တီဗက်ဇ်ကို မယုံသောကြောင့် ပင်နယ်တီဦးစားပေး မရွေးချယ်ခဲ့ခြင်းဟု မာတီနိုဆို

ဇွန် ၂၇၊ ၂၀၁၅
M-Media

– ၂၀၁၁ ခုနှစ်က ကိုပါအမေရိကဖလားတွင် ပင်နယ်တီလွဲချော်ခဲ့ခြင်းကြောင့် ယနေ့မနက် ကွာတားဖိုင်နယ်တွင် တီဗက်ဇ်အား ပထမ ၅ လုံးစာရင်းတွင် မထည့်ခဲ့ခြင်းဖြစ်သည်ဟု အာဂျင်တီးနားနည်းပြ မာတီနိုက ၀န်ခံပြောကြားခဲ့သည်။

ကိုလံဘီယာနှင့် ကစားခဲ့သည့် အဆိုပါပွဲတွင် အာဂျင်တီးနားမှာ ခြေအသာဖြင့် မကစားနိုင်ခဲ့သော်လည်း ဂိုးသွင်းယူနိုင်ခြင်းမရှိဘဲ အချိန်ပိုအထိ ဂိုးမရှိသရေကျခဲ့သည်။ ထို့ကြောင့် ပင်နယ်တီကန်သွင်းခဲ့ရာ ၇ လုံးအထိ ရောက်ခဲ့ပြီး တီဗက်ဇ်၏ နောက်ဆုံး အဆုံးအဖြတ်ဖြင့် အနိုင်ရခဲ့ကာ ဆီမီးဖိုင်နယ်သို့ တက်နိုင်ခဲ့သည်။

တီဗက်ဇ်က အာဂျင်တီးနားအသင်း ဆီးမီးဖိုင်နယ်သို့ တက်ရောက်ရေးအတွက် သူရဲကောင်းဖြစ်ခဲ့သော်လည်း မာတီနိုကမူ ၂၀၁၁ ခုနှစ် ဥရုဂွေးနှင့်ပွဲတွင် ပင်နယ်တီမ၀င်ခဲ့သော တီဗက်ဇ်အား မယုံသောကြောင့် ပထမ ၅ လုံးတွင် ကန်သွင်းရန် မရွေးခဲ့ခြင်းဖြစ်သည်ဟု ၀န်ခံခဲ့သည်။

“ဘောလုံးလောကမှာ တစ်ခါတစ်ရံ ဒီလိုပါပဲ။ ပထမ ပင်နယ်တီ ၅ လုံးမှာ တီဗက်ဇ်ကိုမထည့်ခဲ့တာ ပြီးခဲ့တဲ့ ကိုပါအမေရိကမှာ ပင်နယ်တီလွဲခဲ့လို့ပါပဲ။ သူပေါက်ကွဲမှာကို တားဆီးဖို့အတွက် သူ့ကို တစ်လုံးကန်ဖို့ ရွေးချယ်ခဲ့ပါတယ်။ နောက်ဆုံးတော့ သူ့အလှည့် ရောက်လာတာပါပဲ။ ဒါဟာ ဘောလုံးပါပဲ” ဟု မာတီနိုက ပွဲအပြီး သတင်းစာရှင်းလင်းပွဲတွင် သတင်းထောက်များအား ပြောကြားခဲ့သည်။

ပွဲအချိန်အတွင်း အနိုင်ရရှိအောင် မစွမ်းဆောင်နိုင်ခဲ့သော်လည်း မာတီနိုမှာ အသင်း၏ စွမ်းဆောင်ရည်ကို ချီးကျူးခဲ့သည်။

“မိနစ် ၉၀ စလုံး ကျွန်တော်တို့က အရှင်သခင်ပါ။ ကျွန်တော်တို့ရဲ့ ဖိအားပေးပုံနဲ့ သူတို့ ဘာမှမလုပ်နိုင်ဘူးလို့ ကျွန်တော် ထင်ပါတယ်။ ကိုလံဘီယာက ထောင့်ကန်ဘောကနေ အခွင့်အရေးတစ်ခု ရခဲ့ပါတယ်။ ဒီလောက်ပါပဲ”

Ref: Goal