ကွာတားဖိုင်နယ်မကစားခင် ကစားသမား ၁၅ ဦးခန့် ဖျားနာခဲ့သည်ဟု ဘရာဇီးလ်နည်းပြဆို

ဇွန် ၂၈၊ ၂၀၁၅
M-Media

– ပါရာဂွေးနှင့် ကိုပါအမေရိက ကွာတားဖိုင်နယ်ပွဲ မကစားခင် မိမိတို့အသင်းမှ ကစားသမားအများအပြားမှာ ထိပ်တန်းအခြေအနေတွင် မရှိဘဲ ဖျားနာနေကြသည်ဟု ဘရာဇီးလ်နည်းပြ ဒွန်ဂါက ပြောကြားလိုက်သည်။

ယနေ့မနက်က ကစားခဲ့သည့် အဆိုပါပွဲတွင် ဘရာဇီးလ်မှာ ရော်ဘင်ဟို၏ ဂိုးဖြင့် ဦးဆောင်ခဲ့သော်လည်း ပါရာဂွေးမှ ဒါးလစ် ဂွန်ဇာလက်ဇ်က ပင်နယ်တီမှတစ်ဆင့် ချေပဂိုးသွင်းယူခဲ့သည်။ ထို့ကြောင့် ပင်နယ်အထိ ရောက်ရှိခဲ့ကာ ပါရာဂွေးက အနိုင်ရ၍ ဆီမီးဖိုင်နယ်သို့ တက်ရောက်သွားခဲ့သည်။

ကွာတားဖိုင်နယ်မှ ထွက်ခဲ့ရပြီးနောက် ဒွန်ဂါက မိမိတို့အသင်းမှ ကစားသမားများမှာ နေမကောင်းဖြစ်သောကြောင့် လေ့ကျင့်မှုအချို့ကိုပင် ဖြုတ်ခဲ့ရသည်ဟု ပြောကြားခဲ့သည်။ သို့သော်လည်း ထိုကိစ္စက ပြိုင်ပွဲမှထွက်ရခြင်း၏ အကြောင်းအရင်းမဟုတ်ဟု ဆိုသည်။

“ဒါဟာ ဆင်ခြေတော့ မဟုတ်ပါဘူး။ ဒါပေမယ့် ဒီတစ်ပတ်မှာ ကျွန်တော်တို့ကစားသမား ၁၅ ဦးလောက် ဖျားနာခဲ့ပါတယ်။ အချို့လေ့ကျင့်ခန်းတွေကိုတောင် ကျွန်တော်တို့ ကန့်သတ်ခဲ့ရပါတယ်။ ကစားသမားတွေက ခေါင်းတွေကိုက်တယ်၊ ကိုယ်တွေလက်တွေနာတယ် ပြီးတော့ ဖျားကြပါတယ်။ တစ်ချို့တွေက တော်တော်ဆိုးပါတယ်။ သူတို့ သက်သာဖို့ ကျွန်တော်တို့ဟာ လေ့ကျင်ခန်းအစီအစဉ်ရဲ့ ပြင်းထန်မှုကို လျော့ချခဲ့ရပါတယ်” ဟု ပွဲအပြီး သတင်းစာရှင်းလင်းပွဲတွင် ဒွန်ဂါက ပြောကြားခဲ့သည်။

အသင်းနှင့်ပတ်သက်၍မူ ၎င်းက အသင်းမှာ စွမ်းဆောင်ရည်ကောင်းခဲ့သော်လည်း ပြတ်သားသည် ရလဒ် ရရှိနိုင်ရန်အတွက် တိုက်စစ်ပိုင်းမြန်ဆန်မှု ပျောက်ဆုံးခဲ့သည်ဟု ဆိုသည်။

“ပွဲကို ရုပ်ပိုင်းဆိုင်ရာနဲ့ပတ်သက်ပြီး ကျွန်တော်တို့ မျှကြည့်ရပါမယ်။ ပြီးတော့ အနိုင်ရအောင် အဆုံးအထိ ကြိုးစားခဲ့ရမှာပါ”

Ref: Goal.com