စင်ကာပူတွင် ၆၉ ခုမြောက် ဗလီဝတ်ကျောင်းတော်သစ် ဖွင့်လှစ်

ဇွန် ၆၊ ၂၀၁၅
M-Media

– မြင့်တက်လာတဲ့ မွတ်စလင်လူဦးရေရဲ့ ဘာသာရေးဆိုင်ရာ လိုအပ်ချက်ကို ဖြည့်ဆည်းပေးဖို့ ရည်ရွယ်ပြီး ဆောက်လုပ်ခဲ့တဲ့ စင်ကာပူက အလ်-အစ္စလာဟ် ဗလီဝတ်ကျောင်းတော်ကို မနေ့က ဖွင့်လှစ်လိုက်ပါတယ်။

စင်ကာပူ အရှေ့မြောက်ပိုင်း Punggol ဒေသမှာရှိတဲ့ အဲဒီဗလီဝတ်ကျောင်းတော်ဟာ ခေတ်မီ ဗလီဝတ်ကျောင်းတော်ဖြစ်ပြီး လူပေါင်း ၄၀၀၀ ခန့် ၀တ်ပြုနိုင်မှာဖြစ်ပါတယ်။ ဒီဗလီဝတ်ကျောင်းတော်မှာ အစ္စလာမ့် ဓမ္မသင်ခန်းစာတွေ သင်ကြားနိုင်မယ့် အခန်းတွေလည်း ပါဝင်ပါတယ်။

ဒီဗလီဝတ်ကျောင်းတော်ကို စင်ကာပူအစိုးရ အသိအမှတ်ပြု  ဗလီဝတ်ကျောင်းတော် တည်ဆောက်ရေးနဲ့ မန်ဒါကီ ရန်ပုံငွေအဖွဲ့ MBMF ရဲ့ အစီအစဉ်အောက်က ဆောက်လုပ်ခဲ့တာဖြစ်ပြီး စင်ကာပူနိုင်ငံရဲ့ ၆၉ ခုမြောက် ဗလီဝတ်ကျောင်းတော်ဖြစ်ကာ MBMF လက်ထက်မှာ ဆောက်လုပ်ခဲ့တဲ့ ၂၄ ခုမြောက် ဗလီဝတ်ကျောင်းတော်လည်း ဖြစ်ပါတယ်။

ဝန်ကြီးချုပ်ဟောင်း လီကွမ်ယုက ၁၉၇၄ ခုနှစ် မွတ်စလင်ခေါင်းဆောင်တွေနဲ့ တွေ့တဲ့အခါ စင်ကာပူမွတ်စလင်တွေဆီက လစဉ် အလှူငွေနည်းနည်းစီ ထည့်ဝင်ပြီး စင်ကာပူက မွတ်စလင်လူ့အဖွဲ့အစည်း တိုးတက်ရေး ဆောင်ရွက်ဖို့ အကြံပြုခဲ့ရာကနေ ၁၉၇၅ ခုနှစ်မှာ MBMF အဖွဲ့ စတင် ပေါ်ပေါက်လာတာ ဖြစ်ပါတယ်။

စင်ကာပူနိုင်ငံသားတွေ၊ အမြဲတမ်းနေထိုင်ခွင့်နဲ့ အလုပ်လုပ်သူတွေအတွက် သူတို့ရဲ့ ပင်စင်ယူတဲ့အချိန် သုံးစွဲဖို့၊ ကျန်းမာရေးစားရိတ်နဲ့ နေထိုင်မှုလိုအပ်ချက်အတွက် လစဉ် အစိုးရထံမှာ ငွေစုရတဲ့ CPF စနစ်ရှိပြီး အဲဒီစနစ်မှာ ငွေစုကြတဲ့ မွတ်စလင်တွေထံကနေ လစဉ်
ငွေကြေးပမာဏတစ်ခုကို စင်ကာပူအစိုးရက ကောက်ယူပြီး MBMF ကို တစ်ဆင့် ပြန်လည် လွှဲပြောင်းပေးအပ်တာ ဖြစ်ပါတယ်။

အလ်-အစ္စလာဟ် ဗလီဝတ်ကျောင်းတော် ဖွင့်ပွဲနဲ့အတူ မနေ့က သောကြောနေ့ ၀တ်ပြုမှုကိုလည်း ပထမဆုံး ဆောက်တည်ခဲ့ကြပြီး အစ္စလာမ်ဘာသာဝင်အများအပြား တက်ရောက်ခဲ့ကြပါတယ်။

၂၀၁၀ ခုနှစ်က အချက်အလက်များအရ စင်ကာပူနိုင်ငံမှာ အစ္စလာမ်ဘာသာကို သက်ဝင်ယုံကြည်သူ အရေအတွက်ဟာ နိုင်ငံလူဦးရေရဲ့ ၁၅ ရာခိုင်နှုန်းရှိပြီး အများစုက မလေးလူမျိုး အစ္စလာမ်ဘာသာဝင်တွေ ဖြစ်ကြပါတယ်။

အဲဒီအစ္စလာမ်ဘာသာဝင်တွေရဲ့ ၁၇ ရာခိုင်နှုန်းဟာ တောင်အာရှနွယ်ဖွားတွေဖြစ်ကြပြီး တရုတ်လူမျိုး အစ္စလာမ်ဘာသာဝင်၊ အာရပ်လူမျိုး အစ္စလာမ်ဘာသာဝင်၊ ဥရောပ-အာရှလူမျိုး အစ္စလာမ်ဘာသာဝင် လူ့အဖွဲ့အစည်းတွေလည်း ရှိကြပါတယ်။

Ref: Islamic Religious Council of Singapore’s Facebook Page, Wiki