ဝီဂါလူမျိုးများအတွက် တူရကီပြည်သူများ တရုတ်အစိုးရကို ဆန္ဒပြ

ဇူလိုင် ၆၊ ၂၀၁၅
M-Media

– တာ့က်နွယ်ဖွား ၀ီဂါမွတ်စလင်များအပေါ် တရုတ်အစိုးရ၏ ဆက်ဆံမှုကို မကျေနပ်သည့်အတွက် တူရကီတွင် တရုတ်အစိုးရ ဆန့်ကျင်ရေး ဆန္ဒပြမှုများ ဖြစ်ပွားနေသည်ဟု သိရသည်။

တရုတ်နိုင်ငံအနောက်ပိုင်း ဇင်ဂျန်းပြည်နယ်ရှိ ၀ီဂါလူမျိုး အစ္စလာမ်ဘာသာဝင်များ၏ ၀တ်ပြုမှုနှင့် ရမ်ဇာန်ဥပုသ်လတွင် ဥပုသ်သီလဆောက်တည်မှုများကို တရုတ်အစိုးရက ပိတ်ပင်ကန့်သတ်မှုများ ပြုလုပ်ခဲ့ပြီးနောက် တူရကီနှင့် တရုတ်နိုင်ငံတို့အကြား ဆက်ဆံရေးမှာ မကြာသေးမီအချိန်မှစ၍ တင်းမာလာခဲ့သည်။

တာ့က်နွယ်ဖွား ၀ီဂါလူမျိုးများကို တူရကီပြည်သူများက ယဉ်ကျေးမှုနောက်ခံနှင့် ဘာသာရေး မျှဝေသူများအဖြစ် မှတ်ယူသောကြောင့် ၀ီဂါလူမျိုးများ၏ ပြဿနာများမှာ တူရကီပြည်သူများအတွက် အရေးပါလာခဲ့ပြီး တရုတ်အစိုးရအား ဆန္ဒပြသည်အထိ ဦးတည်ခဲ့သည်။

ပြီးခဲ့သည့်တစ်ပတ်အတွင်း အုပ်စုငယ်တစ်ခုမှာ အစ္စတန်ဘူလ်မှ လူသိများသော တိုဖိန်း ခရိုင်ရှိ တရုတ်စားသောက်ဆိုင်တစ်ခုကို တိုက်ခိုက်ခဲ့ပြီး ပြတင်းပေါက်များ ပျက်ဆီးခဲ့သည်ဟု တူရကီသတင်းစာ Hurriyet က ဖော်ပြခဲ့သည်။

ယမန်နေ့ကလည်း အစ္စတန်ဘူလ်ရှိ တရုတ်ကောင်စစ်ဝန်ရုံးသို့ ရာပေါင်းများစွာသော တူရကီပြည်သူများက ချီတက်သွားကြကာ အဆောက်အဦးအပြင်ဘက်တွင် တရုတ်အစိုးရ ဆန့်ကျင်ရေး ကျွေးကြော်သံများကို ကျွေးကြော်ခဲ့ကြသည်။ ယမန်နေ့မနက် အစောပိုင်းတွင်လည်း ဆန္ဒပြသူအချို့မှာ တရုတ်အလံကို မီးရှို့ခဲ့ကြသည်။

“သူတို့ (၀ီဂါ)တွေဟာ ကျွန်တော်တို့ရဲ့ ညီအစ်ကိုတွေဖြစ်ပြီး သူတို့ရဲ့ ယုံကြည်ချက်အတွက် ငြှင်းပန်းနှိပ်စက် ခံနေရပါတယ်။ သူတို့ ဘာအမှားမှ မလုပ်ပါဘူး။ သူတို့ရဲ့ ရမယ်ရှာခံရတဲ့ တစ်ခုတည်းသောအရာက မွတ်စလင်ဖြစ်ခြင်းပါပဲ” ဟု ဆန္ဒပြမှုတွင် ပါဝင်ခဲ့သည့် အသက် ၁၇ နှစ်အရွယ် မိုဟာမက် ဂေါ့က်စီက ပြောကြားခဲ့သည်။

တူရကီအစိုးရကလည်း ငြှင်းပန်းနှိပ်စက်မှုကြောင့် အိုးအိမ်စွန့်ခွာ ထွက်ပြေးလာသည့် ၀ီဂါလူမျိုးများအတွက် တံခါးဖွင့်ထားသည်ဟု သောကြာနေ့က ပြောကြားခဲ့သည်။

ထိုကဲ့သို့ တရုတ်အစိုးရဆန့်ကျင်မှုများ ဖြစ်ပွားနေသောကြောင့် တူရကီနိုင်ငံသို့ ခရီးသွားသည့် တရုတ်နိုင်ငံသားများအနေဖြင့် အထူးသတိပြုရန် တရုတ်နိုင်ငံခြားရေးဝန်ကြီးဌာနက သတိပေးချက် ထုတ်ပြန်ထားသည်။

Ref: Aljazeera