နိုင်ငံတကာသတင်းတို (ဇွန် ၂၅၊ ၂၀၁၅)

ဇွန် ၂၅၊ ၂၀၁၅
M-Media

လေယာဉ်ပျက်ကျမှုမှ လွတ်မြောက်လာသည့် ကိုလံဘီယာအမျိုးသမီး

ဗီယက်နမ်တွင် လေယာဉ်ကွင်းသစ်ကြီးတစ်ခု တည်ဆောက်မည်
………………………….
နိုင်ငံ၏ တိုးတက်လာသော လေကြောင်းဈေကွက်အား ဖြည့်တင်းနိုင်ရန်အတွက် လေယာဉ်ကွင်းကြီးတစ်ခု တည်ဆောက်ရန် ဗီယက်နမ် ပါလီမန်က ယနေ့တွင် အတည်ပြုခဲ့သည်။ Long Thanh ဟုအမည်ပေးထားသည့် အဆိုပါ လေယာဉ်ကွင်းကို ၂၀၁၈ ခုနှစ်တွင် စီးပွားရေးမြို့တော် ဟိုချီမင်း၌ စတင်ဆောက်လုပ်ရန် စီစဉ်ထားပြီး ကန်ဒေါ်လာ ၁၆ ဘီလီယံ ကုန်ကြမည်ဖြစ်သည်။ အကျယ်ဝန်း ၅၀ စကွဲယားကီလိုမီတာ (၁၉ စကွဲယားမိုင်) ရှိမည့် အဆိုပါ လေယာဉ်ကွင်းမှာ စင်ကာပူ၏ ချန်ဂီလေဆိပ်၊ ထိုင်းနိုင်ငံ၏ သုဝဏ္ဍဘူမိလေဆိပ် နှစ်ခုပေါင်းထက် ကြီးမားမည်ဖြစ်သည်။ ဗီယက်နမ်၏ လေကြောင်းဈေးကွက်မှာ အာရှပစိဖိတ်ဒေသတွင် တတိယ အမြန်ဆုံး ကြီးထွားနေသော ဈေးကွက်ဖြစ်သည်။

ဆီးရီးယားရှိ ကိုဘိန်းမြို့သို့ IS ပြန်လည်တိုက်ခိုက်
………………………………
ဆီးရီးယားနိုင်ငံမြောက်ပိုင်း ကာ့ဒ်ဒေသရှိ ကိုဘိန်းမြို့ကို IS တပ်ဖွဲ့များက ယနေ့တွင် ကားဗုံးခွဲ၍ ၀င်ရောက်တိုက်ခိုက်ခဲ့ပြီး အနည်းဆုံး ၁၂ ဦးခန့် သေဆုံးခဲ့ကာ ကိုဘိန်းမြို့အနီး ဟာဆာကိုမြိုကို IS တပ်ဖွဲ့က သိမ်းယူနိုင်ခဲ့သည်။ တိုက်ပွဲများမှာ ဆက်လက်ဖြစ်ပွားလျက်ရှိနေပြီး ကာ့ဒ်တပ်ဖွဲ့ကမူ ၎င်းတို့အနေဖြင့် စစ်ကူများ ပို့ပေးနေသည်ဟု ပြောကြားခဲ့သည်။ တူရကီနယ်စပ်အနီးရှိ အဆိုပါ ကိုဘိန်းမြို့ကို ကာ့ဒ်တပ်ဖွဲ့များမှာ ပြီးခဲ့သည့် ဇန်န၀ါရီလက IS လက်မှ ပြန်လည်သိမ်းပိုက်နိုင်ခဲ့ခြင်း ဖြစ်သည်။

ကိုလံဘီယာလေယာဉ်ပျက်ကျမှုမှ သားအမိ ၂ ဦး အံ့ဖွယ်လွတ်မြောက်လာ
……………………………
ကိုလံဘီယာနိုင်ငံ အနောက်ပိုင်း ကစ်ဘ်ဒိုမြို့ရှိ တောတောင်ထူထပ်သည့်ဒေသတွင် စနေနေ့က ပျက်ကျသွားခဲ့သော လေယာဉ်မှ သားအမိနှစ်ဦးအား ၅ ရက်အကြာ ယနေ့တွင် အသက်ရှင်လျက် ပြန်လည်တွေ့ရှိခဲ့သည်။ တွေ့ရှိခဲ့သူများမှာ အသက် ၁၈ နှစ်အရွယ် မိခင် နဲလီ မူရီလိုနှင့် အသက်တစ်နှစ်မပြည့်သေးသည့် သားငယ် ယူဒီယာ မိုရီနိုတို့ဖြစ်ပြီး မိခင်မှာ ဒဏ်ရာအနည်းငယ်ရရှိကာ ဆေးရုံသို့ ပို့ဆောင်ခဲ့ရပြီး သားငယ်မှာ မည်သည့်ဒဏ်ရာမှ ရရှိခဲ့ခြင်းမရှိချေ။ လေယာဉ်မှူးမှာမူ သေဆုံးခဲ့သည်။

Ref: News agencies