ငြိမ်းချမ်းအေး – ဘာသာရေးဗန်းပြ အာဏာနိုင်ငံရေး အမြတ်ထုတ်မှုကို တကိုယ်ရေ ဆန့်ကျင်ကြပါ

၂၀၁၆ နိုဝင်ဘာ အမေရိကန်နိုင်ငံ သမ္မတရွေးကောက်ပွဲမှာ ဒီမိုကရက်တစ်ပါတီ ကိုယ်စားပြု ဝင်ရောက်ရွေးချယ်ခံဖို့ ရည်မှန်း ထားတဲ့ နိုင်ငံခြားရေးဝန်ကြီးဟောင်းလည်းဖြစ်၊ သမ္မတဟောင်းကတော်လည်းဖြစ်သူ ဟီလာရီကလင်တန်က ဇွန်လ ၂၀ ရက်နေ့က ပြောလိုက်တယ်။  အမေရိကားရဲ့ လူမျိုးရေးခွဲခြားမှု ပပျောက်ရေးတိုက်ပွဲကြီးဟာ အောင်မြင်ပြီးမြောက်ဖို့ အဝေး ကြီး လိုပါသေးသတဲ့။  အသက် ၂၁ အရွယ် လူဖြူ လူငယ်ကလေးတယောက် ဇွန်လ ၁၇ ရက်နေ့တုန်းက ကျူးလွန်ခဲ့တဲ့  ချာလ်စတန် ဧမနွေလ အာဖရိကန်အမေရိကန် မက်သဒစ် ခရစ်ယာန်ဘုရားကျောင်း လူ ၉ ဦး သေနတ်ပစ်ခတ်ခံ သေဆုံးခဲ့ရမှု ရာဇဝတ်မှုကြီးကိုလည်း ‘လူမျိုးရေးခွဲခြားမှု အခြေခံအကြမ်းဖက်မှုကြီး’ အဖြစ် ပြစ်တင်ရှုတ်ချလိုက်တယ်။  အမေရိကန် ပြည် တွင်းစစ် (၁၈၆၁-၁၈၆၅) အတွင်းက လူမည်းတွေကို ကျွန်အဖြစ် ဆက်လက်ထားလိုကြတဲ့ တောင်ပိုင်းပြည်နယ်များရဲ့ ခွဲထွက်ရေးတပ်အလံကိုလည်း အမေရိကားရဲ့ လူမျိုးရေးခွဲခြားမှု အတိတ်ပုံရိပ်ဟောင်းဖြစ်တဲ့ ဒီလိုအလံတွေကို ဈေးကွက်မှာ ထုတ်လုပ်ဖြန့်ချိရောင်းချနေတာတွေရပ်ဖို့ ဟီလာရီက နှိုးဆော်လိုက်တယ်။

အသားဖြူတဲ့ ကော့ကဆွိုတ် ဥရောပအနွယ်လူဖြူတွေ အစုအလိုက် အပြုံလိုက် လူသတ်တာမျိုး၊ လေယာဉ်တွေ ဖျက်ကြ တာမျိုး စတဲ့ လူသတ်အကြမ်းဖက်မှုကြီးတွေ ကျူးလွန်ကြရင် ဘက်မလိုက် တင်ပြရေးသားရမယ့် စာနယ်ဇင်းလိုမျိုးကအစ ‘Terrorism အကြမ်းဖက်မှု’ လို့ သုံးလေ့သုံးထနည်းပြီး တဦးချင် စိတ်ရူးသွပ်မှုသဘောသာ အရောင်ဖျော့ Low Profile လုပ် ဖော်ပြလေ့ရှိတတ်တဲ့ လူဖြူကြီးစိုးရာ အမေရိကန် နိုင်ငံလိုမျိုးမှာ အခုလို လူဖြူ အနွယ် သမ္မတလောင်း မျှော်လင့်ချက်ရှိတဲ့ အမျိုးသမီးခေါင်းဆောင် တယောက်က လူအများစု နားခံခက် မခံချိမခံသာစေမယ့် တိုင်းပြည်ရဲ့ ပကတိအခြေအနေ ခါးသီးတဲ့ အမှန်တရားတွေကို ရွေးကောက်ပွဲအတွက် မဲဆွယ် စည်းရုံးရေး ခရီးစဉ်တွေမှာ ရဲရဲဝံ့ဝံ့ ပြောဆိုနေတာတွေ ဖတ်သိ နားထောင်ရတော့ သူတို့ရဲ့ နိုင်ငံရေး၊ လူမျိုးရေး၊ ဘာသာရေး ရေချိန်ကို တွက်သိ တွေးကြည့် အားကျမိတယ်။

