“အရိုင်း”နှင့် “အယဉ်” (အပိုင်း-၂) လူကုန်ကူးနှင့် ကျွန်ပြုခိုင်းစေ ခံနေရသော မြန်မာများ

ဇွန် ၂၉၊ ၂၀၁၅
M-Media
“မေတ္တာရှင်” ရေးသည်။

အပိုင်း(၁) ဖတ်လိုလျှင် =>http://www.m-mediagroup.com/news/42481

နိုင်ငံရပ်ခြားမှာ မြန်မာအချင်းချင်း “ရွှေ” တဲ့၊ “ရွှေ”မြန်မာတဲ့ ခေါ်ကြတယ်။
တကယ်တမ်းမှာ ပကတိရွှေ စစ်စစ်လို့ ဂုဏ်ယူနိုင်လို့လား။
လက်မထောင် မော်ကြွားနိုင်လို့လား။
ကျွန်ပြုခိုင်းစေခံနေရသော ဘဝမှာ နွံနစ်ကုန်ကြတာတွေ ဟိုးလေးတကျော် ဖြစ်နေပြီ။
သာကီသွေးတို့ ဒီအရေးကိုရော တွေးထားဦး။
အဓိက တွေးထားအုံး။
အဓိက ဘာလုပ်ရမှာလဲ။
သာမညတွေကို ဘေးချိတ်လိုက်ရတော့မှာပဲ။ ကမ္ဘာမှာ “ဗမာဟေ့” လို့ရင်ကော့ပြီး ဘာများပြောနိုင်တာရှိပြီတုံး။

ဒီကနေ့ မြန်မာနိုင်ငံဟာ အဆင်းရဲဆုံး စာရင်းဝင်နိုင်ငံ ဘဝက တက်လှမ်းနေရချိန်ဖြစ်ပါတယ်။ ဒါကြောင့် အမျိုးသမီးများအား ခွဲခြား ဆက်ဆံခံရမှုက လွတ်မြောက်ရေး ဖွံ့ဖြိုးတိုးတက်ရေး၊ စွမ်းဆောင်ရည် တည်ဆောက်ရေးကို မဖြစ်မနေ ကြိုးပမ်းသွားရဦးမည် ဖြစ်ပါတယ်။ အမျိုးသား များနှင့် တန်းတူအခွင့်အရေးရ ရှိရေး ကို ဆက်စပ်ကြိုးပမ်းသွားဖို့ ဖြစ်ပါတယ်။ ဒီကနေ့ အမျိုးသမီးတွေ အဓမ္မပြုကျင့်ခံရမှု၊ လူကုန်ကူးခံရမှု၊ အိမ်တွင်းအကြမ်းဖက်ခံရမှုများကို ကာကွယ်တိုက်ဖျက်သွားဖို့ လိုပါတယ်။ အမျိုးသမီးတွေ အဓမ္မပြုကျင့်ခံရမှုကို ကမ္ဘာနဲ့ချီကြည့်ရင် စိုးရိမ်စရာဖြစ်နေပါတယ်။ မြန်မာနိုင်ငံတွင် လူကုန်ကူးမှု အဓိကဖြစ်ပွားစေတဲ့ အကြောင်းများ ကိုလည်း အခုလိုလေ့လာတွေ့ရှိရပါတယ်။

