မန်ယူသို့ ပြောင်းရွှေ့ရန် ရှဝိုင်းစတိုင်ဂါ သဘောတူ

ဇူလိုင် ၁၁၊ ၂၀၁၅
M-Media

– ဘိုင်ယန်မြူးနစ်အသင်း၏ ဂျာမန်အလယ်တန်းလူ ရှဝိုင်းစတိုင်ဂါမှာ မန်ချက်စတာယူနိုက်တက်အသင်းသို့ ပြောင်းရွှေ့ရန် သဘောတူညီလိုက်သည်ဟု သိရသည်။

မန်ယူက ဘိုင်ယန်အား ကြာသာပတေးနေ့တွင် ကမ်းလှမ်းခဲ့ခြင်းဖြစ်ပြီး ဘိုင်ယန်တွင် ဗန်ဂါးလ်နှင့် လက်တွဲခဲ့ရခြင်းက ရှဝိုင်းစတိုင်းဂါ မန်ယူသို့ ပြောင်းရွှေ့ရန် လက်ခံရခြင်း၏ အဓိက အကြောင်းအရင်းဖြစ်သည်။

ဝင်ငွေ ပေါင် ၇.၂ သန်းရှိသော ၃ နှစ်စာချုပ်ကို ရှဝိုင်းစတိုင်ဂါက လက်ခံခဲ့ပြီး မကြာမီတွင် မန်ယူသို့လာရောက်၍ ဆေးစစ်မှုခံယူကာ အပြီးသတ် လက်မှတ်ရေးထိုးမည်ဖြစ်သည်။

ယခုလက်ရှိတွင် ဘိုင်ယန်နှင့် မန်ယူတို့၏မှာ ပြောင်းရွှေ့ကြေးအတွက် ညှိနှိုင်းရန် ကျန်ရှိနေသေးပြီး ဘိုင်ယန်က ပေါင် ၁၅ သန်းခန့် လိုချင်နေကာ အသက် ၃၀ အရွယ်ရှိပြီး ဘိုင်ယန်နှင့် ၁၂ လတာ စာချုပ်သက်တမ်း ကျန်ရှိနေသည့် ရှဝိုင်းစတိုင်ဂါအတွက် ထိုဈေးမှာ များလွန်းနေသည်ဟု မန်ယူက ယူဆနေသည်။ သို့သော်လည်း ဘိုင်ယန်က ဈေးအား ညှိနှိုင်းဖွယ် ရှိနေသည်။

မန်ယူမှာ ယမန်နေ့အစောပိုင်းက ပေါင် ၂၅ သန်းဖြင့် ခေါ်ယူထားသည့် ဒက်ခ်ျ တိုက်စစ်မှူး မမ်ဖစ် ဒီပေးကို ပထမဆုံး မိတ်ဆက်ခဲ့သည်။

“ကျွန်တော် ဒီမှာ ဂိုးတွေသွင်းနိုင်မယ်လို့ ထင်ပါတယ်။ တကယ်ပါ။ ကျွန်တော် ဒီအတွက် အလုပ်လုပ်မှာဖြစ်ပြီး ဒီလိုလုပ်နိုင်မယ်လို့လည်း ယုံကြည်ပါတယ်။ ဒီကိုလာပြီး အလုပ်လုပ်ဖို့၊ ဂိုးတွေသွင်းဖို့နဲ့ ပတ်သက်ပြီး ကျွန်တော် စိတ်လှုပ်ရှားပါတယ်။ ကျွန်တော်ဟာ
တိုက်စစ်မှူးတစ်ယောက် ဖြစ်တာကြောင့် ဂိုးတွေ သွင်းရပါမယ်” ဟု ဒီပေးက ပြောကြားခဲ့သည်။ ၎င်းမှာ မန်ယူ၏ အမေရိက ခရီးစဉ်သို့ သွားရောက်ပူးပေါင်းမည်ဖြစ်သည်။

Ref: Dailymail