ဟီလာရီ ဒီလိုတွေ ဒေါင်းတည်မောင်းတည် လူနည်းစုတွေဘက်က ရပ်တည် ပြောနေတာဟာ အာဖရိကန်အမေရိကန် လူနည်းစု မဲလိုချင်လို့ပါ လို့လည်း အလွယ်ကောက်ချက်ဆွဲလို့မရပါဘူး။  မစ်ဇူရီပြည်နယ် လူမည်းဘုရားကျောင်း တခုမှာ ဇွန်လ (၂၃) ရက်နေ့က သူပြောခဲ့တဲ့ စကားတခွန်းဖြစ်တဲ့ ‘All Lives Matter’ ဟာဆိုရင် အာဖရိကန်နွယ်အမေရိကန်များအရေး တက်ကြွလှုပ်ရှားနေသူတွေရဲ့ မကောင်းပြစ်တင် ဝေဖန်ခြင်းကိုတောင် ခံနေရပါတယ်။  ဟီလာရီရဲ့ ဒီ ‘လူသားအားလုံး အသက်ဟာ တန်ဖိုးရှိတယ်’ ဆိုတဲ့ စကားက ပြီးခဲ့တဲ့ ၂၀၁၄ ခုနှစ် သြဂုတ်လတုန်းက မစ်ဇူရီပြည်နယ်၊ ဖာဂူဆန်မြို့ မှာ ဖြစ်ပွားခဲ့တဲ့ ၁၈ နှစ် အရွယ် လူမည်းလူငယ်လေးကို လူဖြူရဲအရာရှိက မလိုအပ်ဘက် ပစ်သတ်ခဲ့မှု ဖြစ်စဉ်အပြီး အမေရိကန် တနိုင်လုံးမှာ နှိုးဆော် တောင်းဆိုလှုပ်ရှားနေကြတဲ့ ‘Black Lives Matter’ ဆောင်ပုဒ်ကို ရှေ့တန်းမတင် အသားမပေးရာ ရောက်နေလို့ လူမျိုးရေး ခွဲခြားမှု ဆန့်ကျင်ရေး လှုပ်ရှားသူတွေနဲ့ လူမည်းတချို့ရဲ့ အလိုမကျတုံ့ပြန်မှုကို သူ ရင်ဆိုင်နေရတာပါ။

ဆိုတော့ အခု ဟီလာရီက တိုင်းပြည်ရဲ့ လူမျိုးရေးသူငယ်နာမစင်မှု အနာပြည်ပုပ်ကို ဘွင်းဘွင်း မချွင်းမချန် ဖောက်ထုတ် ထောက်ပြခြင်းဟာ လူမည်းတွေအပေါ် မဲဆွယ်ခြင်းဆိုတာထက် ပိုပါတယ်။  ပြောသင့်ပြောထိုက်တာကို ပြောခြင်း သဘော ယူဆနိုင်တယ်။  တိုင်းပြည်ရဲ့ လူမျိုး၊ ဘာသာ အစွန်းမရောက်ကြတဲ့ လူအများကလည်း လက်ခံစဉ်းစားပေးနိုင်ကြတယ်။  အမေရိကန်အများစု၊ ဘာသာရေးအဖွဲ့အစည်းတွေ၊ နိုင်ငံရေးပါတီတွေနဲ့ စာနယ်ဇင်း အပါအဝင် လူထု အစုအဖွဲ့အသီးသီးဟာ ဒီလို ဦးဆောင် ဝေဖန် ဆော်သြမှုတွေကို ဆတ်ဆတ်ထိမခံ မဖြစ်၊ မရိုသေ့စကား ရင့်ရင့်သီးသီးနဲ့ ‘Nigger Lover — ငမည်းချစ်သူ’ လို ကက်ကက်လန် နင်ပဲငဆ ပြန်မပြောကြဘဲ တိုင်းပြည်မှာ လိုအပ်နေဆဲ ချို့ယွင်းအားနည်းချက်များဖြစ်တဲ့ လူမျိုးရေးအမြင် ပြင်းထန်စွန်းရောက်မှု (Racism)၊ အမုန်းရာဇဝတ်မှု (Hate Crime) နဲ့ အကြမ်းဖက်မှု (Terrorism) အလုပ်တွေကို လျော့ပါး ပပျောက်ရေးကို ရှေးရှု ဆင်ခြင်နိုင်ကြတယ်။