(၁) အလုပ်အကိုင်သစ်ရှာဖွေရာမှ လှည့်စားခံရခြင်း
(၂) သဘာဝဘေး အန္တရာယ်ကြောင့် အလုပ်ကိုင်သစ်များ ရှာဖွေရာမှ လူကုန်ကူးခံရခြင်း
(၃) မိဘအိမ်ထောင်ရေးပြိုကွဲသူများ စိတ်လေလွင့်ရာမှာ လူကုန်ကူးခံရခြင်း
(၄) လိမ်လည်လက်ထပ်၍ လူကုန်ကူးခံရခြင်း
(၅) ပညာအခြေခံနည်းပါးသူနှင့် ဗဟုသုတနည်းပါးသူတို့ လူကုန်ကူးခံရခြင်း
(၆) ကျေးလက်ဒေသများမှ လှည့်စား၍ လူကုန်ကူးခံရခြင်း
(၇) မူလ လူကုန်ကူးခံရသူမှ လူကုန်ကူးသူအဖြစ်ပြောင်းလဲကာ နေရာဟောင်းတွင် ရှိသူများကို စည်းရုံး၍ လူကုန်ကူးခြင်း
(၈) နိုင်ငံရပ်ခြားတွင် တရားမဝင် သွားရောက် အလုပ်လုပ်ရာမှ လူကုန်ကူးခံရခြင်း
(၉) လူကုန်ကူးသူတို့၏ နည်းလမ်းသစ်များဖြင့် လူကုန်ကူးခံရခြင်း၊ နယ်စပ်ရှိ အနှိပ်ခန်းအလှပြင်ဆိုင် သီဆိုဖျော်ဖြေရေး လုပ်ငန်းမှ မိန်းကလေးများ လူကုန်ကူးခံရခြင်း
(၁၀) ကလေးသူငယ်များအား လှည့်ဖြား၍ လူကုန်ကူးခံရခြင်း
(၁၁) ကလေးသူငယ်များအား မွေးစားရန် စည်းရုံးခေါ်ဆောင်၍ လူကုန်ကူးခြင်း
(၁၂) မလေးရှားမှ ပြည်နှင်ခံရသူများ မြန်မာနိုင်ငံမရောက်မီ ထိုင်းနိုင်ငံအတွင်း ရပ်တည်ရန်ခက်ခဲသည့် အခြေအနေ၌ အနိုင်အထက်ပြု၍ လူကုန်ကူးခံရခြင်း
(၁၃) ဆင်းရဲမွဲတေမှု ထွက်ပေါက်ရှာရာမှ လူကုန်ကူးခံရခြင်းတို့ဖြစ်ပါတယ်။

အဲဒီလို လူကုန်ကူးခံရမှု၊ အိမ်တွင်းအကြမ်းဖက်ခံရမှုများကို မြန်မာ အမျိုးသမီးတွေ များစွာကြုံတွေ့နေရပါသေးတယ်။ အခုလို အမျိုးသမီးများ အမျိုးသားများနဲ့ တန်းတူအခွင့်အရေး၊ အမျိုးသမီးများအား ခွဲခြားဆက်ဆံမှုများ ပပျောက်ရေး ကြိုးပမ်းရာတွင် အမျိုးသမီးများဘက်ကလည်း ပြည်ပသို့ စီးပွားရေးနှင့် စားဝတ်နေရေး အခြေအနေများအရ ပြေလည် အဆင်ပြေစေရေး အတွက်သော် လည်းကောင်း၊ ပြည်ပနိုင်ငံများမှ နည်းပညာများနှင့် အတွေ့အကြုံများ ရယူလို၍သော် လည်းကောင်း စသည်ဖြင့် မည်သည့် အကြောင်းကြောင်းကြောင့် ပြည်ပသို့ သွားရောက် အလုပ်ကိုင်ရသည်ဖြစ်စေ မိမိတို့ သွားရောက်လုပ်ကိုင်မည့် လုပ်ငန်း အမျိုးအစားသည် မိမိနှင့်မိမိ မိသားစုအတွက်သော် လည်းကောင်း ဂုဏ်သိက္ခာ ကျဆင်းစေမည့် လုပ်ငန်း အမျိုးအစားများဖြစ်ပါက အဆိုပါဂုဏ်သိက္ခာကို ပြည်ပတွင် မိမိအလုပ် လုပ်ကိုင်ရာမှ ရရှိသည့် အနည်းငယ်မျှသာ ဝင်ငွေမျှဖြင့် လဲလှယ်ခြင်းဌာ မသင့်ချေ။ အကယ်၍ ထိုသို့မဟုတ်ဘဲ မိမိ၏အကျိုးစီးပွား တစ်ခုတည်းကိုသာ ရှေးရှု၍ အိမ်ရှင်နိုင်ငံသားများ ကိုယ်တိုင် မလုပ်ကိုင်သော နိမ့်ကျသည့် အိမ်အကူနှင့် ပျော်တော်ဆက် စသော အလုပ်များအား လုပ်ကိုင်မည်ဆိုပါက၊ ယင်းသို့ လုပ်ကိုင်သူများပြားလာပါက “သခင်မျိုးဟေ့ တို့ဗမာ” ဟုအတိတ်ကာလ ဟစ်ကြွေးခဲ့သော ဆောင်ပုဒ်မှာ မှေးမှိန်သွားမည်ဖြစ်ပါသည်။ သို့ဆိုရင် ဘာကြောင့်မြန်မာ အမျိုးသမီးကောင်းများ ပြည်ပမှာ အိမ်အကူ အဖြစ် သွားရောက် လုပ်ကိုင်နေရတာလဲ အားပေးမှာလား တားဆီးမှာလား စဉ်းစား ဆုံးဖြတ်နိုင်ကြရန် ရေးသား တင်ပြလိုက်ရပါသည်။

