၅၉ လမ်း ဘိုင်သုလ်မာ ကော်မတီ မှ လူမျိုး/ဘာသာ မခွဲဘဲ ပညာရေးအတွက် ကူညီထောက်ပံ့

ဇွန် ၈၊ ၂၀၁၄
M-Media
မိုးစက်

ရန်ကုန်။    ။ ရန်ကုန်မြို့ ဆုတောင်းပြည့် အစ္စလာမ်ဝတ် ကျောင်းတော်(၅၉ လမ်း) ဘိုင်သုလ်မာ ကော်မတီမှ လူမျိုးဘာသာမရွေး ကျောင်းနေရွယ်ကလေးများကို ဇွန်လ ၇-ရက်နေ့တွင် ကျောင်းသုံးပစ္စည်းများ လှူဒါန်းခဲ့ပါသည်။

မည်သည့်မြို့နယ်တွင် နေထိုင်သူမဆို မည်သည့်ဘာသာဝင်မဆို သူငယ်တန်းမှ တက္ကသိုလ်ဝင်တန်း အထိ ပညာသင်ကြားနေသော ကျောင်းသား ကျောင်းသူများအတွက် လိုအပ်သည့် ကျောင်းသုံး ပစ္စည်းများ ထောက်ပံ့လှူဒါန်းခဲ့ကြောင်း သိရသည်။

“ကျွန်တော်တို့ ဘိုင်သုလ်မာ ကော်မတီ ကနေ ဒီကလေးငယ်တွေ အတွက် လိုအပ်မယ်ထင်တာလေးတွေကို လှူဒါန်းပေးတာပါ။ ကလေးတွေရဲ့ ပညာသင်ကြားရေးမှာ အထောက်အပံ့ဖြစ်အောင်လို့ပါ” ဟု လှူဒါန်းရသည့် ရည်ရွယ်ချက်နှင့် ပတ်သက်ပြီး ဆုတောင်းပြည့်အစ္စလာမ်ဝတ်ကျောင်းတော် ဘိုင်သုလ်မာကော်မတီမှ ဥက္ကဌ ဖြစ်သူ ဦးသန်းအောင်က ပြောကြားခဲ့ပါသည်။

ယခုနှစ် ၂၀၁၅-၂၀၁၆ ပညာသင်နှစ်အတွက် ကျောင်းသား ကျောင်းသူ (၁၆၄) ဦးအား ကျောင်းဝတ်စုံ၊ စာရေးကိရိယာ အစုံအလင်၊ ထီးနှင့် ငွေသားများ၊ စုစုပေါင်း (၁၇) သိန်း တန်ဖိုးကို လှူဒါန်းခဲ့ပါသည်။ ယင်းလှူဒါန်းငွေများကိုလည်း  ဆုတောင်းပြည့် အစ္စလာမ်ဝတ် ကျောင်းတော်မှ ဂျမ္မာသ်သားများမှ အပတ်စဉ် ထည့်သွင်းလှူဒါန်းခဲ့ကြောင်း သိရှိရပါသည်။

ကျောင်းသုံးပစ္စည်းများ လှူဒါန်းပွဲသို့ တွံတေးမြို့နယ်မှ လာရောက်သူ (၇) တန်းကျောင်းသား ဖခင်တစ်ဦးဖြစ်သူ ကလည်း “ကျွန်တော့် သားလေး ကျောင်းပစ္စည်းတွေကို ဒီမှာလာရောက်ယူတာ ၅ နှစ်လောက်ရှိပြီ။ ကျွန်တော်တို့မှာ လိုအပ်နေတာလေးတွေ ရတော့ အရမ်းကျေးဇူးတင်မိတယ်။ မိုးတွင်းဆိုတော့ ကလေးတွေ ထီးလိုတာပေါ့။ အခုလို ထီးလေးလဲ ထည့်ပေးတော့ ပိုအဆင်ပြေပါတယ်။ နောက်နှစ်လည်း ဒီထက်ပိုပြီး ပေးနိုင် ပါစေဗျာ” ဟု ပီတိစကားများကို ဝေမျှခဲ့ပါသည်။

ဆုတောင်းပြည့် အစ္စလာမ်ဝတ် ကျောင်းတော် ဘိုင်သုလ်မာ ကော်မတီမှ လူမျိုးဘာသာမရွေး ကျောင်းနေရွယ် ကလေးများကို ကျောင်းသုံးပစ္စည်းများ လှူဒါန်းပွဲမှာ ယခုနှစ်တွင် (၇)ကြိမ်မြောက် လှူဒါန်းခြင်းဖြစ်ကြောင်းလည်း သိရပါသည်။

အဆိုပါ ဘိုင်သုလ်မာကော်မတီကို ပရဟိတလုပ်ငန်းများ ဆောင်ရွက်နိုင်ရန်အတွက် ဖွဲ့စည်းထားခြင်းဖြစ်ပြီး ယင်းကော်မတီမှ ၂၀၀၄ ခုနှစ်ကတည်းက စတင်ကာ ပရဟိတလုပ်ငန်းများကို ဆောင်ရွက်ခဲ့ကြောင်း သိရသည်။ ယခုလက်ရှိတွင် ကျန်းမာရေးစောင့်ရှောက်မှုများ၊ သက်ကြီးဘိုးဘွားများအား တစ်လတစ်ကြိမ် ကရုဏာကြေးများ ထောက်ပံ့ပေးခြင်း၊ တက္ကသိုလ်ကျောင်းသား ကျောင်းသူများအား လစဉ်ပညာသင် ဆုကြေးများပေးအပ်ခြင်း စသည့် လုပ်ငန်းများကို လုပ်ဆောင်လျက်ရှိကြောင်း သိရသည်။