ဒါက အာဏာလက်မဲ့ သြဇာရှိ အမေရိကန် နိုင်ငံရေးသမားတဦးရဲ့ လတ်တလော အဖြစ်အပျက်ပါ။  တဖန် အာဏာလည်း လက်ရှိ၊ သြဇာလည်း ကြီးတဲ့ လက်ရှိ အမေရိကန်သမ္မတ အိုဘားမားရဲ့အလုပ်တွေကိုလည်း လေ့လာကြည့်ပါဦး။  အစ္စလာမ် ဘာသာဝင် မွတ်ဆလင်တွေရဲ့ ဥပုသ်လအထိမ်းအမှတ် ဝါဖြေ ညစာစားပွဲကို နှစ်စဉ်ကျင်းပနေကျအတိုင်း အိမ်ဖြူတော်မှာ ပြုလုပ်ပေးတယ်။  အမေရိကန် မွတ်ဆလင် တက်ကြွလှုပ်ရှားသူတွေ၊ လွှတ်တော်အမတ်တွေ၊ သံတမန်တွေ တက်ရောက်ခဲ့ကြ တယ်။  မြန်မာပြည်က မြန်မာ-မွတ်ဆလင်အမျိုးသမီးအရေးလှုပ်ရှားသူတယောက်တောင် တက်ရောက်ခွင့်ရခဲ့တယ်။

အိုဘားမားက ညစာစားပွဲ မိန့်ခွန်းမှာ လူသားတွေရဲ့ မူလအခွင့်အရေးရပိုင်ခွင့် လွတ်လပ်စွာ ကိုးကွယ်ယုံကြည်၊ ဓလေ့ထုံးစံ တွေ ကျင့်သုံးခွင့်ဟာ အမေရိကန်တွေရဲ့ အသည်းနှလုံးမှာ စွဲမြဲနေတဲ့ တန်ဖိုးတွေ ဖြစ်ကြောင်း ထပ်လောင်း အသိပေးခဲ့တယ်။  လူတယောက်ဟာ ဘယ်လူမျိုး၊ ဘယ်ဘာသာ၊ ဘာယုံကြည်ကိုးကွယ်လို့၊ ဘယ်လူမှုအလွှာက လာလို့၊ ဘယ်လိုပုံပန်း သဏ္ဌာန်သွင်ပြင် အသားအရောင်ရှိလို့၊ ဘယ်သူ့ကို ချစ်မြတ်နိုးလို့ ဆိုပြီး မတူကွဲပြားမှုတွေအပေါ် ပစ်မှတ်မထားသင့်ကြောင်း လည်း ပြောဆို သတိပေးခဲ့တယ်။  လတ်တလော ဖြစ်ခဲ့တဲ့ ချာလ်စတန် အာဖရိကန်အမေရိကန် ၉ ဦး အသတ်ခံရမှုနဲ့ နှစ်ဆန်းပိုင်း ဖေဖော်ဝါရီတုန်းက မြောက်ကယ်ရိုလိုင်းနားပြည်နယ် ချက်ပယ်ဟေးလ် မှာ ဖြစ်ခဲ့တဲ့ အမေရိကန်မွတ်ဆလင် ၃ ဦး အသတ်ခံရမှုတွေအတွက် ဝမ်းနည်းဆုတောင်းစကားတွေ ဆိုခဲ့တယ်။  ဘာသာရေးထုံးတမ်း ခေါင်းခြုံ ပုဝါဆောင်းခွင့်အ တွက် ဥပဒေရေးရာ တိုက်ပွဲဝင်ခဲ့တဲ့ အမေရိကန်မွတ်ဆလင် အမျိုးသမီးငယ်ကိုလည်း ညစာစားပွဲမှာ ဖိတ်ခေါ်ဂုဏ်ပြုခဲ့တယ်။

