အီရန်၏ နျူလုပ်ငန်းတစ်ခုလုံးကို အမေရိကန်က ဖျက်ဆီးချင်နေသည်ဟု ခါမေနီပြော

ဇွန် ၂၄၊ ၂၀၁၅
M-Media

– အမေရိကန်မှာ မိမိတို့၏ နျူကလီးယားကဏ္ဍကို လုံးဝဖျက်ဆီးချင်နေသည်ဟု အီရန်နိုင်ငံ၏ အဓိပတိ အယာတိုလာ ခါမေနီက နိုင်ငံပိုင် ရုပ်သံမှတစ်ဆင့် ယမန်နေ့တွင် ပြောကြားခဲ့ပြီး အီရန်၏ စစ်ဘက်ဆိုင်ရာနေရာများကို နိုင်ငံတကာ စုံစမ်းရေးမှူးများက စစ်ဆေးခြင်း ဖြစ်လာမည်မဟုတ်ဟု ဆိုသည်။

“အမေရိကန်က ငါတို့ရဲ့ နျူကလီးယားကဏ္ဍကြီးတစ်ခုလုံးကို ဖျက်ဆီးချင်နေတာပါ။ ငါတို့ရဲ့ ညှိနှိုင်းဆွေးနွေးသူတွေရဲ့ ရည်ရွယ်ချက်က အီရန်ရဲ့ ဂုဏ်သိက္ခာကို အန္တရာယ်ကင်းစေဖို့ပါ။ ပြီးတော့ ဆွေးနွေးနေစဉ်အတွင်းမှာ နျူးအရေး အောင်မြင်မှုရဖို့ပါ” ဟု ခါမေနီက ၎င်း၏ မိန့်ခွန်းတွင် ထည့်သွင်းပြောကြားခဲ့သည်။

အီရန်က ၎င်းတို့၏ နျူကလီးယားလုပ်ငန်းစဉ်မှာ အရပ်ဖက်တွင် အသုံးပြုရန်အတွက် ဖြစ်သည်ဟု အခိုင်အမာ ပြောကြားထားပြီး ခါမေနီကမူ အဆိုပါလုပ်ငန်းစဉ်များကို ၁၀ နှစ်၊ ၁၂ နှစ်ကဲ့သို့ ကာလရှည် ရပ်ဆိုင်းသွားမည်မဟုတ်ဟု အဆိုပါမိန့်ခွန်းတွင် ပြောကြားခဲ့သည်။ ခါမေနီမှာ အီရန်၏ စစ်ဘက်ဆိုင်ရာနေရာများအား နိုင်ငံခြား စုံစမ်းစစ်ဆေးရေးမှူးများက ၀င်ရောက် စစ်ဆေးခြင်းကို ယခင်ကလည်း ဆန့်ကျင်ခဲ့သည်။

တနင်္လာနေ့က အီရန်ပါလီမန်မှာ နိုင်ငံ၏ စစ်ဘက်ဆိုင်ရာ နေရာများနှင့် သိပ္ပံပညာရှင်အား ကုလသမဂ္ဂမှ စုံစမ်းရေးမှူးများ ၀င်ရောက်စစ်ဆေးမှုကို ပိတ်ပင်သည့် ဥပဒေကို အတည်ပြုခဲ့ပြီးနောက် နိုင်ငံ၏ အဓိပတိဖြစ်သော ခါမေနီ၏ ထိုမှတ်ချက်များ
ထွက်ပေါ်လာခြင်း ဖြစ်သည်။

နျူအရေး သဘောတူညီချက်ရရှိရေး နောက်ဆုံးရက်အဖြစ် သတ်မှတ်ထားသည့် ဇွန်လ ၃၀ ရက်နေ့မှာ နီးကပ်လာပြီး အင်အားကြီး ၆ နိုင်ငံနှင့် နျူအရေး ဆွေးနွေးမှုများ ပြုလုပ်နေသည့် အီရန်နိုင်ငံခြားရေးဝန်ကြီး ဂျာဗဒ်ဇာရစ်ဖ်ကမူ “ဆွေးနွေးပွဲတွင် ပါဝင်သူအားလုံးမှာ လွန်ကဲသော တောင်းဆိုမှုများကို ရှောင်ရှားသင့်သည်” ဟု တနင်္လာနေ့တွင် ပြောကြားခဲ့သည်။

“ဒီသဘောတူညီချက်ကို နောက်ဆုံးရက် ဒါမှမဟုတ် နောက်ထပ်ရက်အနည်းငယ်အကြာမှာ ကျွန်တော်တို့ အဆုံးသတ်ဖို့ ဖြစ်နိုင်ချေရှိပါတယ်”

Ref: Aljazeera