မလေးဝန်ကြီးချုပ် ငွေကြေးအရှုပ်အထွေး သတင်းပေါက်ကြားသူကို စုံစမ်းဖော်ထုတ်မည်

ဇူလိုင် ၁၃၊ ၂၀၁၅
M-Media

– နိုင်ငံပိုင် ဖွံ့ဖြိုးရေးကုမ္ပဏီ 1MDB နှင့် သက်ဆိုင်နေသည့် လျှို့ဝှက်စာရွက်စာတမ်းများ နိုင်ငံခြားသားများထံ ပေါက်ကြားမှုအား ဖော်ထုတ်ရန် စုံစမ်းစစ်ဆေးမှု အစိတ်အပိုင်းအဖြစ် နိုင်ငံတော်ဗဟိုဘဏ် တာဝန်ရှိသူများအပါအ၀င် အစိုးရ၏ အထူးလုပ်ငန်းအဖွဲ့ အဖွဲ့ဝင်များအားလုံးကို စုံစမ်းစစ်ဆေးမှုများ ပြုလုပ်သွားမည်ဟု မလေးရှားရဲတပ်ဖွဲ့က ယနေ့တွင် ကြေညာချက်ထုတ်ပြန်လိုက်သည်။

ထိုသို့ စုံစမ်းစစ်ဆးမှု ပြုလုပ်ရန် တရားသူကြီးချုပ်က အမိန့်ပေးခဲ့ပြီး ထိုကိစ္စနှင့်ပတ်သက်၍ ရဲတပ်ဖွဲ့မှ အစီရင်ခံစာများလည်း ရရှိခဲ့သည်ဟု ရဲမင်ကြီး ခါလစ် အဘူဘေကာရ်က အဆိုပါ ကြေညာချက်တွင် ထည့်သွင်းပြောကြားခဲ့သည်။

1MDB မှာ ၎င်းတို့နှင့် ဆက်နွယ်နေသော ကုမ္ပဏီများမှ တစ်ဆင့် ကန်ဒေါ်လာ သန်းရာနှင့်ချီသော ငွေများကို ၀န်ကြီးချုပ် နာဂျစ်ရာဇတ်၏ ကိုယ်ပိုင် ဘဏ်အကောင့်ထဲသို့ လွှဲပေးခဲ့သည်ဟု ပြီးခဲ့သည့် သီတင်းပတ်က Wall Street ဂျာနယ်တွက် ဖော်ပြခဲ့ပြီး မလေးရှားအစိုးရ အရာရှိများထံမှ ပေါက်ကြားသော စာရွက်စာတမ်းများကို ကိုးကားသည်ဟု ဖော်ပြခဲ့သည်။

အဆိုပါ အထူးလုပ်ငန်းအဖွဲ့တွင် တရားသူကြီးချုပ် အဘ်ဒူလ် ဂနီ ပါတေးလ်၊ ဗဟိုဘဏ် အုပ်ချုပ်ရေးမှူး ဒေါက်တ ဇေတီ အခ်တာရ် အဇစ်၊ မလေးရှား ချစားမှုတိုက်ဖျက်ရေးကော်မရှင် အကြီးအကဲ အဘူကာဆင်မ် မိုဟာမက်နှင့် ရဲမင်းကြီး ခါလစ်အဘူဘေကာရ်တို့ ပါဝင်သည်။

ရဲမင်းကြီး ခါလစ်ကမူ ရဲတပ်ဖွဲ့၏ စုံစမ်းစစ်ဆေးမှုမှာ အဆိုပါ စာရွက်စာတမ်းများ မည်သူ့ထံမှ ပေါက်ကြားသည်ဆိုသည်နှင့် စာရွက်စာတမ်းအစစ်အမှန် သို့မဟုတ် လုပ်ကြံထားသည့် စာရွက်စာတမ်းလားဆိုသည်ကို ဆုံးဖြတ်ရန်ဖြစ်သည်ဟု ပြောကြားခဲ့သည်။

ထို့ပြင် ထိုကဲ့သို့ ပေါက်ကြားမှုမှာ အမျိုးသားလုံခြုံရေး ဆိုးရွားစွာ ဂယက်ရိုက်မှုဖြစ်ကာ မလေးရှား၏ ဒီမိုကရေစီလုပ်ငန်းစဉ်ကို ဖြိုဖျက်ရန်နှင့် ၀န်ကြီးချုပ်အား ဖြုတ်ချရန် ကြံစည်မှုလည်း ဖြစ်နိုင်သည်ဟူသော ယူဆချက်ကို ရဲတပ်ဖွဲ့က ငြင်းဆိုခြင်းမပြုဟု ထည့်သွင်းပြောကြားခဲ့သည်။

စနေနေ့က ဘလော့ဂါတစ်ဦးဖြစ်သူ ရာဂျာ ပီထရာ ကမာရူဒင်က ဗဟိုဘဏ်၏ ထိပ်တန်း တာဝန်ရှိသူ ၃ ဦးမှာ လျှို့ဝှက် စာရွက်စာတမ်းများ မီဒီယာသို့ ပေါက်ကြားမှုဖြင့် စုံစမ်းစစ်ဆေးခံနေရသည်ဟု ဖော်ပြခဲ့သော်လည်း ရဲမင်းကြီးက ယမန်နေ့တွင် ငြင်းဆိုခဲ့ကာ ဗဟိုဘဏ်ကလည်း ကြေညာချက်ထုတ်၍ အဆိုပါ စွပ်စွဲမှုကို ရှုတ်ချခဲ့သည်။

Ref: Channelnewsasia