ဆိုခဲ့တာကတော့ သူတို့ဆီက ခေါင်းဆောင် ၂ ဦးရဲ့ အလုပ်တွေ၊ စကားတွေပေါ့။  ကျွန်တော်တို့ တိုင်းပြည်နဲ့ ယှဉ်ကြည့်ရ အောင်ပါ။  နှိုင်းမှ နှိုင်းရက်ပလေလို့တော့ စာဖတ်သူများ ဆိုချင်မလား မသိ။  လေ့လာ နမူနာယူရင်တော့ ဖွံ့ဖြိုးတိုးတက် ငြိမ်းချမ်း နိုင်ငံသားအားလုံး ဘာသာ၊ လူမျိုး မခွဲ ခွင့်တူညီမျှရရှိ ဒီမိုကရေစီအရသာ အပြည့်အဝ စံစားနေရတဲ့ တိုင်းပြည်မျိုးကိုပဲ လှမ်းမျှော်ကြည့်တတ်ရမှာပေါ့။  အမျိုး၊ ဘာသာ အစွဲတွေကြီး အမုန်းတွေပွား၊ လူတွေသတ်နေတဲ့ ISIS လို အဖွဲ့တွေမျိုးရဲ့ အလုပ်၊ အကျင့်အကြံတွေ၊ လူမျိုးရေး ဘာသာရေးကို အာဏာအတွက် အသုံးချနေကြတဲ့ ရှေးရိုးစွဲ နိုင်ငံတွေကိုတော့ ဘာသွား အတုယူ နှိုင်းယှဉ် လေ့လာ စရာလိုတော့မလဲ၊ ကိုယ့်ဆီမှာလည်း ဒီအကျင့်အကြံတွေ အပြည့် ဖြစ်နေခဲ့ပြီကိုး။

ဆိုခဲ့တဲ့ အမေရိကန်က ခေါင်းဆောင်း ၂ ယောက် ရဲ့ အလုပ်၊ အပြောတွေကို ကျွန်တော်တို့ တိုင်းပြည်က ခေါင်းဆောင် ၂ ယောက် လုပ်ကြည့်မယ် စဉ်းစားကြည့်ပါစို့ ခင်ဗျာ။  ရွေးကောက်ပွဲဝင်ဖို့ ပြင်ဆင်နေတဲ့ အတိုက်အခံ ဒီမိုကရေစီပါတီ ခေါင်း ဆောင် ဒေါ်အောင်ဆန်းစုကြည်ကများ ဟီလာရီ ကလင်တန်လို စကားတွေပြောခဲ့တယ် တွေးကြည့်ရအောင်ပါ။

မြန်မာပြည်မှာ လူမျိုးရေးခွဲခြားမှုတွေ ပြင်းထန်နေတယ်များ ဆိုကြည့်ပါလား၊ လူအများစု မြန်မာတွေချည်းပဲအတွက် မကြည့် နဲ့ လူနည်းစုအတွက်လည်း စဉ်းစား ခွင့်တူပေးပါ အော်ကြည့်ပါလား၊ မျိုးချစ်ဆိုသူများရဲ့ ဝိုင်းပြီး သမခံထိမှာ၊ ‘Muslim Lover’ ဆိုပြီး ဆော်ခံထိမှာ။  လူသာမန် လူအများ ကိုယ်နှိုက်ကလည်း ဒါမျိုး ဖြစ်သင့် ဖြစ်ထိုက်တာမျိုး၊ ခွင့်တူညီမျှမှု စကား တွေကို လူမျိုးရေး၊ ဘာသာရေး စိတ်အခံလေးနဲ့ နားဝင်လွယ်ကြမှာ မဟုတ်ပါ။  ဒါမျိုး လက်တွေ့ ဖြစ်မှာ မြေကြီးလက်ခတ်မလွဲ စိတ်ကူးကြည့်နိုင်ပါတယ်။

