တီဗီသရုပ်ဆောင်ကို လက်ရောက်ကျူးလွန်သူ ကမ္ဘောဒီးယားသူဌေးကြီးတစ်ဦး တရားစွဲခံရ

ဇူလိုင် ၁၈၊ ၂၀၁၅
M-Media

– နာမည်ကြီး တီဗီမင်းသမီးတစ်ဦးကို လက်ရောက်ကျူးလွန်ခဲ့သည့် ကမ္ဘောဒီးယား သူဌေးကြီးတစ်ဦးကို ရဲတပ်ဖွဲ့က ယနေ့မနက်ပိုင်းတွင် ဖမ်းဆီးကာ တရားစွဲဆိုလိုက်သည်ဟု သိရသည်။

နာမည်အရင်း အီက်ဆိုချီတာ ဟုခေါ်ပြီး အနုပညာအမည် ဆာဆာဖြင့် လူသိများသည့် အဆိုပါရုပ်ရှင်သရုပ်ဆောင်ကို ဆွတ်ဘန်ဟု အမည်ရသည့် သူဌေးကြီးက ဖနွမ်ပင်ရှိ ဂျပန်စားသောက်ဆိုင်တစ်ခုတွင် ဇူလိုင်လ ၂ ရက်နေ့က ထိုးကြိတ်ကန်ကျောက်ခဲ့ခြင်း ဖြစ်သည်။
ထိုကဲ့သို့ လက်ရောက်ကျူးလွန်နေစဉ်အတွင်း ဆွတ်ဘန်၏ သက်တော်စောင့်က ပစ္စတိုကိုကိုင်ကာ တစ်ချိန်ချိန် လုပ်နေခဲ့သည်။

လုံခြုံရေးကင်မရာတွင် မှတ်တမ်းတင်ထားသည့် အဆိုပါအဖြစ်အပျက်ကို ဆာဆာက ရယူခဲ့ပြီးနောက် ၎င်း၏ Facebook စာမျက်နှာတွင် လွှင့်တင်ခဲ့ကာ ကမ္ဘောဒီးယား ပြည်သူများအကြား အလျင်အမြန် ပြန့်နှံ့သွားခဲ့ပြီး တရားခံအား အရေးယူမှု မရှိခြင်းအတွက် အစိုးရမှာ ကျယ်ကျယ်ပြန့်ပြန့် ဝေဖန်ခြင်း ခံခဲ့ရသည်။ ကမ္ဘောဒီးယားတွင် ငွေကြေးကြွဝယ်သူများမှာ နိုင်ငံတရားစီရင်ရေးစနစ်၏ အထက်တွင် မကြာခဏ ရှိနေကြသည်။

ဆွတ်ဘန်မှာ အာဏာပိုင်များ၏ ဖမ်းဆီးမှုကို ရှောင်ရှားရန် စင်ကာပူနိုင်ငံသို့ ရှောင်တိမ်းခဲ့ပြီးနောက် ကမ္ဘောဒီယားသို့ပြန်အလာ ယနေ့တွင် ဖနွမ်ပင်လေဆိပ်၌ ဖမ်းဆီးရမိခဲ့ခြင်းဖြစ်သည်။ ထို့နောက် ဖနွမ်ပင်မြူနီစီပယ်တရားရုံးတွင် “တမင်ရည်ရွယ်ကျူးလွန်သော တိုက်ခိုက်မှု” ဖြင့် တရားစွဲဆိုခဲ့သည်ဟု ပြည်ထဲရေးဝန်ကြီးဌာန၏ ရဲတပ်ဖွဲ့ဌာနခွဲ အကြီးအကဲ ဆွတ် ခီမာရင်က ပြောကြားခဲ့သည်။

အသက် ၃၇ နှစ်အရွယ်ရှိပြီး လူကုံထံအသိုင်းအ၀ိုင်းတွင် နာမည်ကြီးသည့် ဆွတ်ဘန်မှာ အပြစ်ရှိကြောင်း ၀န်ခံခဲ့ပြီး၊ ၎င်းအား ဖနွမ်ပင်ဆင်ခြေဖုံးရှိ အကျဉ်းထောင်တွင် ထိန်းသိမ်းထားကာ ကြားနာမှုပြုလုပ်ရန် စောင့်ဆိုင်းနေသည်ဟု ခီမာရင်က ထပ်လောင်းပြောကြားခဲ့သည်။ ပြစ်မှုထင်ရှားပါက ဆွတ်ဘန်မှာ ထောင်ဒဏ် ၅ နှစ်အထိ ကျခံရမည်ဖြစ်သည်။

ကမ္ဘောဒီးယားတွင် အမျိုးသမီးများအပေါ် အကြမ်းဖက်တိုက်ခိုက်မှုများမှာ ပုံမှန်လိုလို ဖြစ်နေသော်လည်း ပြည်သူများ သိရှိခဲ့သည့် ယခုအဖြစ်အပျက်ကသာ တစ်နိုင်ငံလုံးတွင် လှုပ်လှုပ်ရှားရှားဖြစ်သွားခဲ့သည်။

AFP သတင်းဌာနနှင့် အင်တာဗျူးတွင် ဆာဆာ သူမ၏ ဂျပန်သူငယ်ချင်းတစ်ဦးကို အရက်မူးနေသော ဆွတ်ဘန်က မလိုလားအပ်သည့် အသားယူမှုများပြုလုပ်ရာမှ အချေအတင်ဖြစ်ကာ ထိုကဲ့သို့ ထိုးကြိတ်ကန်ကြောက်ခံခဲ့ရခြင်းဖြစ်သည်ဟု ပြောကြားခဲ့သည်။

Ref: Channelnewsasia