ဝန်ကြီးချုပ်၏ ချွေတာရေးအစီအစဉ်ကို ဂရိပါလီမန် အတည်ပြု

ဇူလိုင် ၁၁၊ ၂၀၁၅
M-Media

– ဘဏ္ဍာရေးပြိုလဲမှုကို ကယ်တင်ရန်အတွက် အကြွေးရှင်များအား တင်ပြရမည့် ချွေတာရေး အဆိုပြုချက်တစ်ခုကို ဂရိပါလီမန်က ယမန်နေ့နှောင်းပိုင်းတွင် အတည်ပြုလိုက်ပြီဟု သိရသည်။

အစိုးရမှ တင်သွင်းသော အဆိုပါ အဆိုပြုချက်ကို ထောက်ခံမဲအများစုဖြင့် အတည်ပြုခဲ့ခြင်းဖြစ်ပြီး၊ ထို့ကြောင့် မနက်ဖြန်တွင် ဥရောပခေါင်းဆောင်များနှင့် ပြုလုပ်မည့် ဂရိအကြွေးပြဿနာအား ကယ်တင်ရေး ဆွေးနွေးပွဲတွင် ၀န်ကြီးချုပ် အလက်ဇစ် တီစီပရက်စ်က ထိုအဆိုပြုချက်ကို တင်သွင်းသွားနိုင်မည် ဖြစ်သည်။

ထို ချွေတာရေးအဆိုပြုချက်များတွင် အခွန်တိုးမြှင့်ကောက်ခံမှု၊ ပင်စင်နှုန်းထားများလျှော့ချမှုတို့ ပါဝင်ပြီး တီစီပရက်စ်ကမူ ထိုအစီအစဉ်များမှာ ပါတီရွေးကောက်ပွဲမ၀င်ခင်က ပေးထားသော ကတိများနှင့် တစ်ခြားစီဖြစ်နေသည်ဟု ၀န်ခံခဲ့သည်။

သို့သော်လည်း နိုင်ငံ၏ အကြွေးပြဿနာကို ဖြေရှင်းရန် ဆောင်ရွက်ချက်များ ပါဝင်မည့် အလွန်လိုအပ်နေသော အကူအညီကို ရရှိရေးအတွက် အဆိုပါ ချွေတာရေးအဆိုပြုချက်မှာ ဂရိနိုင်ငံ၏ တစ်ခုတည်းသော အခွင့်အရေးဖြစ်သည်ဟု ထည့်သွင်းပြောကြားခဲ့သည်။

ဂရိနှင့် ဥရောပနိုင်ငံတို့မှာ မနက်ဖြန်တွင် ဆွေးနွေးကြမည်ဖြစ်ပြီး ဥရောပနိုင်ငံများက ဂရိ၏ ချွေတာရေးအဆိုပြုချက်ကို လက်ခံပါက အကြွေးပြဿနာ ဖြေရှင်းရေးအတွက် လိုအပ်သော ချေးငွေကို ၃ နှစ် စာချုပ်ဖြင့် ထုတ်ပေးမည်ဖြစ်သည်။ ထို့ပြင် အဆိုပါ ချွေတာရေးအစီအစဉ်မှာလည်း ဂရိနိုင်ငံအတွင်း ဥပဒေ ဖြစ်လာမည်ဖြစ်သည်။

ဥရောပကော်မရှင်၊ နိုင်ငံတကာငွေကြေးရန်ပုံငွေအဖွဲ့ IMF၊ ဥရောပ ဗဟိုဘဏ်နှင့် ဥရောပဇုန်မှ အကြီးအကဲများမှာ ဂရိ၏ ပြုပြင်ပြောင်းလဲရေးအစီအစဉ်အတွက် ယမန်နေ့က ဆွေးနွေးခဲ့ကြသည်။

Ref: Aljazeera