ဒီလိုတွေ ပြင်းပြင်းထန်ထန် မဆိုမပြော တတ်နိုင်သမျှ နှုတ်ဆိတ်နေတာတောင် တရားဝင် စာနယ်ဇင်းမျိုးကအစ မုတ်ဆိတ်နဲ့ ဘာသာကွဲ ပုဂ္ဂိုလ်တွေကို ဒေါ်အောင်ဆန်းစုကြည် ကန်တော့နေဟန် ပုံမှားရိုက် ဓာတ်ပုံတင် ယုံထင်ကြောင်ထင် ဖြစ်အောင် လုပ်ကြံခံနေရတယ်။  ဒေါ်အောင်ဆန်းစုကြည်နဲ့ သူ့ပါတီဟာ အမျိုးသားရေးတက်ကြွသူ ဘုန်းကြီးများ၊ လူများရဲ့ ပစ်မှတ်ထားခြင်း ခံနေရတယ်။

ဒါမှမဟုတ် လက်ရှိ အာဏာရအစိုးရ သမ္မတ စစ်ဗိုလ်ချုပ်ဟောင်း ဦးသိန်းစိန်ကများ သူ့သမ္မတ အိမ်တော်မှာ မြန်မာ-မွတ်ဆလင် ခေါင်းဆောင်တွေဖိတ် ဝါဖြေညစာစားပွဲ လုပ်ကြည့်တယ် ဆိုကြပါစို့။  ဒီမိုကရေစီနဲ့ လူ့အခွင့်အရေးကို ချစ်မြတ်နိုး လှချည်ရဲ့ဆိုပြီး တောင်းဆို ‘ဒီမိုမှ ဒီမို’ ဖြစ်နေသူများ ကိုယ်တိုင် ဝိုင်းဝန်း ‘ကုလားအားပေး စစ်အစိုးရ’ ဆိုပြီး ဆိုကြမှာ မြင်ယောင်ကြည့်မိပါတယ်။

ကျွန်တော်တို့ တိုင်းပြည် အခြေအနေက ဒီလို အရေခွံပါးတဲ့ သူတွေ အများစုနဲ့ ဝမ်းနည်းဖွယ် ဖြစ်နေရပါတယ်။  စစ်အာဏာရှင် စနစ်ဆိုး တိုင်းပြည်မှာ နှစ်ငါးဆယ် ကြီးစိုးနေခြင်းရလဒ် လူမျိုးရေး၊ ဘာသာရေး သူငယ်နာမစင် အကဲဆတ်နေကြပါတယ်။  နိုင်ငံသားအချင်းချင်းမှာတောင်မှ ‘တိုင်းရင်းသားမဟုတ်’ ဆိုပြီး တရုတ်နဲ့ အိန္ဒိယ အနွယ် နိုင်ငံသားတွေကို ဒုတိယနိုင်ငံသား တဆင့်နိမ့် အတန်းနဲ့ နိမ့်ကျတဲ့ အခွင့်အရေးပဲယူစေ လုပ်ချင်နေကြပါတယ်။

ဒါကြောင့်လည်း ဒီလို လူမျိုး၊ ဘာသာ အိုင်းအနာကို လိုရင်နှိုးဆွ မီးတောက်စေတဲ့နည်း တနည်းတည်းနဲ့ အာဏာသက်ဆိုး ရှည်လိုသူများ အမြဲ လုပ်စားခွင့်သာနေပါတယ်။  အခု လွှတ်တော်မှာ စစ်တပ်ကိုယ်စားလှယ်က ဆိုခဲ့ပြီ မဟုတ်ပါလား။  ၅၉-စ မပြင်လိုခြင်းက ဒေါ်အောင်ဆန်းစုကြည်နဲ့ မဆိုင်ဟန် — ‘သွေးနှောသူ နိုင်ငံသားများက နိုင်ငံတော်ရဲ့ အရေးအရာကို စီမံခန့်ခွဲလုပ်ဆောင်၊ အုပ်ချုပ်ရေးကဏ္ဍမှာ ၀င်ရောက်လာပါက နိုင်ငံတော်ရဲ့လွတ်လပ်ရေးနဲ့ အချုပ်အခြာအာဏာပေါ်မှာ ဆိုးကျိုးများ သက်ရောက်လာမှာ’ မို့ပါဆိုပြီး တကယ့် တိုင်းပြည်ကို ချစ်လှတဲ့ မျိုးချစ်ကြီးများသဖွယ် ခပ်တည်တည်ပဲ ဆိုခဲ့နိုင်ပြီ မဟုတ်ပါလား။

