လူမျိုးဘာသာမရွေးမှ လူနာများအတွက် အောက်စီဂျင်အိုးများ လှူဒါန်းလျှက်ရှိ

ဇူလိုင် ၁၃၊ ၂၀၁၅
M-Media
မိုးစက်

ရန်ကုန်။    ။ ရန်ကုန်တိုင်းဒေသကြီး၊ မင်္ဂလာတောင်ညွှန့်မြို့နယ် (၁၂၆) လမ်း မှာရှိတဲ့ မွတ်စလင် ကူညီစောင့်ရှောက်ရေးအသင်းမှေ အောက်စီဂျင်ဘူးဖြင့် အသက်ရှူနေရတဲ့   အကူညီ လိုအပ်နေသူ လူမျိုးဘာသာမရွေးမှ လူနာများ အတွက် အောက်စီဂျင်အိုးများကို အခမဲ့ ဌားရမ်း လှူဒါန်းလျှက်ရှိကြောင်း သိရပါတယ်။

“ကျွန်တော်တို့ အဖွဲ့အနေနဲ့ လူမှုရေး လုပ်ငန်းတွေကို လုပ်ကြမယ်လို့ တိုင်ပင်ခဲ့ကြပြီး ၂၀၁၅ ဖေဖော်ဝါရီလလောက်မှာ ဒီအောက်စီဂျင် လှူဒါန်းမှုကို အကောင်အထည်ဖော်ခဲ့ကြတာပါ။ အဓိကတော့ လူ့အသက်ကို ကယ်တင်မယ်ဆိုပြီး ဒီလုပ်ငန်းလေးကို စပြီးတော့ လုပ်ကြတာပါ” မွတ်စလင်မ် ကူညီစောင့်ရှောက်ရေး အသင်းမှ ဥက္ကဌ ဦးမျိုးမြင့်က အောက်စီဂျင် လှူဒါန်းဖြစ်ပုံနှင့်  ပတ်သက်ပြီး ရှင်းလင်းပြပါတယ်။

ထိုအဖွဲ့မှကြီးမှူးပြီး အောက်စီဂျင် အလှူအဖြစ် လူမျိုးဘာသာမရွေးမှ လူနာများ အတွက် အောက်စီဂျင်အိုးပေါင်း (၂၄၆) အိုးကို အခမဲ့ လှူဒါန်းခဲ့ပါတယ်။ လက်ရှိ အဖွဲ့တွင်လည်း အိုးပေါင်း (၆၀)ကျော်ရှိနေပြီး အရေးပေါ် လိုအပ်နေသော လူနာများကို အခမဲ့ဌားရမ်းလျှက်ရှိပါတယ်။

ရပ်ကွက်အတွင်းရှိ သာရေး၊ နာရေး အစရှိသည့် ကိစ္စရပ်များတွင်လည်း လူမျိုးဘာသာ မြို့နယ် မရွေး လိုက်လံဆောင်ရွက်ပေးလျှက်ရှိကြောင်း၊ ကျောင်းနေရွယ် ကလေးငယ်များကိုလည်း စာရေးထောက်ကူ ပစ္စည်းများကို အလျဉ်းသင့်သလို ထောက်ပံ့ပေး ခဲ့ကြောင်းကို ဥက္ကဌမှ ထပ်လောင်းပြောကြား ခဲ့ပါတယ်။

ယခုဇူလိုင်လတွင် အစ္စလာမ်ဘာသာဝင်များ၏ ဥပုသ်လအတွင်းလည်း ရပ်ကွက်အတွင်းရှိ လူမျိုး/ဘာသာမရွေး ဟလင်မ်များ ဝေဌခြင်း၊ အသားဟင်းများဝေဌခြင်းများ ပြုလုပ်ခဲ့ကြောင်း သိရပါတယ်။

အဆိုပါ အဖွဲ့အစည်းတွင် အဖွဲ့ဝင်ပေါင်း ၆၀ ကျော်ရှိပြီး အဖွဲ့အနေနှင့် လှူဒါန်းသည့် ကိစ္စရပ်များတွင် ထိုအဖွဲ့ဝင်များ၏ အလှူငွေဖြင့်သာ ရပ်တည်နေကြောင်း၊ ထိုအဖွဲ့အနေနှင့် ရှေ့ဆက်ပြီး လူမှုအကျိုးပြုလုပ်ငန်းများကို ဆက်လက် လုပ်ကိုင်နိုင်ရန် ကြိုးပမ်းလျှက်ရှိကြောင်း သိရှိရပါတယ်။

မွတ်စလင်ကူညီ စောင့်ရှောက်ရေးအသင်းကို ၁၉၆၀ ခုနှစ်တွင် စတင် တည်ထောင်ခဲ့ခြင်း ဖြစ်ပြီး အသင်းဝင် မှတ်ပုံတင်ဖြင့် တရားဝင် ရပ်တည်နေသော အဖွဲ့အစည်းတစ်ခုဖြစ်ကြောင်း သိရှိရပါတယ်။