အသက် (၃၀) အရွယ် ကိုကျော်နိုင်သည် တစ်လလုပ်အားခ ဘတ်ငွေတစ်သောင်း ရမည်ဟုဆိုသော ထိုင်း လူကုန်ကူးသူများ၏ ကတိကိုယုံ၍ ဝန်ဆောင်ခ ဘတ်ငွေ ၂၈၀၀၀ (ကျပ်ကိုးသိန်းကျော်) ပေးဆောင်ပြီးနောက် လှေဖြင့် ၁၆ ရက်ကြာခရီးသွားရသော အင်ဒိုနီးရှားနိုင်ငံရှိ ဘန်ဂျီးနားကျွန်းပေါ်သို့ ၂၀၁၂ ဖေဖော်ဝါရီ (၁) ရက်က ရောက်ရှိ ခဲ့သူဖြစ်သည်။

အင်ဒိုနီးရှားနိုင်ငံ ကျွန်းများပေါ်သို့ ငါးဖမ်းအလုပ်များ သွားရောက် လုပ်ကိုင်နေကြသော ကိုကျော်နိုင် အပါအဝင် မြန်မာရေ လုပ်သား (၅၃၈) ဦးသည် ထိုင်းလူကုန်ကူးသူများ၏ လူကုန်ကူးမှုခံရသောကြောင့် အဆိုပါကျွန်းများပေါ်သို့ ရောက်ရှိ သွားခြင်းဖြစ်သည်။

နှစ်ရှည်လများပင်ပန်းကြီးစွာ ပင်လယ်ပြင်တွင် လုပ်ကိုင်ခဲ့ရသော်လည်း လုပ်အားခမရဘဲ ခေတ်သစ် ကျွန်ပြုခံရသူများ တွင် မြန်မာရေလုပ်သား (၅၃၈) ဦးအပြင် ထိုင်း၊ ကမ္ဘောဒီးယား၊ လာအိုနိုင်ငံ တို့မှရေလုပ်သားများ လည်း ပါဝင်သည်။

ကြေးစားဆန်ဆန်လူမိုက်များစောင့်ကြည့်မှုအောက် ရက်ရက်စက်စက် ခိုင်းသောကြောင့် ပင်ပင်ပန်းပန်း လုပ်ကိုင်ရပြီး လုပ်အားခ ပိုက်ဆံမရဘဲ မျှော်လင့်ချက်မဲ့ကာ မိမိကိုယ်ကိုယ်သေကြောင်းကြံစည် သွားသည့် မြန်မာရေလုပ်သားများ ရှိသလို ပင်ပန်းလွန်းကာ ကျန်းမာရေး ချို့တဲ့၍ သေဆုံးသွားသည့်မြန်မာများ အပါအဝင် ရေလုပ်သားများစွာရှိကြောင်း ကိုယ်တိုင်ကြုံရခဲ့သူ ကိုမောင်စိုး ကပြောပြသည်။

ယင်းကဲ့သို့သေဆုံး၍ မြက်ရိုင်းပင်ရှည်များ တောနွယ်များကြားတွင် အလောင်းမြှပ်ထားရာ မြေပုံ ၆၀ ထက်မနည်း ရှိနေသော သချိင်္ုင်းတစ်ခုရှိနေပြီး သစ်သား ပျဉ်ချပ်ပြားပေါ်တွင် သေဆုံးသူ၏နာမည်များကို သပ်သပ်ရပ်ရပ် ရေးထိုး ထားကြောင်း အေပီသတင်းဌာနက ဖော်ပြထားသည်။ ယခင်ကဆိုလျှင် သဘောင်္များပေါ်ရှိ ကြီးကြပ်သူများသည် အလောင်းများကို ငါးမန်းကိုက်ဖြတ်ဝါးမျိုရန် ပင်လယ်ထဲ ကန်ချခဲ့ကြောင်း ကျေးကျွန်ဟောင်း တစ်ဦးဖြစ်သူ လှဖြိုးက အေပီသတင်းဌာန အားပြောသည်။