ဒီလိုနဲ့ ၄၃၆ နဲ့ ၅၉-စ အပါအဝင် အခြေခံဥပဒေရဲ့ အရေးကြီး အချက်များလည်း မပြင်နိုင်ဘဲ နှစ်ကုန် ရွေးကောက်ပွဲ ဝင်ရတဲ့ အခြေဆိုက်ခဲ့ပြီ ဖြစ်ပါတယ်။  ဒီရွေးကောက်ပွဲ အတွက် ယှဉ်ပြိုင်ရာမှာကိုက လူမျိုးရေး၊ ဘာသာရေးက နိုင်ငံရေး အမြတ်ထုတ်ရာ အာဏာထောက်ကူပစ္စည်း ဖြစ်နေတာလည်း အခု အာဏာရှင်မှိုင်းမိ အမျိုးသားရေး တက်ကြွလှုပ်ရှားသူများ သဲသဲလှုပ် ထောက်ခံအားပေးဝန်းရံကြတဲ့ အမျိုး၊ ဘာသာ၊ သာသနာ ကာကွယ်စောင့်ရှောက်ရေး မဘသ ဆရာတော် သံဃာတော်များရဲ့ ‘ဘယ်လိုလူမျိုးပဲ မဲပေးရမယ်’ ဆိုတဲ့ တိုက်တွန်းချက် သြဝါဒဆိုတာတွေက သက်သေပါပဲ။  ရွေး ကောက်ခံမယ့် ကိုယ်စားလှယ်တွေဟာ မဘသ ဘုန်းကြီးများရဲ့ အစစ်အဆေးကို အရင်ခံရမယ် အခြေအနေ ဆိုက်နေရတယ် မဟုတ်လား။  ဘုန်းကြီး ကြည်ဖြူ ကျေနပ်သူသာ လူထု မဲရစေရမယ် ဆိုတဲ့ သဘောမျိုး အမျိုးသားရေး သံဃာများ လုပ်ဆောင်ချင်တာ ပြီးခဲ့တဲ့ မဘသ ဗဟို ဒု-ကြိမ် အစည်းအဝေးပြီး ထွက်လာခဲ့တဲ့ ဆုံးဖြတ်ချက်တွေ၊ တိုက်တွန်းချက်တွေက ထင်ထင်ရှားရှား ပြသခဲ့ပါပြီ။

အခုဆိုရင် မဘသ သံဃာ အစုအဝေးရဲ့ အလုပ်တွေဟာ မျိုးစောင့်ဥပဒေတွေကနေတဆင့် တိုင်းပြည်ရဲ့ ဥပဒေပြုရေးရာ ကဏ္ဍမှာလည်း ဝင်ရောက်ခြယ်လှယ်ခွင့်ရခဲ့ပါပြီ။  တိုင်းပြည်ရဲ့ ရပ်ထဲ ရွာထဲမှာလည်း နဂိုမူလ သဘောမှာကတည်းက ဘာသာရေး ကိုင်းရှိုင်းတဲ့ လူ့အဖွဲ့အစည်းဖြစ်တာကြောင့် ဘာသာရေးခေါင်းဆောင်တွေရဲ့ သြဇာဟာ ကြီးလှလို့ ရပ်ရွာ အုပ်ချုပ်ရေးမှာ အမြဲ ဝင်ဆန့် အာဏာရှိခဲ့တယ်။  တိုင်းပြည်ရဲ့ တရားစီရင်ရေးစနစ်မှာလည်း သံဃာတွေရဲ့ အသံစူး လွှမ်းမိုး မှုကိုလည်း ဦးထွန်းလင်းဦး အမှုက ပြသခဲ့ပါတယ်။

