မလေးရှားငလျင်တွင် သေဆုံးသူများအတွက် နိုင်ငံတော်အောက်မေ့ဖွယ်နေ့ စင်ကာပူကြေညာ

ဇွန် ၈၊ ၂၀၁၅
M-Media

– မလေးရှားငလျင်အတွင်း သေဆုံးသွားခဲ့ကြသော နိုင်ငံသားများအတွက် စင်ကာပူနိုင်ငံက ယနေ့ကို နိုင်ငံတော် အောက်မေ့ဖွယ်နေ့အဖြစ် သတ်မှတ်ခဲ့ပြီး အစိုးရ အဆောက်အဦးများတွင် နိုင်ငံတော်အလံကို ၀မ်းနည်းခြင်းအထိမ်းအမှတ်အဖြစ် တိုင်တစ်ဝက် လွှင့်ထူခဲ့ကြသည်။

ပြီးခဲ့သည့်တစ်ပတ် သောကြာနေ့က မလေးရှားနိုင်ငံ ဆာဘားပြည်နယ်တွင် အင်အား ၅.၉ မဂ္ဂနီကျုရှိ ငလျင်တစ်ခု လှုပ်ခတ်ခဲ့ပြီးနောက် ကင်နာဘာလူတောင်ပေါ်သို့ လေ့လာရေးခရီးထွက်သွားသော Tanjong Katong မူလတန်းကျောင်းမှ ကလေးငယ် ၆ ဦးနှင့် လူကြီး ၂ ဦးတို့မှာ ငလျင်ကြောင့် သေဆုံးခဲ့ကြရသည်။

“ကင်နာဘာလူတောင်ပေါ်မှာ ငလျင်လှုပ်ခတ်မှုအတွင်း စင်ကာပူနိုင်ငံသား ၈ ဦး သေဆုံးခဲ့ရတဲ့အတွက် ၀န်ကြီးချုပ်အနေနဲ့ အလွန်အမင်း ၀မ်းနည်းကြေကွဲရပါတယ်။ စင်ကာပူနိုင်ငံသားအားလုံးကိုယ်စား ၀န်ကြီးချုပ်က သေဆုံးသွားသူတွေရဲ့ မိသားစုတွေနဲ့
ဆွေမျိုးတွေကို ၀မ်းနည်းကြောင်း၊ စာနာကြောင်း ပြောကြားလိုပါတယ်” ဟု ၀န်ကြီးချုပ် လီရှန်လွန်း၏ ရုံးမှ ယမန်နေ့က ထုတ်ပြန်သော ကြေညာချက်တွင် ဖော်ပြထားသည်။

“၂၀၁၅ ခုနှစ် ဇွန်လ ၈ ရက်နေ့ဟာ နိုင်ငံတော်အောက်မေ့ဖွယ်နေ့ ဖြစ်မှာဖြစ်ပြီး အစိုးရအဆောက်အဦးအားလုံးမှာရှိတဲ့ နိုင်ငံတော်အလံတွေကို (၀မ်းနည်းခြင်းအထိမ်းအမှတ်အဖြစ်) တိုင်တစ်ဝက်လွှင့်ထူမှာ ဖြစ်ပါတယ်” ဟု ထိုကြေညာချက်တွင် ထည့်သွင်းဖော်ပြထားသည်။

Tanjong Katong မှ ကလေးငယ်များ၏ ရုပ်အလောင်းများကို စင်ကာပူက အတည်ပြုခဲ့ပြီး ဆရာတစ်ဦးနှင့် စင်ကာပူ လမ်းပြတစ်ဦးတို့လည်း သေဆုံးခဲ့ကာ အခြားကျောင်းသားတစ်ဦးနှင့် ဆရာတစ်ဦးတို့မှာ ပျောက်ဆုံးနေဆဲဖြစ်သည်ဟု တာဝန်ရှိသူများက ပြောကြားခဲ့သည်။

အဆိုပါ မူလတန်းကျောင်းမှ ကျောင်းသား ၂၉ ဦးနှင့် ဆရာ ၈ ဦးတို့မှာ တောင်တက်ခရီးတွင် နာမည်ကျော်သည့် ကင်နာဘာလူတောင်ပေါ်သို့ လေ့လာရေးခရီးထွက်ရန် ထွက်ခွာသွားခြင်း ဖြစ်သည်။

သေဆုံးသွားသူများအတွက် ၀မ်းနည်းခြင်းအထိမ်းအမှတ်ဖြစ် ယနေ့တွင်ပြုလုပ်မည့် ဆီးဂိမ်းပြိုင်ပွဲများအားလုံးတွင် တစ်မိနစ်ခန့် ငြိမ်သက်သွားမည်ဟု စင်ကာပူအစိုးရက ကြေညာခဲ့သည်။

Ref: Channelnewsasia