ရေလုပ်သားများအကြောင်းကို အေပီသတင်းဌာနက ၂၀၁၄ တွင်စုံစမ်းထောက်လှမ်းခဲ့ပြီး ၂၀၁၅ မတ်လ ၂၆ ရက်က ဖော်ထုတ် လိုက်သည်။ ထို့ကြောင့် တစ်ကမ္ဘာလုံးက အာရုံစိုက်မိသွားပြီး သက်ဆိုင်ရာနိုင်ငံ အစိုးရများ သိရှိကာ လုပ်သားများကို ချက်ချင်းကယ်တင်မှုများပြုလုပ်၍ ပြန်ပို့ခဲ့ခြင်းဖြစ်သည်။

ထိုင်းကနေ လှေနဲ့စထွက်တော့ လမ်းမှာ ၁၆ ရက်ကြာတယ်။ ထိုင်းနိုင်ငံတောင်ပိုင်း စူရတ်ဌာနေခရိုင် ချူဖောင်းမြို့ အနီး ဘန်နာ့ကျေးရွာတောထဲ၌ (၃) ရက်ခန့် အစာရေပြတ်လပ်နေသည့် ရွေ့ပြောင်းလုပ်သား မြန်မာနိုင်ငံသား (၇၀) ကျော် ကို မေလ ၈ ရက်နှင့် ၉ ရက်တို့တွင် အဆိုပါနားရွာများမှ ထိုင်းအာဏာပိုင်များသို့ အကြောင်းကြားသဖြင့် ၎င်းတို့မှ ကယ်တင်ခဲ့ရသည့် ဖြစ်စဉ်တစ်ခု ဖြစ်ပွားခဲ့သည်။

ထို့နည်းတူ အဆိုပါချူဖောင်းတော် အတွင်း စွန့်ပစ်ခံရသည့် မြန်မာနိုင်ငံသား ၁၅၀ ခန့်ကျန်ရှိနေသေးကြောင်း အဆိုပါရွေ့ပြောင်း လုပ်သားများ၏ ထွက်ချက်တွင်ပြောကြားထားသကဲ့သို့ လူမှောင်ခိုပွဲစားများ ထွက်ပြေးရာတွင် အမျိုးသမီး တစ်ဦးနှင့် အသက်ခုနှစ်လအရွယ် ကလေးငယ်တစ်ဦးတို့ကို ဓားစားခံအဖြစ် ခေါ်ဆောင် သွားခဲ့ကြောင်းကိုလည်း ထွက်ဆိုထားပြီး အဆိုပါသားအမိနှစ်ဦးနှင့် ပတ်သက်၍ မေ ၁၃ ရက်တိုင် သတင်းတစ်စုံ တစ်ရာမကြားရသေးချေ။

ယင်းအပြင် မြန်မာ-ထိုင်းနယ်စပ်ရှိ ကော့သောင်းမြို့နယ် မာရမ်းကျေးရွာ အနီးတွင် တရားမဝင် လူမှောင်ခို ပို့ဆောင်မည့် မြန်မာနိုင်ငံသား (၁၀၀) ကျော်ခန့် လူမှောင်ခိုပွဲစားများမှ ထိန်းထားကြောင်း ထိုင်းနိုင်ငံ အနေဖြင့် မြန်မာနိုင်ငံနှင့် ပူးပေါင်းဆောင်ရွက် သွားမည်ဖြစ်ကြောင်း ထိုင်းအာဏာပိုင်များမှ ဆိုထားသည်။

အဆိုပါဖြစ်ရပ်နည်းတူ လူကုန်ကူးမှုဖြစ်ရပ်များ၊ လူမှောင်ခို ပို့ဆောင်သည့်ဖြစ်ရပ်များ၊ လူမှောင်ခိုပို့ဆောင်ပြီး သက်ဆိုင်ရာအာဏာပိုင်များ၏ ဖမ်းဆီးမှုများကြောင့် တော၊ ပင်လယ်အတွင်း စွန့်ပစ်မှုများ၊ သတ်ပစ်ခဲ့မှုများနှင့် ဓားစားခံအဖြစ် ခေါ်ဆောင်သွားခြင်းများအစရှိသည်တို့သည် ထိုင်းနိုင်ငံတောင်ပိုင်း ဆွန်ခလာပြည်နယ်တွင် လူကုန်ကူးသူများ မြှပ်နှံထားသည့် ရွှေ့ပြောင်းအလုပ်သမားများ၏ အလောင်းများတွေ့ပြီး နောက်ဆက် တိုက်ဖြစ်ပေါ်ခဲ့ခြင်းဖြစ်သည်။

ဆက်လက်ဖော်ပြပါမည်။