ဒီလို တိုင်းပြည်ရဲ့ ဥပဒေပြုရေး၊ တရားစီရင်ရေး၊ အုပ်ချုပ်ရေး မဏ္ဍိုင်ကြီး ၃ ရပ်ကို ဘာသာရေးခေါင်းဆောင်တွေ လွှမ်းမိုး သက်ရောက်နေတာအပြင် အခုဆိုရင် တိုင်းပြည်ရဲ့ စတုတ္ထမဏ္ဍိုင်လို့ ခေါ်ဆိုကြတဲ့ စာနယ်ဇင်း ကဏ္ဍမှာပါ အမျိုးသားရေး သံဃာများရဲ့ ဂျာနယ်၊ မဂ္ဂဇင်းတွေ တွေ့နေရပါပြီ။  (ဒါက ပယောဂကင်းတဲ့ ဘာသာရေးစာပေ ကဏ္ဍကို ဆိုခြင်း မဟုတ်ပါ။)

မဘသ ကိုယ်တော်များဟာ ရွေးကောက်ပွဲ ဖြစ်စဉ်မှာလည်း ဝင်ရောက် အရွေးခံခွင့် မရှိလို့ မပါတာကလွဲလို့ အမျိုးသားရေး အတွက် ဘယ်သူ့ ဘယ်ဝါ၊ တော်၏ မတော်၏ လူထုကို တအိမ်ဝင် တအိမ်ထွက်တောင် မဲဆွယ် စည်းရုံး၊ မှတ်ချက်ပြု လမ်းညွှန်ကာ ပါတီအာဏာနိုင်ငံရေးမှာ ထဲထဲဝင်ဝင် ပါဝင်ပတ်သက်မယ် အခု တရားဝင် ဆိုနေနိုင်ပြန်ပါတယ်။

ဆိုတော့ တိုင်းပြည်ကို ၂၀၀၈ အခြေခံဥပဒေ အကာအကွယ်နဲ့ စစ်ဗိုလ်အဟောင်းအသစ်များ အုပ်ချုပ်နေတဲ့အပြင် အမျိုးသား ရေးသံဃာအစုအဖွဲ့ကလည်း သူ့နည်းသူ့ဟန်နဲ့ သြဇာရှိ၊ အာဏာထက် ဦးဆောင်နေတယ်လို့ သုံးသပ်နိုင်ပါတယ်။

ဒါတွေအားလုံးရဲ့ ရင်းခံအကြောင်းကတော့ သူသူကိုယ်ကိုယ် လူအများရဲ့ မသိစိတ်နဲ့ ရင်ဘတ် နှလုံးသားမှာ စွဲထင်နေတဲ့ လူမျိုးရေး၊ ဘာသာရေး သူငယ်နာမစင်မှု ရောဂါ အခံကြောင့်ပါလို့ ကောက်ချက်ဆွဲချင်ပါတယ်။  ဒီလို ကုလားမုန်း၊ တရုတ် မုန်း လူမျိုး/ဘာသာ အလာဂျီ ရနေတဲ့ စိတ်အခံ Mindset တွေကို လူအများစုကြီးက မပြင်နိုင်သရွေ့တော့ အာဏာနိုင်ငံရေး၊ စစ်အုပ်စု အသက်ရှည်ရေးအတွက် ဝံသာနု အမျိုး၊ ဘာသာတရားများက ဓားစာခံ ဖြစ်နေဦးမှာပါပဲ။

