ဘာသာပေါင်းစုံ ချစ်ကြည် ညီညွတ်ရေး ဆုတောင်းပွဲ ဆွမ်းစားဖိတ်တာ သံဃာတွေ မကြွဘို့ မ.ဘ.သ အဖွဲ့ လုပ်ဆောင်

ဇွန် ၈၊ ၂၀၁၄
M-Media
ချမ်းငြိမ်းအေး

ဓါတ်ပုံ အညွှန်း- အာဗစ်ရှာဟိုစိုင်နီသခင်၏ ဒါရ်ဂါဟ်တော် ၁၉၉၇-ခု အဓိကရုဏ်းတွင် မီးရှို့ဖျက်ဆီးခံရပြီးနောက် ပြန်လည်ပြင်ဆင်ရင်း တားဆီးခံရသည့်အတွက် တစ်ပိုင်းတစ်စဖြင့် ရပ်တန့်ထားခဲ့ရခြင်းဖြစ်သည်။

မန္တလေး။    ။ မန္တလေးတိုင်း အမရပူရမြို့နယ်ရှိ ဘိုးတော်ဦးဝိုင်း(ဗဒုံမင်း) လက်ထက်  အစ္စလာမ်သာသနာပိုင် အဖြစ် ခန့်အပ်ခြင်းခံရသည့်  အာဗစ်ရှားဟိုစိုင်နီ သခင်ကြီး၏ (၂၀၇) နှစ်မြောက် အောက်မေ့ဖွယ် အခမ်းအနားမှာ သံဃာတွေကို ဆွမ်းကပ်ဖို့ စီစဉ်ထားမှုအား လက်မခံဖို့ အတွက် အမျိုးဘာသာသာသနာ စောင့်ရှောက်ရေးအဖွဲ (မဘသ) မှ လုပ်ဆောင်ခဲ့တယ်လို့ သိရပါတယ်။

ဒေသခံ မွတ်စလင်များမှ သူတော်စင် အဖြစ် သတ်မှတ်သည့် အာဗစ်ရှားဟိုစိုင်နီ သခင်ကြီး၏ နှစ်စဉ် အောက်မေ့ဘွယ် အခမ်းအနားများ ပြုလုပ်ခဲ့ရာ ယခုနှစ်တွင်  ဘာသာပေါင်းစုံ ချစ်ကြည် ညီညွတ်ရေးအတွက် ရည်ရွယ်ပြီး မန္တလေးမြို့ပေါ်မှ သံဃာတော် အပါး (၁၀၀) ကျော်ကို နေ့ဆွမ်းကပ်လှူရန် စီစဉ်ထားခဲ့ကြောင်း သိရပါတယ်။ ထိုနေ့ဆွမ်းစား မကြွရန် ဖိတ်ကြားခံထားရသော ဘုန်းကြီးကျောင်းများသို့ မ.ဘ.သ အဖွဲ့မှ စာများပေးပို့ခဲ့ပြီး တားဆီးခဲ့ကြောင်း သိရပါတယ်။

ဘာသာပေါင်းစုံချစ်ကြည်ညီညွှတ်ရေး ဆုတောင်းပွဲအား အမရပူမြို့နယ် သိင်္ဂီရွှေ့ဝါ ခန်းမမှာ ဇွန် ၈ရက်နေ့ နံနက်ပိုင်းမှာ ပြုလုပ်ဖို့ စီစဉ်ခဲ့တာပါပဲဖြစ်ပါတယ်။

“ကျွန်တော်တို့ ဘုန်းတော်ကြီးတွေကို ဆွမ်းကပ်ဖို့ အဆင်သင့် ချက်ပြုတ်ထားပြီးပါပြီ။ ဒီသခင်ကြီးရဲ့ နှစ်ပတ်လည်အခမ်းအနားမှာ ကျွန်တော်တို့ဂေါပက အဖွဲ့အနေနဲ့ ဘာသာပေါင်းစုံ ချစ်ကြည်ရင်းနှီးမှု ရရှိနိုင်ရန် အတွက် သံဃာတော်တွေကို ဆွမ်းကပ်ဖို့ ဖိတ်ကြားတာပါ။” လို့ ဂေါပက အဖွဲ့ဝင်တစ်ဦးက ပြောပါတယ်။

မန္တလေးမြို့နယ်မှ သံဃာတော်တစ်ပါးကလည်း “ဒီလိုတွေ အမြဲလိုက်ပြီး ပိတ်ပင်တားဆီးနေတာ စည်းလုံးမှု ညီညွတ်မှုတွေကို ပျက်ပြားစေနေပါတယ်။ ဘာသာပေါင်းစုံ ချစ်ကြည်မှုရနေတာကိုလည်း ဝင်ရောက်နှောက့်ယှက်သလို ဖြစ်နေပါတယ်။ ဒီလိုလုပ်ရပ်မျိုးတွေကို ဘုန်းကြီးတို့က ပြင်းထန်စွာ ရှုံ့ချပါတယ်” ဟု ဆရာတော်တစ်ပါးက မိန့်ကြားခဲ့ပါတယ်။

အာဗစ်ရှားဟိုစိုင်နီ သခင်ကြီးသည် ဘိုးတော်ဦးဝိုင်း(ဗဒုံမင်း) လက်ထက်တွင် နှစ်ပေါင်း (၂၀)  ခန့် အစ္စလာမ် သာသနာပိုင်အဖြစ် ထမ်းဆောင်ခဲ့သူတစ်ဦးဖြစ်ပါတယ်။

နှစ်ပေါင်း ၂၀၀  ကျော်ရှိပြီဖြစ်တဲ့ ၄င်းအားမြုပ်နှံခဲ့သည့် ဂူဗိမာန်မှာ မန္တလေးတိုင်း အမရပူရမြို့ လင်းဇင်းကုန်းရပ်၌ တည်ရှိပြီး  သမိုင်းဝင်နေရာ တခုလည်းဖြစ်ပါတယ်။