ကိုပါအမေရိကတွင် ဗိုလ်စွဲခြင်းက ကမ္ဘာ့ဖလားအကြွေး ပြန်ဆပ်ခြင်းဖြစ်မည်ဟု အဂူရိုပြော

ဇူလိုင် ၃၊ ၂၀၁၅
M-Media

– ၂၀၁၅ ကိုပါအမေရိကဖလား နောက်ဆုံးဗိုလ်လုပွဲတွင် အနိုင်ရရှိခြင်းက ကမ္ဘာ့ဖလားပွဲတွင် မိမိအပေါ် တင်ရှိခဲ့သည့် အကြွေးအား ပြန်လည်ပေးဆပ်ခြင်း ဖြစ်လိမ့်မည်ဟု အာဂျင်တီးနား တိုက်စစ်မှူး ဆာဂျီယိုအဂူရိုက ပြောကြားလိုက်သည်။

ပြီးခဲ့သည့်နှစ်က ကမ္ဘာ့ဖလားတွင် ဗိုလ်လုပွဲအထိ တက်ရောက်ကာ အချိန်ပိုဂိုးဖြင့် ဂျာမနီအား ရှုံးနိမ့်ခဲ့သည့် အာဂျင်တီးနား အသင်းတွင် အဂူရိုမှာ ကြံ့ခိုင်မှု မပြည့်ဝသောကြောင့် ပါဝင်နိုင်ခြင်း မရှိခဲ့ပေ။

သို့သော်လည်း ချီလီတွင် လက်ရှိကျင်းပနေသည့် ကိုပါအမေရိကဖလားတွင်မူ ခြေစွမ်းကောင်းများ ပြသနေပြီး ၃ ဂိုးသွင်းယူထားနိုင်ကာ ၎င်းက ဘရာဇီးတွင် စံချိန်မီ စွမ်းဆောင်ရည်ကို မပြနိုင်သောကြောင့် တင်ရှိနေသည်ဟု ခံစားရသော အကြွေးကို ပြန်လည်ပေးဆပ်နိုင်မည်ဟု မျှော်လင့်နေသည်။

“ဘရာဇီးလ်မှာ ဘာဖြစ်ခဲ့လဲဆိုတာကို ကျွန်တော် အမြဲတမ်းပြောပါတယ်။ ဘာ့ကြောင့်လည်းဆိုတော့ အဲဒီမှာ ကျွန်တော် အကောင်းဆုံးအခြေအနေ မရခဲ့ဘဲ ခိုးလို့ခုလု ဖြစ်ခဲ့ပါတယ်။ အခုအချိန်မှာတော့ ပိုကောင်းတယ်လို့ ကျွန်တော်ခံစားရပြီး ပိုကောင်းစွာနဲ့ ရောက်လာခဲ့ပါတယ်။ ပြီးတော့ ဒါဟာ ကိုပါမှာ ပေးဆပ်ဖို့ ကြိုးစားရမယ့် အကြွေးပါပဲ။ ဂျာမနီနဲ့ ဖိုင်နယ်ပွဲအတွက် ကျွန်တော်တို့ဟာ အမြဲတမ်း ခါးသီးတဲ့အရသာကို ခံစားရပါတယ်။ ဒါပေမယ့် ကိုပါမှာအနိုင်ရခြင်းကတော့ ကျွန်တော်တို့ကို ပျော်ရွှင်စရာတစ်ပုံတစ်ပင် ပေးပါလိမ့်မယ်” ဟု La Nacion သို့ အဂူရိုက ပြောကြားခဲ့သည်။

အဂူရိုမှာ ကိုပါအမေရိကပြိုင်ပွဲဝင် အာဂျင်တီးနားအသင်းတွင် ဂိုးသွင်းအများဆုံး ဖြစ်နေပြီး အသင်းခေါင်းဆောင် မက်ဆီမှာ ၁ ဂိုးသာ သွင်းယူထားနိုင်သည်။ သို့သော်လည်း အဂူရိုကမူ မက်ဆီ၏ အသင်းအား ကူညီမှုအတွက် ကာကွယ်ပြောဆိုခဲ့သည်။

“သူကတည်ငြိမ်တယ်။ တကယ်လို့ အသင်းနိုင်ရင် သူက အေးဆေးပါပဲ။ ဖြစ်နေတာက လူတိုင်းဟာ သူ့ကို လူကပ်ဖို့ သွားကြတယ်။ နောက်ခံလူ ၂ ယောက် ဒါမှမဟုတ် ၃ ယောက်လောက်ပေါ့။ ပြီးတော့ အခြားလူတွေကို လွှတ်ပေးထားတယ်။ လီယို (မက်ဆီ) ရှိတာ အမြဲတမ်းကောင်းပါတယ်။ ဂိုးကတော့ လာပါလိမ့်မယ်”

အာဂျင်တီးနားမှာ ကိုပါအမေရိကဗိုလ်လုပွဲအဖြစ် ချီလီအသင်းနှင့် မနက်ဖြန်ညတွင် ယှဉ်ပြိုင်ကစားရမည်ဖြစ်သည်။

Ref: Goal