်လာနေခြင်းဖြစ်သည်ကို သိပါသလား?
.
မြန်မာပြည်တွင် ဗုဒ္ဓဘာသာဝင်သာ ရှိသည်ဟူသော logic အတွေးမှ ဒီအမြင်ဖြာ ထွက်လာခြင်းဖြစ်နိုင်ပါသည်။ လှေစီးပြေး ဖမ်းမိ တဖက်နိုင်ငံက ဘင်္ဂါလီများကို ဘယ်ပြည်တွင်း မွတ်စလင်မှ လက်မခံပါ။ ကျုးကျော်လာသူများကို မည်သည့် ဘာသာဖြစ်စေ လက်မခံနိုင်ပါ၊ သို့သော် တဖက်နိုင်ငံတွင် ရှိနေသော ရခိုင် ဗုဒ္ဓဘာသာဝင်များကို အလုံးအရင်း ဝင်ရောက်နေတာကို သိပါသလား? အဆိုပါသူများမှာ မြန်မာ့ဥပဒေပါ အချက်များ အရ နိုင်ငံသားများ မဟုတ်ပါ။
.
NLD ရော အစိုးရဖက်ကရော racist တွေ အများကြီးရှိနေပါသည်၊ အစိုးရဖက်က တမင် ရည်ရွယ်ချက်နှင့် လုပ်နေတာဖြစ်၍ တဖက်ကတော့ လူတွင်ကျယ်လုပ်လို၍ လူအများ လူပြိန်းကြိုက် ဘာသာရေးအကြောင်းနဲ့ စင်ပေါ်ရောက်ချင်လို၍ဖြစ်သည်ဟု နားလည်သည်။
.
၃ သူများနိုင်ငံက ဆိုးသွမ်း အစွန်းရောက်တာ များကို မြန်မာပြည်တွင်းနေများနှင့် ရောထွေး စဉ်းစား သုံးသပ်ခြင်းမှာ မြန်မာ မွတ်စလင်များကို ကိုယ်နှင့်မတူ Outsider များ အဖြစ် သင် မှတ်ယူထား၍ သာဖြစ်ပါသည်၊ ပြသနာက အဲ့ဒါဖြစ်ပါသည်၊ အဆိုပါနိုင်ငံများမှ ရူးသွပ်သူတို့၏ အပြုအမူများကို ဒီမှာရှိနေသော လူနည်းစုများအပေါ် ရောင်ပြန်ဟပ်ခြင်းဖြစ်ပါသည်၊ majority ၏ စိုးမိုးနှိပ်ဆက်မှု့ကို မြန်မာပြည်သားတွေ ပုံတူးကူးချလာအောင် စစ်အစိုးရ လုပ်နေပါသည်။ သွေးခွဲပါသည်။ ရန်တိုက်ပါသည်။
.
ဆော်ဒီ၊ အီရန်၊ အီရတ်တို့တွင် majority ကြီးစိုးမှု့မှ အစွန်းရောက် အတွေးအခေါ်များ ဖြစ်ပေါ်နေသလားဆိုတာ သူတို့ လုပ်ရပ်သာဖြစ်၍ မြန်မာပြည်တွင်းမှ မွတ်စလင်များနှင့် မည်သို့မှ မသက်ဆိုင်သည်ကို ဆက်စပ်ပြီး သူတို့ဆီမှာတော့ မရှိလို့ ငါတို့ဆီမှာ မရှိရဘူးဟုထင်မြင်လျှင် အထက်ပါ သူတို့စိတ်ဓာတ်ကို ပုံတူ အားကျခြင်းမျိုးပဲဖြစ်နိုင်ပါသည်။
.
အင်ဒို၊ မလေးတို့မှာ မြန်မာဘုန်းကြီးကျောင်းများရှိသည်ဟု သိရသည်။ အစွန်းရောက် လူပေလူတေများ၏ မြန်မာသံရုံး ဗုံးခွဲဖို့ ကြံစည်သည်များကို အမြန်ဖြိုခွင်းကာ၊ တလောက ဆန္ဒပြမှု့ကို ချက်ချင်းဖြိုခွဲသော နိုင်ငံများဖြစ်သည်။ အင်ဒိုနီးရှားတွင်  ရှေးအကျဆုံးနှင့် အကြီးဆုံးဘုရားကြီးကိုလည်း ထိန်းသိမ်းစောင့်ရှောက်ထားတာကို သိမြင်နိုင်ပါသည်။ မလေးသည်လည်း အလားတူသာဖြစ်သည်။
.
ကုရ်အာန်ကျမ်းရဲ့ အဆိုအမိန့်ထဲက တချို့အချက်တွေဟာ အင်မတန်ဆိုးပါသည် ဟူသော အတွေးကို မည်သည့် source မှ လက်ခံထားပါသနည်း? သူငယ်ချင်းအနေနဲ့ တခြားဘာသာရဲ့ အမွန်အမြတ်ကို သည်လို မဝေဖန်သင့်ပါ၊ ကိုယ်က သယ်ချင်းတို့ အမွန်အမြတ်ကို ဝေဖန်မည်ဆိုလျှင် လက်မခံမှာ သေချာ ပါသည်။ ကုရ်အာန် ကို စော်ကားထိခိုက်တာမျိုးကို အင်တာနက်မှ ဟောင်နေသော ခွေးတို့သာ လုပ်ပါစေ၊
.
စစ်အစိုးရပေါ်လာမှ၊ တိတိကျကျဆိုလျှင် ကြားဖြတ်ရွေးကောက်ပွဲပြီးမှ ဘာသာရေး ပြသနာတွေပေါ်လာတာကို သူငယ်ချင်း သတိချပ်ပါ၊
.
အရင်းအမြစ်က အမုန်းတရားများ ဖြန့်ဖြူးနေသော ဘုန်းကြီးတုများ၏ ဗုဒ္ဓဓလေ့နှင့် မအပ်စပ်သော အပြုအမူများကို ရပ်တန့်စေလျှင်ပြီးပါပြီ၊ ဒီအစိုးရပြုတ်လျှင် ငြိမ်းချမ်းပါပြီ၊ အန္တရာယ်က ကိုယ်တို့လူနည်းစုအပေါ်မှာ ကျရောက်နေ၍ လူအများစုအနေနှင့် ကိုယ်နှင့်မဆိုင်၊ ငါတို့က ဘာမှမဖြစ်ဟု စိတ်အေးနေနိုင်၊ သူများက ကုလားချဟေ့ဆိုတိုင်း ရောယောင် ချကြနှင် နေနိုင်သော်လည်း မွတ်စလင်များမှာ ဘယ်တော့ ငြိမ်းချမ်းမလဲဟု မျှော်လင့် စောင့်စားနေကြသူများချည်းဖြစ်သည်ကို စာနာပေးပါ။

Photo Credit- DVB