ဝင်းဂါးကြောင့် တူရကီသို့ပြောင်းရွှေ့ခြင်းဟု ပိုဒေါစကီးဆို

ဇူလိုင် ၉၊ ၂၀၁၅
M-Media

– နည်းပြအာဆင်ဝင်းဂါးက တိုက်တွန်းခဲ့သောကြောင့် ဂါလာတာစာရေးသို့ ပြောင်းရွှေ့ရန် ဆုံးဖြတ်ခဲ့ခြင်းဖြစ်သည်ဟု အာဆင်နယ်တိုက်စစ်မှူးဟောင်း ပိုဒေါစကီးက ပြောကြားခဲ့ပြီး လာမည့်နှစ် ပရီးမီးယားလိဂ် ချန်ပီယံဘွဲ့ကို အာဆင်နယ်မှာ စိန်ခေါ်နိုင်မည်ဟုလည်း တစ်ပေးခဲ့သည်။

အာဆင်နယ်အသင်းတွင် ၃ နှစ်ကြာ ကျင်လည်ခဲ့ရသည့် ပိုဒေါစကီးမှာ ခြေစွမ်းကောင်းများ ပြသနိုင်ခြင်းမရှိဘဲ ယမန်နှစ် ဒုတိယ ရာသီဝက်တွင် အင်တာမီလန်သို့ အငှားချထားခြင်း ခံခဲ့ရသည်။ ထို့နောက် ပြီးခဲ့သည့်တစ်ပတ်တွင် တူရကီကလပ် ဂါလာတာစာရေးသို့ ပြောင်းရွှေ့ခဲ့ပြီး ၀င်းဂါက အသင်းမှထွက်ခွာရန် စွဲဆာင်သောကြောင့်ဖြစ်သည်ဟု ပိုဒေါစကီးက ဆိုသည်။

“၀င်းဂါးနဲ့ ပွင့်ပွင့်လင်းလင်း ကောင်းကောင်းမွန်မွန် ဆွေးနွေးပြီးတဲ့နောက်ပိုင်းမှာ အပြောင်းအလဲက ကောင်းမွန်တဲ့ ဆုံးဖြတ်ချက်ပဲလို့ ကျွန်တော် ကောက်ချက်ချခဲ့တာပါပဲ။ ဂါလာတာစာရေးဟာ ကျွန်တော့်ကို ရဖို့ ၅ နှစ်လောက် အသည်းအသန် ကြိုးစားခဲ့ရပါတယ်။ နောက်ဆုံးမှာတော့ အားလုံး အထမြောက်ခဲ့ပါတယ်” ဟု ပိုဒေါစကီးက Sport Blid သို့ ပြောကြားခဲ့သည်။

တူရကီအမှတ်ပေးချန်ပီယံဖြစ်ပြီး နိုင်ငံအတွင်း သြဇာကြီးမားသည့် ဂါလာတာစာရေးနှင့် အနာဂတ်အတွက် ပိုဒေါစကီးက စိတ်လှုပ်ရှားနေသည်။

“(တူရကီ) လိဂ်က ပရီးမီးယားလိဂ်လို၊ ဘွန်ဒစ်လီဂါလိုအဆင့်တော့ မဟုတ်ပါဘူး။ ဒါပေမယ့် ဂါလာတာစာရေးဟာ ချန်ပီယံလိဂ်မှာ အမြဲတမ်း ပါဝင်ခွင့်ရတဲ့အသင်းပါ။ ပြီးတော့ ကမ္ဘာကျော်တဲ့ ၀က်စလေ စနိုက်ဒါတို့လို နာမည်ကြီးကစားသမားတွေလည်း ရှိပါတယ်”

ထို့ပြင် ၎င်း၏ Twitter စာမျက်နှာတွင် လွှင့်တင်ခဲ့သည့် ဗီဒီယို၌ ပိုဒေါစကီးက အာဆင်နယ်ပရိတ်သတ်များအား ကျေးဇူးတင်ကြောင်း ပြောကြားခဲ့ပြီး အာဆင်နယ်အသင်းမှာ ယခုနှစ်ပရီးမီးယားလိဂ်အား ဆွတ်ခူးရရှိနိုင်မည်ဟု တစ်ပေးခဲ့သည်။

ဂျာမန်တိုက်စစ်မှူး ပိုဒေါစကီးမှာ ဘောလုံးလောကမှ အနားမယူခင် မွေးရပ်မြေကလပ် Koln အသင်းတွင် နောက်ဆုံး ကစားသွားရန် အစီအစဉ်ရှိနေသည်။

Ref: Goal