ဒီလို အနေအထားမှာ တကိုယ်ရေ မိသားစုအလိုက် တနိုင် လုပ်ဆောင်နိုင်တာတွေ ရှိပါတယ်။  လူမျိုးရေး၊ ဘာသာရေး အစွဲပြင်းထန်မှုတွေ လျှော့ကြပါ။  ဒီမိုကရေစီ ပြည်ထောင်စု တိုင်းပြည်မှာ လူမျိုး၊ ဘာသာအားလုံး နိုင်ငံသား အားလုံး သမ္မတ ဖြစ်ခွင့်ကနေ အသေးအဖွယ် စင်ပေါ်တက် တရားဟောခွင့်ပေးတဲ့ ကိစ္စမျိုး အထိ အားလုံး တန်းတူခွင့်တူ ဖြစ်ရမယ် ဆိုတာကို နှစ်နှစ်ကာကာ နှလုံးသွင်းနိုင်ကြပါ။  လာမယ့် ရွေးကောက်ပွဲ အတွက်ဆိုရင်လည်း ကိုယ့်အိမ်ကို ဘာသာရေးခေါင်းစဉ် အောက်မှာ မဲပေးရေးနဲ့ ပတ်သက်ပြီးလာရောက် ပြောဆိုဆွေးနွေးစည်းရုံးသူ ရှိရင် လက်မခံပါနဲ့။  ဒါဟာ လက်ရှိတည်ဆဲ အခြေခံဥပဒေနဲ့ ဆန့်ကျင်ကြောင်း ပြန်လည် ထောက်ပြကြပါ။

ဒီလို တဦးချင်းက ဘာသာ၊ လူမျိုး ပြင်းထန်စွန်းရောက် ဇောင်းမပေး၊ ဘာသာရေးနဲ့ နိုင်ငံရေး၊ အုပ်ချုပ်ရေး လုံးလုံး ခွဲခြား မြင်နိုင်တဲ့ အပြုအမူ၊ အကျင့်အကြံ၊ အတွေးအခေါ်တွေ တည်ဆောက်နိုင်ရင် အာဏာအတွက် ဘာသာကို အသုံးချလို သူများဖြစ်ဖြစ်၊ အမျိုးသားရေး တဖက်စွန်းရောက်သူများရဲ့ အန္တရာယ်ကို ဖြစ်ဖြစ်၊ အမုန်းတရားပွားလိုသူများရဲ့ သွေးထိုး လှုံ့ဆော် ရန်မီးပွားမှုကို ဖြစ်ဖြစ် တိုင်းပြည်မှာ ကာကွယ်နိုင်ပါပြီ။  လူများစု၊ လူနည်းစု၊ လူတဦးချင်း အားလုံးရဲ့ ရပိုင်ခွင့်၊ အခွင့်အရေး၊ လွတ်လပ်မှုနဲ့ လူ့ဂုဏ်သိက္ခာကို တပြေးညီ အာမခံတဲ့ ဒီမိုကရေစီ အကျင့်အကြံတွေကို တိုင်းပြည်စနစ်မှာ ခိုင်မာအသားကျ အရိုးစွဲအောင် ကျွန်တော်တို့ လူတဦးချင်းမှာလည်း တာဝန်ရှိပါတယ်။  ၂၀၁၅ အလွန်မှာ ဒီမိုကရေစီ အဝါ၊ ဒီမိုကရေစီ အစိမ်းတွေ ပပျောက် ဖြူစင် စစ်မှန်တဲ့ ဒီမိုကရေစီစစ်စစ် အရိပ်အယောင်လေး မြင်ရဖို့ ဘာသာရေးဗန်းပြ အာဏာနိုင်ငံရေး အမြတ်ထုတ်နေမှုတွေကို သတိပြုဆင်ခြင်စေချင်ကြောင်း တိုက်တွန်းနှိုးဆော်လိုက်ကြောင်းပါ။

ငြိမ်းချမ်းအေး
ဇွန် ၂၅၊ ၂၀၁၅ (စာပြီးရက်စွဲ)

(သည်လေဒီးစ် သတင်းဂျာနယ်၊ အတွဲ (၂)၊ အမှတ်စဉ် (၆၇)၊ (၂၀၁၅) ခုနှစ် ဇွန်လ (၂၆) ရက်၊ သောကြာနေ့ထုတ်၌ ပုံနှိပ်သည်။  မိုးမခတွင်လည်း အွန်လိုင်း ဖြန့်ချိသည်။  ဆောင်းပါးပါ အာဘော်ကို ဝေဖန်ရန် လွတ်လပ်စွာ မှတ်ချက်ပြုနိုင်ပါ သည်၊ [email protected] သို့လည်း စာရေးနိုင်ပါသည်။)